ନୂଆଦିଲ୍ଲୀ, ୧୭/୦୮: ରବିବାର ଇଣ୍ଡୋନେସିଆର ସୁଲାୱେସିରେ ଭୂକମ୍ପ ଅନୁଭୂତ ହୋଇଛି । ଯାହାର ତୀବ୍ରତା ରିକ୍ଟର ସ୍କେଲ୍ରେ ୫.୭ ଥିବା ନେଇ ଜର୍ମାନ ରିସର୍ଚ୍ଚ ସେଣ୍ଟର ଫର୍ ଜିଓସାଇନ୍ସ (GFZ) ରିପୋର୍ଟ କରିଛି । ଏହି ଭୂମିକମ୍ପର କେନ୍ଦ୍ରସ୍ଥଳ ଭୂପୃଷ୍ଟରୁ ୧୦ କିଲୋମିଟର ଗଭୀରତା (୬.୨୧ ମାଇଲ) ରହିଥିଲା । ବର୍ତ୍ତମାନ ସୁଦ୍ଧା କୌଣସି ମୃତାହତ କିମ୍ବା କ୍ଷୟକ୍ଷତିର ରିପୋର୍ଟ ଆସିନାହିଁ । ପରିସ୍ଥିତି ଉପରେ ନଜର ରଖାଯାଇଛି।
ଏହି ସପ୍ତାହରେ ଦ୍ୱିତୀୟ ଘଟଣା- ଅଗଷ୍ଟ ୧୨ ତାରିଖରେ ପଶ୍ଚିମ ପାପୁଆ ପ୍ରଦେଶରେ ୬.୩ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା। ଆମେରିକାର ଭୂତତ୍ତ୍ୱ ସର୍ଭେ କହିଛି ଯେ, ଏହି ଭୂମିକମ୍ପ ସ୍ଥାନୀୟ ସମୟ ପ୍ରାୟ ସନ୍ଧ୍ୟା ୫ଟା ୨୪ (୦୮୨୪ GMT) ରେ ଅନୁଭୂତ ହୋଇଥିଲା । ଏହାର କେନ୍ଦ୍ରସ୍ଥଳ ପାପୁଆର ଆବେପୁରା ସହରରୁ ପ୍ରାୟ ୧୯୩ କିଲୋମିଟର ଉତ୍ତର-ପଶ୍ଚିମରେ ରହିଥିଲା । ଏନେଇ Xରେ ଏକ ପୋଷ୍ଟ କରି ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ସୂଚନା ଦେଇଛି । ତେବେ ଏହା ପୂର୍ବରୁ ଅଗଷ୍ଟ ୭ ତାରିଖରେ ୧୦୬ କିଲୋମିଟର ଗଭୀରତାରେ ୪.୯ ତୀବ୍ରତାର ଏକ ଭୂମିକମ୍ପ ହୋଇଥିଲା।
ଇଣ୍ଡୋନେସିଆ ସମ୍ମୁଖୀନ ହେଉଥିବା ଭୂକମ୍ପୀୟ ଚ୍ୟାଲେଞ୍ଜ-
ଇଣ୍ଡୋନେସିଆ ଦୁଇଟି ପ୍ରମୁଖ ଟେକ୍ଟୋନିକ୍ ପ୍ଲେଟ୍ - ଅଷ୍ଟ୍ରେଲିୟ ପ୍ଲେଟ୍ ଏବଂ ନୂତନ ଭାବରେ ପୃଥକ ହୋଇଥିବା ସୁଣ୍ଡା ପ୍ଲେଟ୍ ମଧ୍ୟରେ ଅବସ୍ଥିତ। ଇଣ୍ଡୋନେସିଆର ଭୂଗର୍ଭ ବହୁତ ଜଟିଳ, କାରଣ ଏହା ଅନେକ ଭୂଗର୍ଭ ପ୍ଲେଟର ଏକ ସଂଯୋଗ ବିନ୍ଦୁ। ଇଣ୍ଡୋନେସିଆ ଦୁଇଟି ମହାଦେଶୀୟ ପ୍ଲେଟ- ସାହୁଲ ସେଲଫ୍ ଏବଂ ସୁଣ୍ଡା ପ୍ଲେଟ ଏବଂ ଦୁଇଟି ମହାସାଗରୀୟ ପ୍ଲେଟ- ପ୍ରଶାନ୍ତ ମହାସାଗର ପ୍ଲେଟ ଏବଂ ଫିଲିପାଇନ୍ସ ସମୁଦ୍ର ପ୍ଲେଟ ମଧ୍ୟରେ ଅବସ୍ଥିତ। ସୁଣ୍ଡା ପ୍ଲେଟ୍ ତଳେ ଭାରତୀୟ ପ୍ଲେଟର ଅବନତି ପଶ୍ଚିମ ଇଣ୍ଡୋନେସିଆରେ ଜ୍ୱାଳାମୁଖୀ ଆର୍କ ଗଠନ କରିଥିଲା । ଯାହା ଭୂମିକମ୍ପ ଦୃଷ୍ଟିରୁ ସବୁଠାରୁ ସକ୍ରିୟ ଅଞ୍ଚଳ ।
