ପାପଡ଼ାହାଣ୍ଡି,୩୦ା୩(ଆପ୍ର): ତାତି ଯେତିକି ବଢୁଛି, ଭୂତଳ ଜଳସ୍ତର ସେତିକି କମିବାରେ ଲାଗିଛି । ଏହି କାରଣରୁ କୂଅ, ନଳକୂଅ, ନାଳ ଓ ପୋଖରୀ ଶୁଖିବାରେ ଲାଗିଛି । ଏଥିଯୋଗୁ ପାପଡ଼ାହାଣ୍ଡି ବ୍ଲକ୍ ଡେଙ୍ଗାଗୁଡ଼ା ପଞ୍ଚାୟତ ବିରିଗୁଡ଼ା ଭତ୍ରା ସାହିରେ ଖରା ଆରମ୍ଭରୁ ପାନୀୟଜଳ ସମସ୍ୟା ଦେଖାଦେଇଛି । ଏଠାରେ ଥିବା ଗୋଟିଏ ନଳକୂଅ ଉପରେ ନିର୍ଭର କରୁଛନ୍ତି ୮୦ ପରିବାର । ଆବଶ୍ୟକ ପାଣି ମିଳୁନଥିବାରୁ ଡହଳବିକଳ ହେଉଛନ୍ତି ସାହିବାସିନ୍ଦା । ସାହିରେ ଆଉ ଏକ ନଳକୂଅ ଖୋଲିବା ପାଇଁ ସେମାନେ ଦାବି କରିଛନ୍ତି ।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ସାହିରେ ବିଭିନ୍ନ ସଂପ୍ରଦାୟର ୮୦ ପରିବାର ରହୁଛନ୍ତି । ଲୋକସଂଖ୍ୟା ୨୫୦ରୁ ଅଧିକ । ଶତାଧିକ ଲୋକଙ୍କ ପାଇଁ ଏଠାରେ ଗୋଟିଏ ନଳକୂଅ ରହିଛି । ଖରା ଆରମ୍ଭ ହୋଇଯାଇଥିବାରୁ ଭୂତଳ ଜଳସ୍ତର କମିଯାଇଛି । ଏହି କାରଣରୁ ଶତାଧିକ ଲୋକଙ୍କ ପାଇଁ ନଳକୂଅର ପାଣି ନିଅଣ୍ଟ ପଡୁଛି । ରାତିରେ ପାହିଲେ ନଳକୂଅ ନିକଟରେ ମହିଳାଙ୍କ ଭିଡ଼ ଲାଗୁଛି । ଦୀର୍ଘ ସମୟ ଅପେକ୍ଷା କରିବା ପରେ ବହୁ ଗୋଟିଏ ହାଣ୍ଡି ପାଣି ମିଳୁଛି । ଅତ୍ୟଧିକ ବ୍ୟବହାର ଯୋଗୁ ନଳକୂଅରୁ ଗୋଳିଆ ଓ ଲୌହଗୁଣ୍ଡ ମିଶ୍ରତ ପାଣି ବାହାରୁଛି । ଯାହାକି ପିଇବା ଉପଯୋଗୀ ନୁହେଁ, ତଥାପି ବିକଳ୍ପ ନଥିବାରୁ ସେମାନେ ବାଧ୍ୟ ହୋଇ ବ୍ୟବହାର କରୁଛନ୍ତି । ଅନ୍ୟପକ୍ଷରେ ପୋଖରୀ, ନାଳ ଶୁଖିଯାଇଛି । ଆଗରୁ ଆହୁରି ତାତି ବଢିବ । ଏହାକୁ ନେଇ ସେମାନେ ଚିନ୍ତାରେ ପଡ଼ ିଛନ୍ତି । ପାଣି ସମସ୍ୟାର ସମାଧାନ ପାଇଁ ସାହିରେ ଆଉ ଏକ ନଳକୂଅ ଖୋଳାଯାଉ ନହେଲେ ଟ୍ୟାଙ୍କର ଯୋଗେ ପାଣି ଯୋଗାଇ ଦେବା ପାଇଁ ପ୍ରଶାସନ ପାଖରେ ନିବେଦନ କରିଛନ୍ତି । ଜିଲ୍ଲା ପ୍ରଶାସନ ତୁରନ୍ତ ଏ ଦିଗରେ ଦୃଷ୍ଟି ଦେବାକୁ ସେମାନେ ଦାବି କରିଛନ୍ତି ।
