ସମ୍ବଲପୁର, ୧୭। ୦୫: ମା' ସମଲେଶ୍ଵରୀ ମନ୍ଦିରରେ ପୁଣିଥରେ ଆରମ୍ଭ ହୋଇଛି ଲାଇଟ୍ ଓ ସାଉଣ୍ଡ ଶୋ’। ଗତ ପ୍ରାୟ ୬ ମାସ ଧରି ଏହି ଶୋ' ବନ୍ଦ ରହିବା ପରେ ପୁଣିଥରେ ଆରମ୍ଭ ହୋଇଛି। ଏ ନେଇ ସମଲେଶ୍ଵରୀ ମନ୍ଦିର ଟ୍ରଷ୍ଟବୋର୍ଡ ସଭାପତି ସଞ୍ଜୟ ବାବୁ ସୂଚନା ଦେଇଛନ୍ତି। ପୁଣିଥରେ ଲାଇଟ୍ ଓ ସାଉଣ୍ଡ ଶୋ’ ଆରମ୍ଭ ହେବା ପରେ ଏହାକୁ ଜନସାଧାରଣରେ ସ୍ବାଗତ କରାଯାଇଛି। ଗତକାଲି ସନ୍ଧ୍ୟାରେ ଏହି ଶୋ’ ଆରମ୍ଭ ହେବାପରେ ଏହାକୁ ଦେଖିବା ପାଇଁ ବହୁ ଶ୍ରଦ୍ଧାଳୁ ମନ୍ଦିର ପରିସରରେ ଉପସ୍ଥିତ ଥିଲେ।
ସମଲେଇ ପ୍ରକଳ୍ପ ଲୋକାର୍ପଣ ସହ ଗତ ୨୦୨୪ ଜାନୁଆରୀ ୨୭ ତାରିଖରେ ସମଲେଶ୍ଵର ମନ୍ଦିରରେ ଲାଇଟ୍ ଓ ସାଉଣ୍ଡ ଶୋ' ଆରମ୍ଭ ହୋଇଥିଲା। ତେବେ ବିଭିନ୍ନ ସମୟରେ ସମସ୍ୟା କାରଣରୁ ଏହା ବନ୍ଦ ରହିଥିଲା। ବର୍ଷା, ଅତ୍ୟଧିକ ଖରା ଓ ଝଡ଼ ତୋଫାନରେ ଯେଭଳି ଏହି ଶୋ’ ପ୍ରସ୍ତୁତ କରୁଥିବା ଯନ୍ତ୍ରପାତି ନଷ୍ଟ ନହୁଏ ସେନେଇ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଛି। ଏଥିପାଇଁ ସ୍ବତନ୍ତ୍ର ଭାବେ କଣ୍ଟ୍ରୋଲ ରୁମ୍ ନିର୍ମାଣ କରାଯିବା ସହ ପ୍ରୋଜେକ୍ଟର୍ ଗୁଡ଼ିକର ସୁରକ୍ଷା ପାଇଁ ମଧ୍ୟ ବ୍ୟବସ୍ଥା ଗ୍ରହଣ କରାଯାଇଛି ବୋଲି ଶ୍ରୀ ବାବୁ ସୂଚନା ଦେଇଛନ୍ତି।
ମା' ସମଲେଶ୍ଵରୀଙ୍କ ମନ୍ଦିରରେ ଗତ ୨୦୨୧ ସେପଟେମ୍ବର ୧୧ ତାରିଖରୁ ଆରମ୍ଭ ହୋଇଥିଲା ସାଉଣ୍ଡ ଓ ଲାଇଟ୍ ଶୋ ପ୍ରକଳ୍ପ। ସାଢେ ୭ କୋଟି ବ୍ୟୟରେ ଓଟିଡିସି ପକ୍ଷରୁ ଏହି ପ୍ରକଳ୍ପ କାର୍ଯ୍ୟକାରୀ କରାଯାଇଥିଲା। ଏଥିରେ ମାଁଙ୍କ ପୌରାଣିକ କଥାବସ୍ତୁରୁ ଆରମ୍ଭ କରି ସମ୍ବଲପୁର ତଥା ସମଗ୍ର ପଶ୍ଚିମ ଓଡିଶାର ଗୌରବମୟ ଇତିହାସକୁ ପ୍ରଦର୍ଶିତ କରିବା ନେଇ ପ୍ରକଳ୍ପର ପରିକଳ୍ପନା କରାଯାଇଥିଲା। କୋଣାର୍କ ମନ୍ଦିର ଭଳି ଏଥିରେ ମଧ୍ୟ ମନ୍ଦିର ଓ ଏହା ଚତୁଃପାର୍ଶ୍ଵରେ ଆଲୋକ ଫୋକସ୍ ସହିତ ବିଭିନ୍ନ ଭାଷାରେ ଐତିହର ବର୍ଣ୍ଣନା କରାଯାଉଥିଲା। ହେଲେ ମାତ୍ର ଦେଢ଼ ବର୍ଷ ନ ଚାଲୁଣୁ ସମଲେଇ ପ୍ରକଳ୍ପର ନିର୍ମାଣ କାମ ପାଇଁ ଏହା ବନ୍ଦ ହୋଇଯାଇଥିଲା। ପରେ ୨୦୨୪ ଜାନୁଆରୀ ୨୭ ତାରିଖରେ ପୁଣି ଥରେ ଆରମ୍ଭ ହୋଇଥିଲା। କିନ୍ତୁ ଗତ ନୂଆଁଖାଇ ଠାରୁ ଯାନ୍ତ୍ରୀକ ତ୍ରୁଟି ପାଇଁ ଏହା ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା। ଯାହାକି ପୁଣିଥରେ ଚାଲୁ ହୋଇଛି।
