ନୂଆଦିଲ୍ଲୀ: ଆଲାସ୍କାରେ ଟ୍ରମ୍ପ ଏବଂ ପୁଟିନଙ୍କ ମଧ୍ୟରେ ବୈଠକ ସମଗ୍ର ବିଶ୍ବରେ ଚର୍ଚ୍ଚାର ପ୍ରସଙ୍ଗ ପାଲଟିଛି। କିନ୍ତୁ ୟୁକ୍ରେନ ଯୁଦ୍ଧରେ ବିରାମ ଲାଗିବ କି ନାହିଁ ତାହା ସ୍ପଷ୍ଟ ହୋଇପାରିନି । ସେପଟେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଯୁଦ୍ଧବିରତି ନୁହେଁ ସଂପୂର୍ଣ୍ଣ ଯୁଦ୍ଧ ବନ୍ଦ ଦାବି କରିଛନ୍ତି । ଏହାରି ମଧ୍ୟରେ ସେ ସୋମବାର (୧୮ ଅଗଷ୍ଟ, ୨୦୨୫) ହ୍ୱାଇଟ୍ ହାଉସରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଏନେଇ ଆଲୋଚନା କରିବେ । ୟୁକ୍ରେନର ଭବିଷ୍ୟତ ନିର୍ଣ୍ଣୟ କରିବା ପାଇଁ ଏହି ବୈଠକରେ ୟୁରୋପୀୟ ନେତାମାନେ ମଧ୍ୟ ଯୋଗଦେବେ।
ଏହି ବୈଠକରେ ୟୁରୋପୀୟ କମିଶନ ମୁଖ୍ୟ ଉର୍ସୁଲା ଭନ୍ ଡେର୍ ଏବଂ ଜର୍ମାନ ଚାନ୍ସଲର ଫ୍ରେଡ୍ରିଚ୍ ମର୍ଜ, ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍, ନାଟୋ ସେକ୍ରେଟାରୀ ଜେନେରାଲ ମାର୍କ ରୁଟ୍, ବ୍ରିଟିଶ ପ୍ରଧାନମନ୍ତ୍ରୀ କିଏର ଷ୍ଟାର୍ମର, ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନି ଜେଲେନସ୍କିଙ୍କ ସହିତ ରହିବେ। ଫ୍ରେଡ୍ରିଚ୍ ମର୍ଜ ଏବଂ ଇମାନୁଏଲ୍ ମାକ୍ରୋନ୍ ୟୁରୋପୀୟ ସଂଘ ପକ୍ଷରୁ ଏହି ବୈଠକର ଅଧ୍ୟକ୍ଷତା କରିବେ । ୟୁକ୍ରେନରେ ଶାନ୍ତି ଚୁକ୍ତିକୁ ସୁରକ୍ଷା ଦେବା ପାଇଁ ଦେଶଗୁଡ଼ିକୁ ଏକାଠି କରିବା ଏହି ବୈଠକର ଲକ୍ଷ୍ୟ ।
ଜର୍ମାନ ସରକାରଙ୍କ ଅନୁଯାୟୀ, ଏହି ବୈଠକରେ ମୁଖ୍ୟତଃ ସୁରକ୍ଷା ଗ୍ୟାରେଣ୍ଟି, ଆଞ୍ଚଳିକ ପ୍ରସଙ୍ଗ ଏବଂ ରୁଷ ଆକ୍ରମଣ ବିରୋଧରେ ୟୁକ୍ରେନକୁ ସମର୍ଥନ ବିଷୟରେ ଆଲୋଚନା କରାଯିବ। ପୁଟିନଙ୍କ ସହ ସାକ୍ଷାତ ପରେ ଟ୍ରମ୍ପ ଯୁଦ୍ଧବିରତି ଦାବି ଛାଡି ଦେଇଛନ୍ତି। ସେ ବିଶ୍ୱାସ କରନ୍ତି ଯେ, ତୁରନ୍ତ ଶାନ୍ତି ଚୁକ୍ତିନାମା ଅନୁଯାୟୀ ଯୁଦ୍ଧବିରତି ଅପେକ୍ଷା ଭଲ ନିଷ୍ପତ୍ତି ନିଆଯାଇପାରିବ। ଟ୍ରମ୍ପଙ୍କ ଅନୁଯାୟୀ, ଯଦି ଜେଲେନସ୍କି ଡୋନବାସର ସମଗ୍ର ଅଞ୍ଚଳକୁ ରୁଷକୁ ହସ୍ତାନ୍ତର କରନ୍ତି, ତେବେ ତୁରନ୍ତ ଶାନ୍ତି ପୁନଃସ୍ଥାପିତ ହୋଇପାରିବ। ଜେଲେନସ୍କି ଋଷକୁ ଜମି ଦେବାକୁ ସ୍ପଷ୍ଟ ଭାବରେ ମନା କରିଦେଇଛନ୍ତି ଏବଂ ୟୁରୋପୀୟ ଦେଶମାନେ ମଧ୍ୟ ଏଥିରେ ତାଙ୍କୁ ସମର୍ଥନ କରିଛନ୍ତି। ୟୁକ୍ରେନୀୟ ଅଧିକାରୀମାନେ କହିଛନ୍ତି ଯେ, ଆମେ ରୁଷକୁ ଜମି ଦେବା ପାଇଁ କୌଣସି ଚୁକ୍ତିରେ ରାଜି ହୋଇପାରିବୁ ନାହିଁ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ନିର୍ବାଚନ ପ୍ରଚାରରେ କହିଥିଲେ ଯେ, ରାଷ୍ଟ୍ରପତି ହେବା ପରେ ସେ ଗୋଟିଏ ମାସ ମଧ୍ୟରେ ରୁଷ-ୟୁକ୍ରେନ ଯୁଦ୍ଧ ସମାପ୍ତ କରିବେ। କିନ୍ତୁ ଅନେକ ଚେଷ୍ଟା ସତ୍ତ୍ୱେ ଟ୍ରମ୍ପ ତାହା କରିପାରିଲେ ନାହିଁ। ଅନେକ ଥର ସେ ରୁଷ ଉପରେ ପ୍ରତିବନ୍ଧକ ଲଗାଇବା ବିଷୟରେ କଥା ହୋଇଥିଲେ ଏବଂ ତା’ପରେ ପୁଟିନଙ୍କୁ ଆଲାସ୍କାରେ ଏକ ବୈଠକ ପାଇଁ ଡକାଇଥିଲେ। ଯଦିଓ ଦୁଇ ନେତାଙ୍କ ମଧ୍ୟରେ କୌଣସି ଚୁକ୍ତି ହୋଇନଥିଲା ଅନେକ ରିପୋର୍ଟରେ ଦାବି କରାଯାଇଛି ଯେ, ଟ୍ରମ୍ପ ସମ୍ମୁଖରେ ପୁଟିନଙ୍କ ସର୍ତ୍ତ ରଖିଛନ୍ତି।
ଦି ନ୍ୟୁୟର୍କ ଟାଇମ୍ସର ରିପୋର୍ଟ ଅନୁଯାୟୀ, ଟ୍ରମ୍ପ ୟୁରୋପୀୟ ନେତାମାନଙ୍କୁ ସ୍ପଷ୍ଟ ଭାବରେ କହିଛନ୍ତି ଯେ, ଯଦି ଜେଲେନସ୍କି ଡୋନବାସର ସମଗ୍ର ଅଞ୍ଚଳକୁ ରୁଷକୁ ହସ୍ତାନ୍ତର କରନ୍ତି ତେବେ ତୁରନ୍ତ ଶାନ୍ତି ଫେରିପାରିବ । ଜେଲେନସ୍କି ସମେତ ୟୁରୋପୀୟ ନେତାମାନେ ଏହାର ଦୃଢ଼ ବିରୋଧ କରିଛନ୍ତି । ଆସନ୍ତାକାଲି ଯେପରି ଚୁକ୍ତି ପାଇଁ ଜେଲେନସ୍କିଙ୍କ ଉପରେ କୌଣସି ଚାପ ପ୍ରୟୋଗ ନହୁଏ ସେଥିପ୍ରତି ଧ୍ୟାନ ଦେବାକୁ ବୈଠକରେ ଯୋଗଦେବେ ୟୁରୋପୀୟ ନେତା ।
