ମୁମ୍ବାଇ,୨୯/୧୧: ମହାରାଷ୍ଟ୍ରରେ ମହାୟୁତିର ବମ୍ପର ବିଜୟ ହୋଇଛି । ହେଲେ କିଏ ମହାରାଷ୍ଟ୍ର ନୂଆ ମୁଖ୍ୟମନ୍ତ୍ରୀ ହେବ ସେ ଅଙ୍କ ଛିଡି ପାରୁନାହିଁ । ତେବେ କିଏ ହେବ ପରବର୍ତ୍ତୀ ମୁଖ୍ୟମନ୍ତ୍ରୀ ସେ ନେଇ ଆନୁଷ୍ଠାନିକ ଭାବେ କିଛି ଘୋଷଣା ହୋଇନାହିଁ । ଏହି ସସପେନ୍ସ ଉପରୁ ପରଦା ହଟାଇବା ଲାଗି ଗକକାଲି ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସମେତ ଉପମୁଖ୍ୟମନ୍ତ୍ରୀ ଅଜିତ ପାୱାର ଓ ଦେବେନ୍ଦ୍ର ଫଡନାଭିସ୍ ଦିଲ୍ଲୀରେ ଡେରା ପକାଇଥିଲେ । ସେଠାରେ ଗୃହମନ୍ତ୍ରୀ ଅମିତ ଶାହଙ୍କୁ ଭେଟି ୩ ଘଣ୍ଟା କାଳ ମାରାଥନ ବୈଠକ କରିଥଲେ । ଏହାପରେ ବି ସିଏମ ସସପେନ୍ସ ଲାଗି ରହିଛି ।
ମହାରାଷ୍ଟ୍ର ମୁଖ୍ୟମନ୍ତ୍ରୀ ପଦରୁ ଏକନାଥ ସିନ୍ଦେ ଇସ୍ତଫା ଦେଇ ସାରିଛନ୍ତି । ମହାୟୁତି ମେଣ୍ଟରୁ ହିଁ କେହି ଜଣେ ନୂଆ ମୁଖ୍ୟମନ୍ତ୍ରୀ ହେବେ । ହେଲେ କିଏ ହେବେ ତାହା ସ୍ପଷ୍ଟ ଜଣାପଡିନାହିଁ । ସିଏମ ସସପେନ୍ସ ଉପରୁ ପରଦା ହଟାଇବାକୁ ଗତକାଲି ମହାୟୁତି ମେଣ୍ଟର ନେତା ଏକନାଥ ସିନ୍ଦେଙ୍କ ସମେତ ଉପମୁଖ୍ୟମନ୍ତ୍ରୀ ଅଜିତ ପାୱାର ଓ ଦେବେନ୍ଦ୍ର ଫଡନାଭିସ୍ ଦିଲ୍ଲୀରେ ଗୃହମନ୍ତ୍ରୀ ଅମିତ ଶାହଙ୍କୁ ଭେଟିଥିଲେ । ପ୍ରାୟ ୩ ଘଣ୍ଟା ଧରି ଅମିତ୍ ଶାହଙ୍କ ସହ ବୈଠକ କରିଥିଲେ । ଆଲୋଚନା ସକାରାତ୍ମକ ଥିବା ସିନ୍ଦେ କହିଛନ୍ତି । ତେବେ ଖୁବଶୀଘ୍ର ମହାରାଷ୍ଟ୍ର ମୁଖ୍ୟମନ୍ତ୍ରୀ ନାମ ଘୋଷଣା ହେବ ବୋଲି ଅନୁମାନ କରାଯାଉଛି ।
ସେହିପରି ଦେବେନ୍ଦ୍ର ଫଡନାଭିସ୍ ମିଡିଆ ସହ ଆଲେଚନା କରି କହିଛନ୍ତି, ଆମ ମହାୟୁତି ଗଠବନ୍ଧନରେ କୌଣସି ମତଭେଦ ନାହିଁ। ଆମେ ସାମୁହିକ ଭାବେ ନିଷ୍ପତ୍ତି ନେବୁ । ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ପଦବୀ ନେଇ ସାମୂହିକ ନିଷ୍ପତ୍ତି ନେବୁ ବୋଲି ଘୋଷଣା କରିଥିଲୁ । କିଛି ଲୋକଙ୍କ ମନରେ ସନ୍ଦେହ ଅଛି ମାତ୍ର ଏକନାଥ ସିନ୍ଦେ ସ୍ପଷ୍ଟ କରିଛନ୍ତି ଖୁବଶୀଘ୍ର ଆଉ ଥରେ ବୈଠକ ହେବ ଏବଂ ଆମ ମୁଖମନ୍ତ୍ରୀଙ୍କ ନାମ ଫାଇନାଲ ହେବ ।
ପ୍ରକାଶ ଥାଉ କି, ଗତ ନଭେମ୍ବର ୨୦ ତାରିଖରେ ମହାରାଷ୍ଟ୍ର ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା । ୨୩ତାରିଖରେ ଫଳାଫଳ ପ୍ରକାଶ ପାଇଥିଲା । ମହାରାଷ୍ଟ୍ରରେ ୨୮୮ ସଦସ୍ୟ ବିଶିଷ୍ଟ ବିଧାନସଭାର ୧୩୨ ଆସନ ସହ ବିଜେପି ସଂଖ୍ୟାଗରିଷ୍ଠତା ହାସଲ କରିଛି । ବିଜେପି ନେତୃତ୍ବାଧୀନ ମହାୟୁତି ୨୩୫ ଆସନ ଜିତିଛି । ଏକନାଥ ସିନ୍ଦେଙ୍କ ନେତୃତ୍ବାଧୀନ ଶିବସେନା ଓ ଅଜିତ ପାୱାରଙ୍କ ନେତୃତ୍ବାଧୀନ ଏନସିପି ଯଥାକ୍ରମେ ୫୭ ଓ ୪୧ଟି ଆସନ ଜିତିଥିଲେ । ଭାଜପା ପାଖରେ ୨୧ରୁ୨୨ ମନ୍ତ୍ରୀ ପଦ, ଶିବସେନାକୁ ୧୦ରୁ ୧୨ ମନ୍ତ୍ରଣାଳୟ ଏବଂ ଅଜିତ ପାୱାରଙ୍କ ଏନସିପିକୁ ପାଖାପାଖି ୮ରୁ୯ଟି ମନ୍ତ୍ରଣାଳୟ ମିଳିପାରେ ।
