ପୁରୀ, ୨୯।୦୬ : ଦଇତା କୂଳରେ ଆମର ଜନ୍ମ। ଶ୍ରୀମନ୍ଦିରରେ ମହାପ୍ରଭୁଙ୍କ ସେବା କରିବା ଆମ ଧର୍ମ। ଏବେ ସିନା ବଡ଼ ଠାକୁରଙ୍କ ପୂଜା, ନୀତିକାନ୍ତି ବିଷୟରେ ଆମେ ଅଜ୍ଞ। ହେଲେ ଭବିଷ୍ୟତରେ ନିଶ୍ଚିତ ସମର୍ପଣ ଭାବ ନେଇ ଆମେ ଆସିବୁ ଶ୍ରୀମନ୍ଦିର। ଆଉ ଜୀବନସାରା କରିବୁ ମହାପ୍ରଭୁଙ୍କର ସେବା।
ଏବେ ଶ୍ରୀମନ୍ଦିର ଅଣସର ଘରେ ଚାଲିଛି ମହାପ୍ରଭୁଙ୍କ ଗୁପ୍ତ ସେବା। ଆଉ ଦଇତା କୂଳର ପରମ୍ପରା ଅନୁଯାୟୀ, ମହାପ୍ରଭୁଙ୍କ ଗୁପ୍ତ ସେବାରେ ଯୋଗ ଦେବା ପାଇଁ ଶ୍ରୀମନ୍ଦିର ଯାଉଛନ୍ତି କୁନି ଦଇତାପତି। ଜନ୍ମ ହେବାର ୨୧ ଦିନ ପରେ ଏମାନେ ଦଇତା କୂଳର ଭଗାରୀ ଭାବରେ ଗଣତି ହୁଅନ୍ତି। ଆଉ ଅଣସର ଘରେ ମହାପ୍ରଭୁଙ୍କ ଚିକିତ୍ସା ଚାଲୁଥିବା ସମୟରେ ଫୁଲୁରି ତେଲ ଲାଗି ପରଦିନ ଠାରୁ ଏହି କୁନି ଦଇତାପତି ମାନେ ଗୁପ୍ତ ସେବାରେ ଯୋଗ ଦେଇଥାନ୍ତି।
ଏତେ କମ୍ ବୟସରେ ମହାପ୍ରଭୁଙ୍କ ସେବା ପୂଜା, ନୀତିକାନ୍ତି ବିଷୟରେ କୁନି ଦଇତାପତିମାନେ ଅଜ୍ଞ ଥିଲେ ମଧ୍ୟ ଭବିଷ୍ୟତରେ ସମର୍ପଣ ମନୋଭାବ ନେଇ ମହାପ୍ରଭୁଙ୍କ ସେବା କରିବେ ବୋଲି ତାଙ୍କ ପରିବାର ଲୋକେ ଆଶା ରଖିଛନ୍ତି। ଆଜି ପ୍ରଥମ ଥର ଶ୍ରୀମନ୍ଦିର ଅଣସର ଘରକୁ ଯାଇ ମହାପ୍ରଭୁଙ୍କ ସେବାରେ ନିୟୋଜିତ ହୋଇଛନ୍ତି ଦୁଇ କୁନି ଦଇତାପତି ସେବାୟତ ଗୌରବ ଦାସ ମହାପାତ୍ର ଓ ଶ୍ରୀୟାନ। ସେମାନେ ମହାପ୍ରଭୁଙ୍କୁ ଭେଟି ଆକାରରେ ରୂପା କଏନ୍ ଦାନ କରିବା ସହ ଶ୍ରୀଜିଉଙ୍କ ସୁସ୍ଥତା ଲାଗି ଓଷ ଲାଗି କରିଛନ୍ତି।