ନୂଆଦିଲ୍ଲୀ, ୨୮/୦୩: କିଛି ଦେଶର ଆକାର ବଡ଼ ହୋଇଥାଏ । ତ ଆଉ କିଛି ଦେଶରେ ଜନସଂଖ୍ୟା ଅଧିକ ଥାଆନ୍ତି । କେଉଁ ଦେଶରେ କୋଟିକୋଟି ଲୋକ ବାସ କରନ୍ତି ତ ଆଉ କେଉଁ ଦେଶରେ ମାତ୍ର ହଜାର କି ଲକ୍ଷେରେ ସୀମିତ । କିନ୍ତୁ ଜାଣି ଆଶ୍ଚର୍ଯ୍ୟ ହେବେ । ଦୁନିଆରେ ଏମିତି ଏକ ଦେଶ ଅଛି ଯେଉଁଠି ମାତ୍ର ୩ ଜଣ ଲୋକ ଓ ୩ଟି କୁକୁର ବାସ କରନ୍ତି । ଆମେ କହୁଛୁ ଯୁକ୍ତରାଷ୍ଟ୍ର ଆମେରିକାର ନେଭାଡା ରାଜ୍ୟରେ ଅବସ୍ଥିତ 'ମୋଲୋସିଆ ' କଥା ।
ଏହି ଦେଶର ମୋଟ କ୍ଷେତ୍ରଫଳ ୧୧.୩୪ ଏକର । ଏହି ଦେଶ ବେଶ୍ ଛୋଟ ହୋଇଥିବାରୁ ଏହାକୁ ଏକ ମାଇକ୍ରୋନେସନ୍ ବୋଲି ମଧ୍ୟ କୁହାଯାଏ । ମୋଲୋସିଆ ୧୯୭୭ ମସିହାରେ ସ୍ଥାପନ ହୋଇଥିଲା। ଆଉ ସେତେବେଳେ ଏହି ଦେଶକୁ ଗ୍ରାଣ୍ଡ ରିପବ୍ଲିକ ଅଫ୍ ୱାଲ୍ଡଷ୍ଟାଇନ କୁହାଯାଉଥିଲା । ପ୍ରାୟ ୨୦ ବର୍ଷ ପରେ, ୧୯୯୮ ମସିହାରେ, ଏହାର ନାମ ପରିବର୍ତ୍ତନ କରାଯାଇ କିଙ୍ଗଡମ୍ ଅଫ୍ ମୋଲୋସିଆ ରଖାଯାଇଥିଲା । ଏହି ଦେଶର ମୋଟ ଜନସଂଖ୍ଯା ମାତ୍ର ୩୮ ଜଣ । କିନ୍ତୁ ବର୍ତ୍ତମାନ ଏଠାରେ କେବଳ ୩ ଜଣ ଲୋକ ଓ ୩ଟି କୁକୁର ରହୁଛନ୍ତି । ଏହି ଦେଶର ନିଜସ୍ବ ନୌସେନା, ନୌସେନା ଏକାଡେମୀ, ଡାକ ସେବା, ବ୍ୟାଙ୍କ, ଅନ୍ତରୀକ୍ଷ କାର୍ଯ୍ୟକ୍ରମ, ରେଳପଥ ଏବଂ ଅନଲାଇନ୍ ରେଡିଓ ଷ୍ଟେସନ ମଧ୍ୟ ଅଛି ।
ଏହା ମଧ୍ୟ ପଢନ୍ତୁ- ଏଣିକି ବିମାନବନ୍ଦରରେ ଉଠେଇ ପାରିବେନି ଫଟୋ , ରୋକ ଲଗାଇଲା ପିଆଇଏ
ତେବେ ମୋଲୋସିଆ ଦେଶକୁ ଆସୁଥିବା ପର୍ଯ୍ୟଟକମାନଙ୍କୁ କିଛି ଜିନିଷ ଉପରେ ବିଶେଷ ଧ୍ୟାନ ଦେବାକୁ ପଡିଥାଏ । ଏହି ଦେଶରେ କ୍ୟାଟଫିସ୍ ଏବଂ ପିଆଜ ନେଇ ପ୍ରବେଶ କରିବା ନିଷେଦ୍ଧ । ଏଠାକୁ ଯିବା ସମୟରେ ଏହି ଦୁଇଟି ଜିନିଷକୁ ସାଙ୍ଗରେ ନେଇପାରିବେ ନାହିଁ । ଯଦି ଏହାକୁ ଅବମାନନା କରାଯାଏ, ତେବେ ଜେଲ ହୋଇପାରେ । ମୋଲୋସିଆର ରାଷ୍ଟ୍ରୀୟ ଭାଷା ହେଉଛି ଇଂରାଜୀ । କିନ୍ତୁ ଏଠାରେ ଏସ୍ପେରାଣ୍ଟୋ ଏବଂ ସ୍ପାନିସ୍ ଭାଷା ମଧ୍ୟ କୁହାଯାଏ । ଯଦିଓ ମୋଲୋସିଆ ଗଣରାଜ୍ୟ ନିଜକୁ ଏକ ଦେଶ ବୋଲି କହୁଛି, କିନ୍ତୁ ଏହାକୁ ଏ ପର୍ଯ୍ୟନ୍ତ ୟୁନାଇଟେଡ ନେସନ ଦ୍ବାରା ସ୍ୱୀକୃତି ଦିଆଯାଇନାହିଁ ।
