ବଡବିଲ, ୧୫।୧୦ :  ସିଏମସି ଭ୍ୟାନରୁ ଟଙ୍କା ଲୁଟ୍ ପାଇଁ ଆସିଥିଲେ ଦୁର୍ବୃତ୍ତ। ଏଥିରେ ବିଫଳ ହୋଇ ସିକ୍ୟୁରିଟି ଗାର୍ଡକୁ ଆକ୍ରମଣ କରି ତାଙ୍କଠାରୁ ଅସଲି ବନ୍ଧୁକ ଛଡ଼ାଇ ନେଇଛନ୍ତି। ଯିବା ବେଳେ ଦୁର୍ବୃତ୍ତମାନେ ଆଣିଥିବା ନିଜର ନକଲି ବନ୍ଧୁକକୁ ଛାଡ଼ିଦେଇ ପଳାଇଛନ୍ତି । କେନ୍ଦୁଝର ଜିଲ୍ଲା ଯୋଡ଼ା ସହରରେ ଏଭଳି ଏକ ଘଟଣା ଦେଖିବାକୁ ମିଳିଛି। 

 ଯୋଡ଼ା ଥାନା କମାରଯୋଡ଼ା ନିକଟରେ ଏକ କ୍ୟାସ ମ୍ୟାନେଜମେଣ୍ଟ ସର୍ଭିସ୍ (CMS) ଗାଡ଼ିରେ ଟଙ୍କା ନେଇ ୪ ଜଣ କର୍ମଚାରୀ ଜୁରୁଡ଼ି  ଯାଉଥିଲେ । ତେବେ କମାରଯୋଡ଼ା ନିକଟରେ ଗାଡ଼ିକୁ ରଖି ୨ ଜଣ କର୍ମଚାରୀ ରିଲିଆନ୍ସ ସ୍ମାର୍ଟ ପଏଣ୍ଟରୁ କ୍ୟାସ୍ ଆଣିବା ପାଇଁ ଯାଇଥିଲେ।  ଏହି ସମୟରେ  ୩ ଜଣ ଦୁର୍ବୃତ୍ତ ମାରଣାସ୍ତ୍ର ଧରି ଭ୍ୟାନରୁ ଲୁଟ୍ ଉଦ୍ୟମ କରିଥିଲେ । ବନ୍ଧୁକ ଓ ଛୁରୀ ଦେଖାଇ ଲୁଟ ଉଦ୍ୟମ ବେଳେ  ସିକ୍ୟୁରିଟି ଗାର୍ଡ ସେମାନଙ୍କୁ ବାଧା ଦେବାରୁ ଦୁର୍ବୃତ୍ତମାନେ ତାଙ୍କୁ ଲୁହା ରଡ୍ ରେ ଆକ୍ରମଣ କରିଥିଲେ ।  ତାଙ୍କ ଠାରୁ ଡବଲ ବ୍ୟାରେଲ ଗନ୍ ଛଡ଼ାଇ ନେଇଥିଲେ । ଏହି ସମୟରେ ସେଠାରେ ଭିଡ଼ ଏକତ୍ରିତ ହେବାରୁ ଦୁର୍ବୃତ୍ତମାନେ ବାଇକ୍ ଯୋଗେ ଚମ୍ପଟ ମାରିଥିଲେ । ତେବେ ସେମାନେ ସାଥିରେ ଆଣିଥିବା ନକଲି ବନ୍ଧୁକ ସହ ଛୁରୀ , ଖଣ୍ଡା ଆଦି ଛାଡ଼ିଦେଇ ପଳାଇଥିଲେ । ଦୁର୍ବୃତ୍ତଙ୍କ ମାଡ଼ରେ  ସିକ୍ୟୁରିଟି ଗାର୍ଡ ବଳରାମ ପୃଷ୍ଟି ଆହତ ହୋଇ ନିକଟସ୍ଥ ଯୋଡ଼ା ଟାଟା ଷ୍ଟିଲ ମେଡିକାଲରେ ଭର୍ତ୍ତି ହୋଇଛନ୍ତି । ସୂଚନା ପାଇ ଯୋଡ଼ା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଦୁର୍ବୃତ୍ତମାନେ ଜୁରୁଡ଼ି ପଟକୁ ଫେରାର ହୋଇଥିବା କୁହାଯାଉଛି । ପୋଲିସ୍ ବିଭିନ୍ନ ସ୍ଥାନରେ ନାକାବନ୍ଦି କରି ତଲାସୀ ଜାରୀ ରଖିଛି ।