ନୂଆଦିଲ୍ଲୀ:  ‘ଏଲ ଆଣ୍ଡ ଟି’ ଅଧ୍ୟକ୍ଷ ସୁବ୍ରମଣ୍ୟନ କର୍ମଚାରୀମାନେ ସପ୍ତାହକୁ ୯୦ ଘଣ୍ଟା କାମ କରିବା ଦରକାର ବୋଲି କହିବା ପରେ ବିବାଦ ଆରମ୍ଭ ହୋଇଛି । କେହି କେହି ତାଙ୍କର ଏହି ମନ୍ତବ୍ୟକୁ ସମର୍ଥନ କରିଥିବା ବେଳେ କେହି ଏହାକୁ ବିରୋଧ  ମଧ୍ୟ କରିଛନ୍ତି  ।  ଆଉ ଏହି ତାଲିକାରେ ଯୋଡ଼ି ହୋଇଛନ୍ତି ବଜାଜ ଅଟୋର ଏମ୍‌ଡି ରାଜୀବ ବଜାଜ । ରାଜୀବ ବଜାଜ କହିଛନ୍ତି ଯେ, ଯଦି ଆପଣ ସପ୍ତାହରେ ୯୦ ଘଣ୍ଟା କାମ ପରମ୍ପରା ଚାହାନ୍ତି, ତେବେ ଶୀର୍ଷରୁ ଆରମ୍ଭ କରନ୍ତୁ । ଅନ୍ୟପଟେ Helios କ୍ୟାପିଟାଲର ଫାଉଣ୍ଡର ସମୀର ଅରୋରା କହିଛନ୍ତି, ସିଇଓ ହେବା ପାଇଁ କଠିନ ପରିଶ୍ରମ କରିବା ଆବଶ୍ୟକତା ରହିଛି । କୌଣସି କମ୍ପାନିର ପ୍ରମୋଟର କିମ୍ୱା ସିଇଓ ଯାହା କିଛି କରନ୍ତି ତାହା ହାସଲ କରିବା ପାଇଁ ସେମାନେ କଠିନ ପରିଶ୍ରମ କରିଛନ୍ତି ।

 ଦେଶରେ ୱାର୍କ-ଲାଇଫ୍ ବାଲାନ୍ସକୁ ନେଇ ବିତର୍କ ବଢିବାରେ ଲାଗିଛି । ପ୍ରଥମେ ଇନଫୋସିସ୍ ସହ ପ୍ରତିଷ୍ଠାତା ନାରାୟଣ ମୂର୍ତ୍ତି ଏହି ଚର୍ଚ୍ଚା ଆରମ୍ଭ କରିଥିଲେ । ଏକ କାର୍ଯ୍ୟକ୍ରମରେ ନାରାୟାଣ ମୂର୍ତ୍ତି କହିଥିଲେ, ଭାରତ ଯୁବପିଢି ଦେଶର ପ୍ରଡକ୍ଟିଭିଟି ବଢାଇବା ପାଇଁ ସପ୍ତାହକୁ ୭୦ ଘଣ୍ଟା କାମ କରିବା ଦରକାର । ପରେ ଏଲ୍ ଆଣ୍ଡ ଟି ଅଧ୍ୟକ୍ଷ ଏସ୍ ଏନ୍ ସୁବ୍ରମଣ୍ୟନ କର୍ମଚାରୀମାନେ ସପ୍ତାହକୁ ୯୦ ଘଣ୍ଟା କାମ କରିବା ଦରକାର ବୋଲି କହିଛନ୍ତି । ଏପରି କି ରରିବାର କାମ କରିବା ସପକ୍ଷରେ ବୟାନ ଦେଇଛନ୍ତି ସୁବ୍ରମଣ୍ୟମ । ସୁବ୍ରମଣ୍ୟନଙ୍କ ଏହି ବୟାନକୁ ନେଇ ଏବେ ଜୋରଦାର ସମାଲୋଚନାର ଶିକାର ହୋଇଛନ୍ତି । 

ସିଏନବିସି ଟିଭି ୧୮କୁ ରାଜୀବ ବଜାଜ କହିଛନ୍ତି, 'ଯଦି ଆପଣ ସପ୍ତାହରେ ୯୦ ଘଣ୍ଟା କାମ ଚାହାଁନ୍ତି, ତେବେ ଶୀର୍ଷରୁ ଆରମ୍ଭ କରନ୍ତୁ । କାମରେ ଘଣ୍ଟା ସଂଖ୍ୟା ଗୁରୁତ୍ୱ ରଖେନି, କାମର ଗୁଣବତ୍ତା ଗୁରୁତ୍ୱ ରଖେ । ଆମକୁ ପୂର୍ବ ଅପେକ୍ଷା ଏବେ ଅଧିକ ଦୟାଳୁ, ସୌମ୍ୟ ଦୁନିଆର ଆବଶ୍ୟକତା ରହିଛି ।' ନେତୃତ୍ୱରେ ଥିବା ତ୍ରୁଟିକୁ ଦୂର କରିବା ଉପରେ ଗୁରୁତ୍ୱ ଦେଇ ଅସୁବିଧା ସବୁବେଳେ ଶୀର୍ଷ ସ୍ତରରେ ରହିଥାଏ ବୋଲି କହିଛନ୍ତି  ରାଜୀବ ବଜାଜ ।  ଯଦି  ଜଣେ ବ୍ୟକ୍ତି ସପ୍ତାହରେ ୭୦ କି ୯୦ ଘଣ୍ଟା କାମ କରୁଥିବ, ତଥାପି ତାର ଜୀବନ ଅନ୍ୟ ସବୁ ଦିଗ-ପରିବାର, ସ୍ୱାସ୍ଥ୍ୟ ଏବଂ କଲ୍ୟାଣ ସହ ଜଡ଼ିତ ରହିଥାଏ । ଏହାକୁ ଅଣଦେଖା କଲେ ବଡ଼ ମୂଲ୍ୟ ଦେବାକୁ ପଡ଼ିବ ବୋଲି କହିଛନ୍ତି ରାଜୀବ ବଜାଜ ।