ମାଲକାନଗିରି : ମସ୍ୟଜୀବୀଙ୍କ ରୋଜଗାର ବୃଦ୍ଧି ପାଇଁ ପ୍ରୟାସ। ସତୀଗୁଡା ଜଳ ଭଣ୍ଡାରରେ ୫୪ ହଜାରରୁ ଉର୍ଦ୍ଧ୍ଵ ଉନ୍ନତ ମାନର ଚିଙ୍ଗୁଡ଼ି ଯାଁଳା ଛଡା ଗଲା। ଜିଲ୍ଲା ମତ୍ସ୍ୟ ସମ୍ପଦ ବିଭାଗ ପକ୍ଷରୁ ଆଜି ମାଲକାନଗିରି ଜିଲ୍ଲା ସଦର ମହକୁମାର ସତୀଗୁଡା ଜଳ ଭଣ୍ଡାରରେ ଏହି ଚିଙ୍ଗୁଡି ଯାଁଳା ଗୁଡିକ ଛଡ଼ା ଯାଇଛି।
ଏମଏମକେୱାଇ ଯୋଜନା ମଧ୍ୟମରେ ଏହି ଯାଁଳା ଗୁଡିକ ଛଡା ଯାଇଥିବା ବେଳେ ଜିଲ୍ଲାର ମାଥିଲି ବ୍ଲକରେ ଥିବା ରେଣୁ ଫିସ୍ ଫାର୍ମ ପକ୍ଷରୁ ଏହି ଉନ୍ନତ ମାନର ଚିଙ୍ଗୁଡି ଯୋଗାଇ ଦିଆଯାଇଛି। ପୂର୍ବରୁ ଜିଲ୍ଲାର ଚିତ୍ରକୋଣ୍ଡା ଠାରେ ଥିବା ବାଲିମେଳା ଜଳଭଣ୍ଡାରରେ ମଧ୍ୟ ଏହି ସମାନ ପ୍ରକାରର ଚିଙ୍ଗୁଡି ଯାଁଳା ଛଡା ଯାଇଛି। ତେବେ ଏହି ଉନ୍ନତ ମାନର ଚିଙ୍ଗୁଡିର ବିଶେଷତ୍ୱ ହେଉଛି ଏହା ଖୁବ କମ୍ ସମୟ ମଧ୍ୟରେ ବହୁତ ଅଧିକ ଓଜନର ହୋଇଯାଏ।
ଯାହା ଫଳରେ ମତ୍ସ୍ୟଜୀବୀ ମାନେ ଅଧିକ ଲାଭବାନ ହେବା ଆଶା ରହିଛି। ଏହି ଚିଙ୍ଗୁଡିର ଓଜନ ପ୍ରତି ବଜାର ଦାମ ପ୍ରାୟ ୫୦୦ଟଙ୍କାରୁ ଊର୍ଦ୍ଧ୍ଵ ରହିଥିବା ବେଳେ ମତ୍ସ୍ୟଜୀବୀ ମାନେ ମାଛ ଅପେକ୍ଷା ଏଥିରେ ଅଧିକ ଲାଭବାନ ହୋଇ ପାରିବେ ବୋଲି ବିଭାଗ ପକ୍ଷରୁ କୁହାଯାଇଛି।
ସ୍ଥାନୀୟ ଅଞ୍ଚଳର ମତ୍ସ୍ୟଜୀବୀ ମାନେ ଏହି ଯାଁଳା ଛଡା ଯିବା ପରେ ଖୁବ୍ ଖୁସି ବ୍ୟକ୍ତ କରିଛନ୍ତି। ଏହି କାର୍ଯ୍ୟକ୍ରମରେ ଜିଲ୍ଲା ମତ୍ସ୍ୟ ଅଧିକାରୀ ସୁଶାନ୍ତ ଗୌଡ, ଏଏଫଓ ମୁକେଶ ମାଝି, ମନୋଜ କୁମାର ଜେନା, ଆଇସିଏସ ସଂଗ୍ରାମ କେଶରୀ ବିଶ୍ଵାଳ ପ୍ରମୁଖଙ୍କ ସହ ଅନ୍ୟ ଅଧିକାରୀ ମାନେ ଉପସ୍ଥିତ ଥିଲେ।
