ନବରଙ୍ଗପୁର : ନବରଙ୍ଗପୁର ଜିଲ୍ଲାରେ ଖରିଫ ଧାନମଣ୍ଡି ସରିଛି। ଜିଲ୍ଲାର ବିଭିନ୍ନ ମଣ୍ଡିରୁ ୨୪ ଲକ୍ଷ ୯୩ ହଜାର ୪୪୪ କୁଇଣ୍ଟାଲ ଧାନ ସଂଗ୍ରହ କରାଯାଇଛି। ମାତ୍ର ୫୪ ଚାଷୀଙ୍କ ଟୋକନ୍ ରଦ୍ଧ ହୋଇ ଯାଇଛି। ରଦ୍ଧ ଟୋକନ୍ ନବୀକରଣ ପାଇଁ ବିଭାଗୀୟ କାର୍ଯ୍ୟାଳୟକୁ ପଠାଯାଇଛି।
ଟୋକନ୍ ନବୀକରଣ ହେଲେ ଏହି ଚାଷୀମାନଙ୍କ ପାଖରୁ ଧାନ କିଣାଯିବ ବୋଲି ଜିଲ୍ଲା ଯୋଗାଣ ଅଧିକାରୀ ଅଜୟ କୁମାର ମଲ୍ଲିକ କହିଛନ୍ତି। ଜିଲ୍ଲାରେ ଚଳିତ ଖରିଫ୍ ମଣ୍ଡି ପାଇଁ ୨୫ ଲକ୍ଷ ୭୬ ହଜାର ୮୧୯ କୁଇଣ୍ଟାଲ ଧାନ ସଂଗ୍ରହ ଲକ୍ଷ୍ୟ ଧାର୍ଯ୍ୟ ହୋଇ ଥିଲା। ସେଥି ମଧ୍ୟରୁ ପ୍ରାୟ ୨୫ ଲକ୍ଷ କୁଇଣ୍ଟାଲ ଧନ ସଂଗ୍ରହ କରାଯାଇଛି । ମୋଟ ୪୨ ହଜାର ୪୧୧ ଯୋଗ୍ୟ ଚାଷୀଙ୍କ ମଧ୍ୟରୁ ୪୦ ହଜାର ୩୫୯ ଚାଷୀଙ୍କ ଠାରୁ ଏହା ଧାନ କିଣା ଯାଇଛି।
ବର୍ତ୍ତମାନ ସୁଦ୍ଧା ୪୦ ହଜାର ୧୭୮ ଚାଷୀଙ୍କ ଆକାଉଣ୍ଟକୁ ସରକାର ୫୬୮ କୋଟି ୫୬ ଲକ୍ଷ ୩୪ ହଜାର ୩୮୫ ଟଙ୍କା ପୈଠ କରିଛନ୍ତି। ବଳକା ୧୮୧ ଚାଷୀଙ୍କ ଆକାଉଣ୍ଟକୁ ଖୁବ୍ଶୀଘ୍ର ଟଙ୍କା ଦିଆଯିବ ବୋଲି ଶ୍ରୀ ମଲ୍ଲିକ କହିଛନ୍ତି। ଖରିଫ ଋତୁରେ ୪୨ ହଜାର ୪୧୧ ଚାଷୀଙ୍କ ମଧ୍ୟରୁ ୨ ହଜାର ୫୨ ଚାଷୀ ମଣ୍ଡିକୁ ଧାନ ଆଣି ନାହାନ୍ତି। ସେଥି ମଧ୍ୟରୁ ମାତ୍ର ୫୪ ଚାଷୀଙ୍କ ଟୋକନ୍ ରଦ୍ଧ ହୋଇ ଥିଲା। ଟୋକନ୍ ନବୀକରଣ ପରେ ସେମାନଙ୍କ ପାଖରୁ ଧାନ ସଂଗ୍ରହ କରାଯିବ ବୋଲି ବିଭାଗ କହିଛି। ଅନ୍ୟପକ୍ଷେ ରବି ଋତୁ ପାଇଁ ଚାଷୀଙ୍କ ପଞ୍ଜୀକରଣ ଆରମ୍ଭ ହୋଇଛି ।
