ନୂଆଦିଲ୍ଲୀ,୧୭।୫: ପାକିସ୍ତାନ ପାଇଁ ଗୁପ୍ତଚରୀ କରିବା ଅଭିଯୋଗରେ ହରିୟାଣାର ୟୁଟ୍ୟୁବର ଜ୍ୟୋତି ମାଲହୋତ୍ରାଙ୍କୁ ଗିରଫ କରାଯାଇଛି। ଏହି ମାମଲାରେ ପଞ୍ଜାବର ମଲେରକେଟଲା ଓ ହରିୟାଣାର ମୋଟ ୬ ପାକିସ୍ତାନୀ ଗୁପ୍ତଚରଙ୍କୁ ଗିରଫ କରାଯାଇ ସାରିଛି। ଏବେ ଏହି ମାମଲାରେ ବଡ଼ ଖୁଲାସା ହୋଇଛି। ଜ୍ୟୋତି ମାଲହୋତ୍ରା ଇନଷ୍ଟାଗ୍ରାମ୍ ଆକାଉଣ୍ଟ ଖୋଜିବା ପରେ ସାମାନାକୁ ଆସିଛି ଏକ ବଡ଼ କଥା। ତାହା ହେଲା ଜ୍ୟୋତି ପହଲଗାମ୍ ଆତଙ୍କୀ ହମଲାର ତିନି ମାସ ପୂର୍ବରୁ ଶ୍ରୀନଗର ଯାଇଥିଲେ। ଏହି ସମୟରେ ସେ ପହଲଗାମ୍ ମଧ୍ୟ ବୁଲିଥିଲେ। ଜାନୁଆରୀରେ ଶ୍ରୀନଗର ବୁଲିବା ପରେ ମାର୍ଚ୍ଚରେ ପାକିସ୍ତାନ ଯାଇଥିଲେ। ଅଭିଯୋଗ ରହିଛି ଯେ, ଜ୍ୟୋତି ପାକିସ୍ତାନ ହାଇକମିଶନରେ କାମ କରୁଥିବା ଦାନିଶ ନାମକ ଜଣେ ଅଧିକାରୀଙ୍କ ସମ୍ପର୍କରେ ଥିଲେ। ଏହି ଅଧିକାରୀ ଜ୍ୟୋତିଙ୍କୁ ପାକିସ୍ତାନ ପଠାଇଥିଲେ।
ପୋଲିସ ପଚରା ଉଚରା ବେଳେ ଜ୍ୟୋତି ସ୍ବୀକାର କରିଛନ୍ତି ଯେ, ୨୦୨୩ ରେ ସେ ପାକିସ୍ତାନ ହାଇକମିଶନ ଯାଇଥିଲେ। ତାଙ୍କୁ ପାକିସ୍ତାନ ଯିବା ପାଇଁ ଭିସା ଦରକାର ଥିଲା। ସେଠାରେ ତାଙ୍କର ସାକ୍ଷାତ ଅହସାନ-ଉର-ରହିମ ଓରଫ୍ ଦାନିଶଙ୍କ ସହ ହୋଇଥିଲା। ଏହି ସମୟରେ ସେ ଦାନିଶଙ୍କ ମୋବାଇଲ ନମ୍ବର ନେଇଥିଲେ ଏବଂ ତାଙ୍କ ସହ କଥା ହେବା ଆରମ୍ଭ କରିଥିଲେ। ଏହାପରେ ଜ୍ୟୋତି ଦୁଇଥର ପାକିସ୍ତାନ ଯାଇଥିଲେ। ଦାନିଶଙ୍କ କହିବା ପରେ ସେ ଅଲ୍ଲି ଅହଓ୍ବାନଙ୍କୁ ଭେଟିଥିଲେ। ଅଲ୍ଲି ପାକିସ୍ତାନରେ ଜ୍ୟୋତିଙ୍କ ରହିବା ଓ ବୁଲିବାର ବନ୍ଦୋବସ୍ତ କରିଥିଲେ।
ଅଲ୍ଲୀ ତା ପରେ ଜ୍ୟୋତିଙ୍କୁ ପାକିସ୍ତାନୀ ସିକ୍ୟୁରିଟି ଏଜେନ୍ସିର ଅଧିକାରୀଙ୍କ ସହ ସାକ୍ଷାତ କରିଥିଲେ। ଏହି ସମୟରେ ସେ ଶାକିର ଓ ରାଣା ଶହବାଜ୍ ନାମକ ଦୁଇ ଲୋକଙ୍କୁ ଭେଟିଥିଲେ। ଶାକିରଙ୍କ ମୋବାଇଲ ନମ୍ବର ମଧ୍ୟ ନେଇଥିଲେ, ଯାହାକୁ ସେ ଜଟ୍ ରାନ୍ଧଓ୍ବା ନାମରେ ସେଭ୍ କରିଥିଲେ। ଯାହାଫଳରେ ଯେପରି ତାଙ୍କୁ କେହି ସନ୍ଦେହ କରିପାରିବେନି। ଭାରତ ଆସିବା ପରେ ସ୍ନାପଚାଟ୍, ହ୍ବାଟସଆପ୍ ଓ ଟେଲିଗ୍ରାମ୍ ଭଳି ସୋସିଆଲ ମିଡିଆ ପ୍ଲାଟଫର୍ମ ଜରିଆରେ ଏହି ଲୋକଙ୍କ ସହ ଯୋଗଯୋଗରେ ଥିଲେ। ଦେଶ ବିରୋଧି ସୂଚନା ମଧ୍ୟ ଦେଉଥିଲେ। ଏହି ସମୟ ମଧ୍ୟରେ ଜ୍ୟୋତି ପାକ୍ ହାଇକମିଶନ୍ ଅଧିକାରୀ ଦାନିଶଙ୍କ ସହ ଲଗାତାର ସମ୍ପର୍କରେ ଥିଲେ।
ହିସାର ପୋଲିସ ଶନିବାର ଜ୍ୟୋତିଙ୍କୁ କୋର୍ଟରେ ହାଜର କରି ୫ ଦିନର ରିମାଣ୍ଡରେ ପଠାଇଛି। ୧୫ ମଇରେ ଡିଏସ୍ପି ଜିତେନ୍ଦ୍ର କୁମାରଙ୍କ ନେତୃତ୍ବରେ ଏକ ଟିମ୍ ଜ୍ୟୋତିଙ୍କୁ ତାଙ୍କ ଘରୁ କଷ୍ଟଡିରେ ନେଇଥିଲା। ତାଙ୍କ ବିରୋଧରେ ହିସାର ସିଭିଲ ଲାଇନ୍ ଥାନାରେ ମାମଲା ରୁଜୁ କରାଯାଇଛି। କେନ୍ଦ୍ରୀୟ ଏଜେନ୍ସି ଜ୍ୟୋତିଙ୍କୁ ପଚରା ଉଚରା କରୁଛି। ହିସାର ପୋଲିସର କହିବା ଅନୁସାରେ, ଜ୍ୟୋତି ପାକିସ୍ତାନ ଗୁଇନ୍ଦା ଏଜେନ୍ସି ଯୋଗାଯୋଗରେ ଥିଲେ। ସୋସିଆଲ ମିଡିଆ ମାଧ୍ୟମରେ ଭାରତର ଗୋପନୀୟ ତଥ୍ୟ ପଠାଉଥିଲେ। ତିନି ଥର ପାକିସ୍ତାନ ଯାତ୍ରା କରିସାରିଥିବା ଜ୍ୟୋତିଙ୍କ ଉପରେ ଭାରତୀୟ ସୁରକ୍ଷା ଏଜେନ୍ସିର ନଜର ଥିଲା।
