ଭୁବନେଶ୍ୱର,୦୭/୦୪: ସ୍କୁଲରେ ମଧ୍ୟାହ୍ନ ଭୋଜନ ଭାର ବଢ଼ିଲା । ଆଗରୁ ପ୍ରଥମରୁ ଅଷ୍ଟମ ଶ୍ରେଣୀ ଯାଏ ମଧ୍ୟାହ୍ନ ଭୋଜନ ଦିଆଯାଉଥିଲା । ଏବେ ନବମ ଓ ଦଶମ ଶ୍ରେଣୀକୁ ସାମିଲ କରାଗଲା । ଏତିକି ନୁହେଁ, ନୂଆ କରି ଖୋଲିଥିବା ଶିଶୁ ବାଟିକା ଶ୍ରେଣୀର ପିଲାଙ୍କୁ ମଧ୍ୟାହ୍ନ ଭୋଜନ ଦିଆଯିବ । ପ୍ରତି ସପ୍ତାହରେ ୩ ଦିନ ପୋଷଣଯୁକ୍ତ ଲଡୁ଼ ପ୍ରଦାନ କରିବାକୁ କୁହାଯାଇଛି । ଦାୟିତ୍ୱ ବଢ଼ୁଛି ହେଲେ କର୍ମଚାରୀଙ୍କ ସଂଖ୍ୟା ବଢ଼ିବ କି ନାହିଁ ତାକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି । ଆଗରୁ ଆସୁଥିବା ମଧ୍ୟାହ୍ନ ଭୋଜନ ଖର୍ଚ୍ଚ ଓ ଚାଉଳ କେବଳ ପ୍ରଥମରୁ ଅଷ୍ଟମ ଶ୍ରେଣୀ ପିଲା ଖାଉଥିଲେ । ଏବେ ଆଉ ୩ ଶ୍ରେଣୀ ଯୋଡ଼ି ହେବା ପରେ ଏଥିପାଇଁ କୌଣସି ଅର୍ଥ ଏଯାବତ୍ ଆସିନି । ରୋଷେଇ କିପରି ହେବ ବୋଲି ସ୍କୁଲ ଶିକ୍ଷକ ସଂଘ ପ୍ରଶ୍ନ କରିଛି ।
ଚଳିତ ମାସରୁ ରାଜ୍ୟର ସମସ୍ତ ସ୍କୁଲରେ ଆରମ୍ଭ ହୋଇଛି ଶିଶୁ ବାଟିକା । ପିଲାଙ୍କୁ ମଧ୍ୟାହ୍ନ ଭୋଜନ ମଧ୍ୟ ଦିଆଯିବ ବୋଲି ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ କୁହାଯାଇଛି । ଗତ୧ ତାରିଖରୁ ମୁଖ୍ୟମନ୍ତ୍ରୀ ପୋଷଣ ଯୋଜନାରେ ରାଜ୍ୟ ସରକାର ନବମ ଓ ଦଶମ ଶ୍ରେଣୀ ପିଲାଙ୍କୁ ମଧ୍ୟାହ୍ନ ଭୋଜନ ବ୍ୟବସ୍ଥା କରିଛନ୍ତି । ପ୍ରଥମରୁ ଅଷ୍ଟମ ଶ୍ରେଣୀ ପିଲାଙ୍କୁ ଯେଉଁ ସବୁ ମେନୁରେ ଖାଇବା ଦିଆଯାଉଥିଲା ସେସବୁ ଖାଇବା ମଧ୍ୟ ନବମ ଓ ଦଶମ ଶ୍ରେଣୀ ପିଲାଙ୍କୁ ଦିଆଯିବ । ଅତିରିକ୍ତ ଗୋଟିଏ ଲେଖାଏଁ ଅଣ୍ଡା ସହ ପୋଷଣଯୁକ୍ତ ଲଡ଼ୁ ସମସ୍ତ ଶ୍ରେଣୀର ପିଲାଙ୍କୁ ଦେବାକୁ କୁହାଯାଇଛି । ଏଥିପାଇଁ ରାଜ୍ୟ ସରକାର ୫୭୦.୭୧ କୋଟି ଟଙ୍କାର ଅର୍ଥ ବ୍ୟବସ୍ଥା କରିଛନ୍ତି ।
ଆଗରୁ ପିଏମ୍ ପୋଷଣ ଯୋଜନାରେ କେନ୍ଦ୍ର ଓ ରାଜ୍ୟ ସରକାରଙ୍କ ଅନୁଦାନରେ ପ୍ରଥମରୁ ପଞ୍ଚମ ଶ୍ରେଣୀ ପିଲାଙ୍କ ପିଛା ୭ ଟଙ୍କା ୬୪ ପଇସା ଏବଂ ଷଷ୍ଠରୁ ଅଷ୍ଟମ ଶ୍ରେଣୀ ପିଲାଙ୍କ ପିଛା ୧୦ ଟଙ୍କା ୯୪ ପଇସା ଦିଆଯାଉଛି । ନବମ ଓ ଦଶମ ଶ୍ରେଣୀ ପିଲାଙ୍କୁ ଉଚ୍ଚ ପ୍ରାଥମିକ ଶ୍ରେଣୀର ପିଲାଙ୍କ ଖର୍ଚ୍ଚରେ ମଧ୍ୟାହ୍ନ ଭୋଜନ ଦେବାକୁ କୁହାଯାଇଛି ।
ସେହିପରି ସରକାରଙ୍କ ନିୟମ ଅନୁଯାୟୀ, ୨୫ ଜଣ ପର୍ଯ୍ୟନ୍ତ ଶିକ୍ଷାର୍ଥୀ ଥିବା ସ୍କୁଲ ପାଇଁ ଜଣେ ଲେଖାଏଁ ପାଚିକା, ୨୬ରୁ ୧୦୦ ମଧ୍ୟରେ ଥିବା ଶିକ୍ଷାର୍ଥୀଙ୍କ ପାଇଁ ୨ ଜଣ ପାଚିକା ନିଯୁକ୍ତ ହେବେ । ଯଦି ୧୦୦ରୁ ଅଧିକ ଶିକ୍ଷାର୍ଥୀ ଥିବେ ତେବେ ଅତିରିକ୍ତ ଭାବେ ଜଣେ ଲେଖାଏଁ ପାଚିକା ନିୟୋଜନ କରିବାର ନିୟମ ଅଛି । ଶ୍ରେଣୀ ବଢ଼ିବା ସହ ଛାତ୍ରଛାତ୍ରୀଙ୍କ ସଂଖ୍ୟା ମଧ୍ୟ ବୃଦ୍ଧି ହୋଇଛି । ତେବେ ଖର୍ଚ୍ଚ ପ୍ରଦାନ ଓ ପାଚିକା ନିୟୋଜନ ଉପରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ସ୍ପଷ୍ଟୀକରଣ ଆଣିବା ଆବଶ୍ୟକ ବୋଲି ସଂଘ ଦାବି କରିଛି ।
ଶିକ୍ଷକ ସଂଘ ନେତା ବ୍ରହ୍ମାନନ୍ଦ ମହାରଣାଙ୍କ ଅଭିଯୋଗ, ରାଜ୍ୟ ସରକାର ବଜେଟ୍ ଘୋଷଣା କଲେ । ମଧ୍ୟାହ୍ନ ଭୋଜନ ମଧ୍ୟ ଆରମ୍ଭ କରିଦେଲେ । କିନ୍ତୁ ଏଥିପାଇଁ ଅର୍ଥ ଏଯାବତ୍ ସ୍କୁଲକୁ ଆସିନି । କେଉଁ ପାଣ୍ଠିରୁ ଏହାକୁ ଖର୍ଚ୍ଚ କରାଯିବ ଏନେଇ କୌଣସି ସୂଚନା ସରକାରୀ ଅଧିକାରୀମାନେ ଦେଇନାହାନ୍ତି । ଏପରି ଅବସ୍ଥାରେ କିପରି ଭାବେ ମଧ୍ୟାହ୍ନ ଭୋଜନ ପରିଚାଳନା କରାଯିବ ତାକୁ ନେଇ ଦ୍ୱନ୍ଦ୍ୱ ଦେଖାଯାଇଛି । ମଧ୍ୟାହ୍ନ ଭୋଜନ ପାଇଁ ଚାଉଳ ମିଳିବ ନା କିଣିବାକୁ ପଡ଼ିବ ତାହା ମଧ୍ୟ ଜଣାନାହିଁ । ରାସନ ସାମଗ୍ରୀ ମଧ୍ୟ ଶିକ୍ଷକମାନେ ନିଜ ହାତରୁ କିଣୁଛନ୍ତି । ଏହି ଅର୍ଥ କିପରି ମିଳିବ ତାକୁ ନେଇ ଚିନ୍ତା ବଢ଼ିଛି । ପିଲାଙ୍କ ସଂଖ୍ୟା ବୃଦ୍ଧି ସହ ପାଚିକା ସଂଖ୍ୟା ମଧ୍ୟ ବଢ଼ାଇବା ଆବଶ୍ୟକ ବୋଲି ସେ କହିଛନ୍ତି ।
ପାଚିକା ସଂଘର ଇଶାନୀ ଷଡ଼ଙ୍ଗୀଙ୍କ କହିବା କଥା, ସରକାର ଦାୟିତ୍ୱ ବୃଦ୍ଧି କରୁଛନ୍ତି, ହେଲେ ଆମର ଦାବି ଶୁଣିବାକୁ ପ୍ରସ୍ତୁତ ନୁହନ୍ତି । ସରକାର ଆମକୁ ସରକାରୀ କର୍ମଚାରୀର ମାନ୍ୟତା ଦିଅନ୍ତୁ । ଏଥିସହ ପିଲାଙ୍କ ସଂଖ୍ୟାକୁ ଦେଖି ଅଧିକ ପାଚିକା ଦିଅନ୍ତୁ ।
ପିଏମ୍ ପୋଷଣ ରାଜ୍ୟ ନୋଡାଲ୍ ଅଧିକାରୀ ଗିରିଶ ଚନ୍ଦ୍ର ସିଂହ କହିଛନ୍ତି, ବଜେଟ୍ରେ ମୁଖ୍ୟମନ୍ତ୍ରୀ ପୋଷଣ ଯୋଜନାରେ ନବମ ଓ ଦଶମ ଶ୍ରେଣୀ ପିଲାଙ୍କୁ ମଧ୍ୟାହ୍ନ ଭୋଜନ ଦେବା ସହ ଅତିରିକ୍ତ ଅଣ୍ଡା ଓ ପୋଷଣ ଯୁକ୍ତ ଲଡୁ଼ର ବ୍ୟବସ୍ଥା ରାଜ୍ୟ ସରକାର କରିଛନ୍ତି । ବଜେଟ୍ରେ ଟଙ୍କା ପାରିତ ହୋଇଥିଲେ ହେଁ ଏଯାବତ୍ ଆସିନାହିଁ । ସେପର୍ଯ୍ୟନ୍ତ ଜିଲ୍ଲା ଶିକ୍ଷା ଅଧିକାରୀଙ୍କ ପାଖରେ ଥିବା ଟଙ୍କାରେ ମଧ୍ୟାହ୍ନ ଭୋଜନ ପରିଚାଳନା କରିବାକୁ ନିର୍ଦ୍ଦେଶ ଦିଆଯାଇଛି ।
