ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଖୁବ୍ ଜଲଦି ଆମେରିକା ଗସ୍ତରେ ଯାଉଛନ୍ତି। ପ୍ରଧାନମନ୍ତ୍ରୀଙ୍କ ଏହି ଗସ୍ତ ପାଇଁ ଆମେରିକା ସହ ଆଲୋଚନା କରାଯାଉଛି ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ ସୂଚନା ଦେଇଛି। ପିଏମ ମୋଦି ଓ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଆସନ୍ତା ଫେବୃଆରୀ ୧୩ ତାରିଖରେ ୱାଶିଂଟନରେ ଭେଟିବେ ବୋଲି ସୂଚନା ମିଳିଛି।
ଟ୍ରମ୍ପ ନିଜର ଦ୍ୱିତୀୟ ପାଳି ପାଇଁ ଶପଥ ଗ୍ରହଣ କରିବା ପରେ ଏହା ପ୍ରଧାନମନ୍ତ୍ରୀ ମୋଦୀଙ୍କ ପ୍ରଥମ ଦ୍ୱିପାକ୍ଷିକ ଆମେରିକୀୟ ଗସ୍ତ ହେବାକୁ ଯାଉଛି। ଏଥିସହ, ଟ୍ରମ୍ପ ଶାସନର ସପ୍ତାହକ ମଧ୍ୟରେ ବିଭିନ୍ନ ବିଶ୍ୱନେତାଙ୍କ ସହିତ ଦ୍ୱିପାକ୍ଷିକ ଆଲୋଚନା ପାଇଁ ୱାଶିଂଟନ୍ ଡିସିକୁ ଯାତ୍ରା କରିବାକୁ ଥିବା ବିଦେଶୀ ନେତାମାନଙ୍କ ମଧ୍ୟରେ ପ୍ରଧାନମନ୍ତ୍ରୀ ନାମ ଥିବା ଜଣାପଡିଛି। ପ୍ରଧାନମନ୍ତ୍ରୀ ପ୍ରଥମେ ତାଙ୍କ ଦୁଇ ଦିନିଆ ପ୍ୟାରିସଙ୍କ ଗସ୍ତ ଶେଷ କରିବା ପରେ ୱାଶିଂଟନ୍ ଗସ୍ତ କରିବେ ବୋଲି ଅଧିକାରୀ ମାନେ ସୂଚନା ପ୍ରଦାନ କରିଛନ୍ତି।
ଶୁକ୍ରବାର ଦିନ ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରଣଧିର ଜସୱାଲ କହିଛନ୍ତି ଯେ ଦୁଇ ଦେଶ ମଧ୍ୟରେ ସହଭାଗିତାକୁ ବଢେଇବା ପାଇଁ ପ୍ରଧାନମନ୍ତ୍ରୀ ମୋଦୀଙ୍କ ଆମେରିକା ଗସ୍ତ ପାଇଁ ଉଭୟଦେଶ ଚେଷ୍ଟା କରୁଛନ୍ତି। ତେବ ଗସ୍ତର ପ୍ରକୃତ ତାରିଖ ଏପର୍ଯ୍ୟନ୍ତ ଯାଏ ସ୍ଥିର ହୋଇନାହିଁ ବୋଲି ସେ ସୂଚନା ଦେଇଛନ୍ତି।
ସୂଚନା ମୁତାବକ, ଜାନୁଆରୀ ୨୦ ତାରିଖରେ ଡୋନାଲ୍ଡ ଟ୍ରମ୍ପ ଆମେରିକାର ୪୭ ତମ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ। ଟ୍ରମ୍ପଙ୍କ ଶପଥ ଗ୍ରହଣ ସମାରୋହ ପରେ ଟେଲିଫୋନ ଯୋଗେ ଜାନୁଆରୀ ୨୭ ତାରିଖରେ ପ୍ରଧାନମନ୍ତ୍ରୀ ମୋଦୀ ତାଙ୍କ ସହ କଥା ହୋଇଥିଲେ। ବାଣିଜ୍ୟ, ଶକ୍ତି ଏବଂ ପ୍ରତିରକ୍ଷା କ୍ଷେତ୍ରରେ ଭାରତ-ଆମେରିକା ମଧ୍ୟରେ ସହଯୋଗ ବୃଦ୍ଧି କରିବା ଉପରେ ଗୁରୁତ୍ୱ ଦେଇ ଉଭୟ ନେତା ଏକ ଦିଗରେ କାର୍ଯ୍ୟ କରିବାକୁ କଥା ହୋଇଥିଲେ।
ଆମେରିକା ସରକାରଙ୍କ ନିମନ୍ତ୍ରଣ କ୍ରମେ ଟ୍ରମ୍ପଙ୍କ ଶପଥ ଗ୍ରହଣ ସମାରୋହରେ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଭାରତ ପକ୍ଷରୁ ପ୍ରତିନିଧିତ୍ୱ କରିଥିଲେ। ତେବେ ସେ ଭାରତରୁ ଯିବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କଠାରୁ ଏକ ଚିଠି ନେଇ ଟ୍ରମ୍ପଙ୍କୁ ଦେଇଥିଲେ ବୋଲି ସୂଚନା ରହିଛି।
