ନୂଆଦିଲ୍ଲୀ,୧୭/୦୮: ଦକ୍ଷିଣ-ପୂର୍ବ ଏସୀୟ ଦେଶର ମୋଗୋକ ସହରରେ ମିଆଁମାର ସେନାର ଏୟାର ଷ୍ଟ୍ରାଇକ୍।  ନିଜ ଦେଶରେ ଏୟାର ଷ୍ଟ୍ରାଇକ୍ କରିଛି ମିଆଁମାର ସେନା। ଫଳରେ ଅତିକମରେ ୨୧ ଜଣଙ୍କର ମୃତ୍ୟୁ ହୋଇଛି। ପୂର୍ବରୁ ମଧ୍ୟ ଘାତକ ଏୟାର ଷ୍ଟ୍ରାଇକ୍ କରି ଆକ୍ରମଣ କରିଥିଲା । ଯେଉଁଥିରେ ସାଧାରଣ ନାଗରିକ ପ୍ରାଣ ହରାଇଥିଲେ ।  

ତେବେ ଦେଶର ଦ୍ୱିତୀୟ ବୃହତ୍ତମ ସହର ମାଣ୍ଡାଲେରୁ ପ୍ରାୟ ୧୧୫ କିଲୋମିଟର ଉତ୍ତର-ପୂର୍ବରେ ଥିବା ମୋଗୋକ୍ ଟାଉନସିପର ଶ୍ୱେଗୁ ୱାର୍ଡରେ ଗୁରୁବାର ରାତି ୮ଟା୩୦ ସମୟରେ ଏହି ଆକ୍ରମଣ ହୋଇଥିଲା ବୋଲି ତାଆଙ୍ଗ ନ୍ୟାସନାଲ୍ ଲିବରେସନ୍ ଆର୍ମିର ମୁଖପାତ୍ର ଲୁ ୟେ ଓ କହିଛନ୍ତି। ସେ ଆହୁରି କହିଛନ୍ତି ଯେ TNLA ହେଉଛି ଚୀନ୍ ସୀମା ନିକଟରେ ସେନା ବିରୋଧରେ ଲଢ଼ୁଥିବା ଶକ୍ତିଶାଳୀ ଜାତିଗତ ମିଲିସିଆ ମଧ୍ୟରୁ ଗୋଟିଏ। ଏହି ଆକ୍ରମଣରେ ପ୍ରାୟ ୨୧ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିବା ବେଳେ ୭ ଜଣ ଆହତ ହୋଇଛନ୍ତି। ସେହିପରି ଏଥିରେ ଘର ଏବଂ ବୌଦ୍ଧ ମଠ କୋଠା ମଧ୍ୟ କ୍ଷତିଗ୍ରସ୍ତ ହୋଇଛି। 

ଅନ୍ୟପଟେ ମୋଗୋକର ଦୁଇଜଣ ବାସିନ୍ଦା ଶନିବାର ଦିନ ଆସୋସିଏଟେଡ୍ ପ୍ରେସକୁ କହିଥିଲେ ଯେ ମୃତ୍ୟୁ ସଂଖ୍ୟା ପ୍ରାୟ ୩୦ରେ ପହଞ୍ଚିଛି, ଯଦିଓ ମୃତାହତଙ୍କ ସଠିକ୍ ସଂଖ୍ୟା  ନିଶ୍ଚିତ କରାଯାଇ ପାରିନାହିଁ। ସେନା ଦ୍ୱାରା ଗିରଫ ହେବାର ଭୟରେ ନାମ ଗୋପନ ରଖିଥିବା ବାସିନ୍ଦା କହିଛନ୍ତି ଯେ ମୃତ୍ୟୁ ସଂଖ୍ୟା ଅଧିକ।ମିଆଁମାର ନାଓ ଏବଂ ଡେମୋକ୍ରାଟିକ୍ ଭଏସ୍ ଅଫ୍ ବର୍ମା ସମେତ  ଅନଲାଇନ୍ ଗଣମାଧ୍ୟମ ବିମାନ ଆକ୍ରମଣ ପରେ ଭଗ୍ନାବଶେଷର ଫଟୋ ଏବଂ ଭିଡିଓ ପ୍ରକାଶ କରିଛି। ମୋଗୋକ୍ ଘଟଣା ଉପରେ ସେନା କୌଣସି ମନ୍ତବ୍ୟ ଦେଇନାହିଁ। ଅତୀତରେ, ସେନା କହିଥିଲା ଯେ ଏହା କେବଳ ବୈଧ ଯୁଦ୍ଧ ଲକ୍ଷ୍ୟସ୍ଥଳ ଉପରେ ଆକ୍ରମଣ କରେ ଏବଂ ପ୍ରତିରୋଧ ବାହିନୀକୁ ଆତଙ୍କବାଦୀ ବୋଲି ଅଭିଯୋଗ କରିଛି।