ମାଲକାନଗିରି, ୨/୧୨(ଆପ୍ର ); ନିଜ ବାଡ଼ି ବଗିଚା ରେ ହୋଇଥିବା ଶାଗ, ଅମୃତଭଣ୍ଡା, ମୂଳା, ବାଇଗଣ ଆଦି ପନିପରିବା ଧରି ଗାଁ ରୁ ଆସି ମାଲକାନଗିରି ସହର ଦୈନିକ ବଜାର ରାସ୍ତା କଡ଼ ରେ ବିକ୍ରୀ କରୁ ଥିବା ଗରିବ ମହିଳା ଙ୍କ ଠାରୁ ଆରଏମସି ପକ୍ଷରୁ ଟ୍ୟାକ୍ସ ଆଦାୟ କରାଯାଉଛି । ଏହାକୁ ସହର ବାସୀ ଓ ବଜାର କମିଟି ନାପସନ୍ଦ କରିଛନ୍ତି।
ସୂଚନା ଅନୁଯାୟୀ ମାଲକାନଗିରି ଦୈନିକ ବଜାରର ସମ୍ମୁଖରେ ଥିବା ଫୁଟପାଥ ରେ ଜିଲ୍ଲାର ବିଭିନ୍ନ ଅଞ୍ଚଳରୁ ବସ ଓ ଅଟୋ ଯୋଗେ ସ୍ୱଳ୍ପ କିଛି ପରିବା ନେଇ ଗରିବ ଆଦିବାସୀ ମହିଳା ଓ ପୁରୁଷ ମାନେ ପରିବାର ପ୍ରତିପୋଷଣ ପାଇଁ ଘର ବାଡ଼ିରେ ଫଳିଥିବା ଫସଲ ଆଣି ବିକ୍ରୟ କରନ୍ତି। ତେବେ ଅତି ବେଶୀରେ ଜଣେ ଜଣେ ମହିଳା ଓ ପୁରୁଷ ୩୦୦ରୁ ୪୦୦ଟଙ୍କା ର ପରିବା ବିକୁଥିବା ବେଳେ ଲାଭ ବାବଦରେ ମାତ୍ର ୧୦୦ରୁ ୧୫୦ଟଙ୍କା ଲାଭ ଆସିବା କଷ୍ଟକର ହୋଇପଡିଥାଏ । ଏହାରି ମଧ୍ୟରେ ବସ ଓ ଅଟୋ ଭଡା ଦେଇ ସେମାନେ ବହୁ କଷ୍ଟରେ ସ୍ୱଳ୍ପ ରୋଜଗାର କରୁଥିବା ବେଳେ ସେମାନଙ୍କ ଉପରେ ଦାଉ ସାଧୁଛି ଆର ଏମ ସି ପକ୍ଷରୁ ଆଦାୟ କରାଯାଉଥିବା ମାର୍କେଟ କର। ନୀତିଦିନ ସେମନଙ୍କ ଠାରୁ ୧୦ରୁ ୨୦ଟଙ୍କା କର ଆଦାୟ କରାଯାଉଥିବା ବେଳେ ବାଧ୍ୟ ବଧତା ରେ ସେମାନେ ଏହି କର ଦେଉଛନ୍ତି। କିନ୍ତୁ ଏହି କର ଦେବା ପ୍ରତିବଦଳରେ ସେମାନଙ୍କୁ କୌଣସି ସୁବିଧା ମିଳୁନି। ନା ମୁଣ୍ଡ ଉପରେ ପକ୍କା ଛାତ ଅଛି ନା ତଳେ ପରିବା ରଖିବା ପାଇଁ ପିଣ୍ଡି ଅଛି। ନିଜେ ଘରୁ ଅଣୁଥିବା ପଲିଥିନ ଟାଣି ସେଥିରେ ସେମାନେ ପରିବା ରଖି ବିକ୍ରୟ କରି ଦୁଇ ପଇସା ରୋଜଗାର କରୁଛନ୍ତି। ତେବେ ଏହି ଲୋକଙ୍କ ପାଖରେ ବ୍ୟବସାୟ କରିବା ପାଇଁ ନିକିତି ମଧ୍ୟ କିଣିବାରେ ସମର୍ଥ ନଥିବା ବେଳେ ସେମାନେ ପୁରୁଣା ପ୍ରଥା ଅନୁଯାୟୀ ଭାଗ ବସାଇ ପରିବା ବିକୁଛନ୍ତି। ଏପରି ସ୍ଥିତିରେ ସେମାନଙ୍କ ଠାରୁ ଏପରି କର ଆଦାୟ ବୋଝ ଉପରେ ନଳିତା ବିଡା ସଦୃଶ ହୋଇଛି।
ତେବେ ଏନେଇ କର ଆଦାୟ କରୁଥିବା ଆର ଏମ ସି କର୍ମଚାରୀ ଙ୍କୁ ପଚାରିବାରୁ ସେ ଅଫିସ ପକ୍ଷରୁ ନିର୍ଦେଶ ଥିବାରୁ ରସିଦ ଦେଇ ଏହି କର ଆଦାୟ କରାଯାଇଛି । ଅପର ପକ୍ଷରେ ଏନେଇ ମାଲକାନଗିରି ଉପଜିଲ୍ଲାପାଳ ଦୁର୍ଯୋଧନ ଭୋଇଙ୍କୁ ପଚାରିବାରୁ ସେ ପ୍ରକାଶ କରିଛନ୍ତି ଯେ ଏପରି ଗରିବ ଆଦିବାସୀ ଲୋକଙ୍କ ଠାରୁ କର ଆଦାୟ କରିବା ଉଚିତ ନୁହେଁ। ତେବେ ଘଟଣା କୁ ନେଇ ସେ ଆଲୋଚନା କରି ପଦକ୍ଷେପ ନେବେ ବୋଲି ପ୍ରକାଶ କରିଛନ୍ତି। ତେବେ ଏନେଇ ଖବର ପାଇ ନିୟନ୍ତ୍ରିତ ବଜାର କମିଟି ସମ୍ପାଦକ ଦେବୀ ପ୍ରସାଦ ତ୍ରିପାଠୀ ଦୈନିକ ବଜାରରେ ପହଞ୍ଚି ଏହିପରି ଗରିବ ଚାଷୀ ଓ ମହିଳା ଙ୍କ ଠାରୁ କର ଆଦାୟ ନ କରିବା ପାଇଁ କର୍ମଚାରୀଙ୍କୁ ତାଗିଦ କରିଛନ୍ତି।
