ନୂଆଦିଲ୍ଲୀ,୦୮/୧୦: ସୋମବାର ମାଲଦ୍ୱୀପ ରାଷ୍ଟ୍ରପତି ମହମ୍ମଦ ମୁଇଜୁ କହିଛନ୍ତି ଯେ ମାଲଦ୍ୱୀପ ପାଇଁ ଭାରତ ହେଉଛି ପର୍ଯ୍ୟଟନ ଉତ୍ସ ବଜାର ମଧ୍ୟରୁ ଅନ୍ୟତମ। ଅଧିକ ସଂଖ୍ୟକ ଭାରତୀୟ ପର୍ଯ୍ୟଟକ ମାଲଦ୍ୱୀପ ପରିଦର୍ଶନ କରିବେ ବୋଲି ସେ ଆଶା ପ୍ରକଟ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ବ୍ୟାପକ ଆଲୋଚନା ପରେ ଏକ ସାମ୍ବାଦିକ ସମ୍ମିଳନୀରେ ମୋଇଜୁ କହିଛନ୍ତି ଯେ ଭାରତ ଏବଂ ମାଲଦ୍ୱୀପ ମଧ୍ୟରେ ସମ୍ପର୍କ ଶତାବ୍ଦୀ ପୁରୁଣା ଯାହା ଆମ ଇତିହାସରେ ସ୍ପଷ୍ଟ ହୋଇଛି।
ମୁଇଜୁଙ୍କ ଏହି ବିବୃତ୍ତି ଗୁରୁତ୍ୱପୂର୍ଣ୍ଣ କାରଣ ଚଳିତ ବର୍ଷ ଜାନୁଆରୀରେ ମାଲଦ୍ୱୀପର କିଛି ମନ୍ତ୍ରୀ ପ୍ରଧାନମନ୍ତ୍ରୀ ମୋଦୀଙ୍କ ବିରୋଧରେ ବିବୃତ୍ତି ଦେଇଥିବା ବେଳେ ଭାରତରେ 'ବୟକଟ୍ ମାଲଦ୍ୱୀପ' ଅନଲାଇନ୍ ଅଭିଯାନ ବୃଦ୍ଧି ପାଇଥିଲା। ମୁଇଜୁ ଆହୁରି କହିଛନ୍ତି, ଦୀର୍ଘ ଦିନ ଧରି ଦୁଇ ଦେଶ ମଧ୍ୟରେ ସମ୍ପର୍କର ମୂଳଦୁଆ ରହିଆସୁଛି।
ସେ କହିଛନ୍ତି ପର୍ଯ୍ୟଟନ, ଚିକିତ୍ସା, ଶିକ୍ଷା ଏବଂ ଅନ୍ୟାନ୍ୟ କାରଣରୁ ଅନେକ ମାଲଦ୍ୱୀପବାସୀ ଭାରତ ଗସ୍ତ କରନ୍ତି। ଏଥି ସହିତ, ମାଲଦ୍ୱୀପ ବହୁ ସଂଖ୍ୟକ ଭାରତୀୟଙ୍କୁ ଆବଶ୍ୟକ କରେ ଯେଉଁମାନେକି ଦେଶ ବିକାଶରେ ସହଯୋଗ କରନ୍ତି। ଅନ୍ୟପକ୍ଷରେ ମୁଇଜୁଙ୍କ ପତ୍ନୀ ସାଜିଦା ମହମ୍ମଦ ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ ପରିଦର୍ଶନ କରି ଖାଦ୍ୟ ନିରାପତ୍ତା ଉପରେ ସେମାନଙ୍କ ପଦକ୍ଷେପକୁ ପ୍ରଶଂସା କରିଥିଲେ।
