ଭୁବନେଶ୍ୱର, ୧୦/୦୪: ତାଲା ଭାଙ୍ଗି ବରୁଣାଇଁ ମନ୍ଦିରରୁ ଲୁଟ୍ । ମନ୍ଦିରର ତାଲା ଭାଙ୍ଗି ମାଆଙ୍କ ସୁନା ମୁକୁଟ, ଆଖି, ହାର ସହ ମନ୍ଦିରର ହୁଣ୍ଡି ଭାଙ୍ଗି ଟଙ୍କା ଲୁଟିନେଲେ ଦୁର୍ବୃତ୍ତ । ଲୁଟ୍ ହୋଇଥିବା ଗହଣା ଓ ଟଙ୍କାର ମୂଲ୍ୟ ୩ ଲକ୍ଷରୁ ଅଧିକ ହେବ ବୋଲି ସୂଚନା ମିଳିଛି । ଘଟଣାସ୍ଥଳରେ ଧୁଷୁରୀ ପୋଲିସ ପହଞ୍ଚି ଛାନଭିନ୍ କରୁଛି । ଭଦ୍ରକ ଜିଲ୍ଲା ଧୁଷୁରୀ ଥାନା ଅଧୀନ ବରୁଣେଇଙ୍କ ମନ୍ଦିରରୁ ଏହି ଲୁଟ୍ ହୋଇଛି ।
ସୂଚନା ମୁତାବକ, ବୁଧବାର ମାଆ ବରୁଣାଇଁଙ୍କ ସନ୍ଧ୍ୟା ଆଳତୀ କରି ପୂଜକମାନେ ଘରକୁ ଯାଇଥିଲେ । ରାତିରେ ମନ୍ଦିରରେ କେହି ନଥିବାର ଫାଇଦା ଉଠାଇଥିଲେ ଦୁର୍ବୃତ୍ତ । ମନ୍ଦିର ଗେଟ୍ ତାଲା ଭାଙ୍ଗି ମାଆଙ୍କ ସୁନା ମୁକୁଟ, ସୁନା ହାର, ଆଖି ଲୁଟି ନେଇଥିଲେ ଲୁଟେରା । ପରେ ହୁଣ୍ଡି ଭାଙ୍ଗି ଦାନ ଟଙ୍କା ମଧ୍ୟ ନେଇ ଯାଇଥିଲେ । ସକାଳେ ପୂଜକ ପୂଜା କରିବା ପାଇଁ ଆସି ମନ୍ଦିରର ତାଲା ଭଙ୍ଗା ହୋଇଥିବା ଦେଖିବା ପରେ ପୋଲିସଙ୍କୁ ଖବର ଦେଇଥିଲେ । ଖବର ପାଇ ଧୁଷୁରୀ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
