ନୂଆଦିଲ୍ଲୀ,୧୭/୦୮: କଂଗ୍ରେସ ସାଂସଦ ରାହୁଲ ଗାନ୍ଧୀ ପୁଣିଥରେ ‘ଭୋଟ ଚୋରି’କୁ ନେଇ ନିର୍ବାଚନ କମିଶନଙ୍କୁ ଘେରିଛନ୍ତି । ସେ ନିଜ ସୋସିଆଲ ମିଡିଆ ଏକ୍ସରେ ‘ଲାପତା ଭୋଟ’ଲେଖି ଏକ ଭିଡିଓ ସେୟାର କରିଛନ୍ତି । ତେବେ ସେଥିରେ ସେ ନିର୍ବାଚନ କମିଶନଙ୍କ କଥା ଉଲ୍ଲେଖ କରିନାହାନ୍ତି ।
ସେହି ଭିଡିଓରେ ରାହୁଲ ଲେଖିଛନ୍ତି ‘ଚୋରି ଚୋରି, ଲୁଚି ଲୁଚି’ ଆଉ ଚଳିବ ନାହିଁ । ଜନତା ଜାଣିଗଲେଣି । ଏହା ପରେ କଂଗ୍ରେସ ନିଜ ସୋସିଆଲ ମିଡିଆ ଏକ୍ସରେ ଲେଖିଛି ଯେ ଆପଣଙ୍କ ଭୋଟ ଚୋରି ଅର୍ଥ ହେଉଛି ଆପଣଙ୍କ ଅଧିକାରର ଚୋରି । ଆସନ୍ତୁ ଆମେ ସମସ୍ତେ ମିଶି ଭୋଟ ଚୋରି ବିରୋଧରେ ସ୍ୱର ଉଠାଇବା ଏବଂ ନିଜ ଅଧିକାରକୁ ବଞ୍ଚାଇବା । ରାହୁଲ ସେୟାର କରିଥିବା ସେହି ୧ ମିନିଟର ଭିଡିଓରେ ଦେଖିବାକୁ ମିଳିଛି କି ଜଣେ ବ୍ୟକ୍ତି ଥାନାରେ ପହଞ୍ଚୁଛନ୍ତି । ସେଠାରେ ଚୌକି ଉପରେ ବିଶ୍ରାମ ନେଉଥିବା ଜଣେ ପୁଲିସ ଅଧିକାରୀଙ୍କୁ କହୁଛନ୍ତି ସାହେବ ମୋତେ ରିପୋର୍ଟ ଲେଖିବାର ଅଛି । ପୁଲିସ ଅଧିକାରୀ ଜଣକ କହୁଛନ୍ତି ଆବେ ଏଠାରେ ଯଦି ରିପୋର୍ଟ ଲେଖା ନଯିବ କଣ କରିବୁ । ଏହା ପରେ ସମ୍ପୃକ୍ତ ବ୍ୟକ୍ତି ଜଣକ କହୁଛନ୍ତି ସେ ଚୋରି ରିପୋର୍ଟ ଲେଖାଇବେ । ଏହା ପରେ ପୁଲିସ ଅଧିକାରୀ ଜଣକ ପଚାରୁଛନ୍ତି ତୋର କ’ଣ ଚୋରି ହୋଇଛି । ଜବାବରେ ଉକ୍ତ ବ୍ୟକ୍ତି ଜଣକ କହୁଛନ୍ତି ସାହେବ ଭୋଟ ଚୋରି ହୋଇଯାଇଛି । ତାଙ୍କ ଭୋଟକୁ ଚୋରି କରିନିଆଯାଇଛି । ଏହା ପରେ ପୁଲିସ ଅଧିକାରୀ ଚିନ୍ତାରେ ପଡିଯାଇଛନ୍ତି । ସତରେ କଣ ତାଙ୍କର ଚୋରି ହୋଇଯାଇଛି ।
ସୂଚନାଯୋଗ୍ୟ ଯେ ଭୋଟର ତାଲିକାରେ ଅନିୟମିତତାକୁ ନେଇ ରାହୁଲ ଲଗାତାର ଭାବେ ନିର୍ବାଚନ କମିଶନଙ୍କୁ ଟାର୍ଗେଟ କରିଆସୁଛନ୍ତି । ଗତ ୧୨ ତାରିଖରେ ରାହୁଲ କହିଥିଲେ ପିକ୍ଚର ଅଭି ବାକି ହୈ । ସେ ଅଭିଯୋଗ କରିଥିଲେ ଯେ କେବଳ ଗୋଟିଏ ଦୁଇଟି ଆସନ ନୁହେଁ ଜାତୀୟ ସ୍ତରରେ ଭୋଟର ତାଲିକାରେ ବ୍ୟାପକ ଅନିୟମିତତା କରାଯାଇଛି । ଏହା ବ୍ୟବସ୍ଥାଗତ ଢ଼ଙ୍ଗରେ ଜାଣିଶୁଣି ହୋଇଛି । ସେପଟେ ରବିବାରଠାରୁ ରାହୁଲ ୧୬ ଦିନିଆ ଭୋଟର ଅଧିକାର ଯାତ୍ରା ଆରମ୍ଭ କରିବେ । ବିହାରର ସାସାରାମରୁ ଏହି ଯାତ୍ରା ଆରମ୍ଭ ହୋଇ ୧୩୦୦ କି.ମି. ଅତିକ୍ରମ କରିବା ପରେ ସେପ୍ଟେମ୍ବର ୧ରେ ପାଟନାରେ ଶେଷ ହେବ । ଏହି ଯାତ୍ରାରେ ରାହୁଲଙ୍କ ସହ ଆରଜେଡି ନେତା ତେଜସ୍ୱୀ ଯାଦବ ଓ ଇଣ୍ଡି ମେଣ୍ଟର ବହୁ ନେତା ସାମିଲ ହେବେ ବୋଲି ସୂଚନା ମିଳିଛି । ଗୟା, ନାଳନ୍ଦା, ମୁଙ୍ଗେର, ଭାଗଲପୁର, କଟିହାର, ପୁର୍ଣ୍ଣିଆ, ଦରଭଙ୍ଗା, ଚମ୍ପାରଣ ଓ ସିୱାନ ଆଦି ଜିଲ୍ଲା ଦେଇ ଏହି ଭୋଟର ଅଧିକାର ଯାତ୍ରା ଅନୁଷ୍ଠିତ ହେବ ।
ଅନ୍ୟପକ୍ଷରେ ରାହୁଲଙ୍କ ଭୋଟ ଚୋରି ଅଭିଯୋଗକୁ ନିର୍ବାଚନ କମିଶନ ଖଣ୍ଡନ କରିଛନ୍ତି । କହିଛନ୍ତି ପୁରୁଣା ଭୋଟର ତାଲିକାରେ ଅନିୟମିତତାକୁ ନେଇ ଏବେ ପ୍ରଶ୍ନ ଉଠାଇବା ଭୁଲ । ନିର୍ବାଚନ କମିଶନଙ୍କ ପକ୍ଷରୁ ଜାରି ଏକ ପ୍ରେସନୋଟରେ କୁହାଯାଇଛି ଯେ ଭୋଟର ତାଲିକା ପ୍ରସ୍ତୁତି ପ୍ରକ୍ରିୟାରେ ରାଜନୈତିକ ଦଳମାନେ ସାମିଲ ହୋଇଥାନ୍ତି । କିନ୍ତୁ କୌଣସି ରାଜନୈତିକ ଦଳ କିମ୍ବା ସେମାନଙ୍କର ବୁଥସ୍ତରୀୟ ଏଜେଣ୍ଟମାନେ ଡ୍ରାଫ୍ଟ ଭୋଟର ତାଲିକାକୁ ଠିକ୍ ଭାବେ ଦେଖିନାହାନ୍ତି । କିମ୍ବା ସମୟ ପୂର୍ବରୁ ସେଥିରେ ଅନିୟମିତତା ଥିବାର କୌଣସି ଆପତ୍ତି ଅଭିଯୋଗ ବି କରିନାହାନ୍ତି ।
ରବିବାର ଅପରାହ୍ନ ୩ଟାରେ ନିର୍ବାଚନ କମିଶନ ପ୍ରେସମିଟ୍ ଡାକିଛନ୍ତି । ନ୍ୟାସନାଲ ମିଡିଆ ସେଣ୍ଟରରେ ହେବାକୁ ଥିବା ଏହି ପ୍ରେସମିଟ୍ରେ ରାହୁଲ ଓ ଅନ୍ୟ ବିରୋଧୀ ଦଳମାନେ କରିଥିବା ଭୋଟ ଚୋରି ଅଭିଯୋଗ ଉପରେ ନିର୍ବାଚନ କମିଶନ ପ୍ରତିକ୍ରିୟା ରଖିବେ । ବିହାରରେ ଚାଲିଥିବା ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନ (ଏସ୍ଆଇଆର) ପରେ ଏହା ନିର୍ବାଚନ କମିଶନଙ୍କ ପ୍ରଥମ ପ୍ରେସ୍ମିଟ ହେବ ।
