କେନ୍ଦ୍ରାପଡ଼ା,୨୦/୦୫: ନାମାଙ୍କନପତ୍ର ଦାଖଲ, ଯାଞ୍ଚ୍ ଓ ପ୍ରାର୍ଥିପତ୍ର ପ୍ରତ୍ୟାହାର ପରେ ଚୂଡ଼ାନ୍ତ ତାଲିକା ପ୍ରକାଶ ପାଇସାରିଛି । ଜୁନ୍ ୧ରେ ଭୋଟ୍ ଗ୍ରହଣ କରାଯିବ । ଏଥିପାଇଁ ପ୍ରଶାସନ ପୂରା ପ୍ରସ୍ତୁତ । କେନ୍ଦ୍ରାପଡ଼ା ଜିଲ୍ଲାରେ ୫୦ ପ୍ରାର୍ଥୀ ମଇଦାନକୁ ଓହ୍ଲାଇଛନ୍ତି । ସେମାନଙ୍କ ମଧ୍ୟରୁ କେନ୍ଦ୍ରାପଡ଼ା ଲୋକସଭା ଆସନ ଲାଗି ୧୦ ଓ ୫ଟି ବିଧାନସଭା କ୍ଷେତ୍ରରୁ ୪୦ ଜଣ ପ୍ରାର୍ଥୀ ଲଢ଼ୁଛନ୍ତି । ଏହା ପୂର୍ବରୁ ଚୂଡ଼ାନ୍ତ ଭୋଟ୍ର ତାଲିକା ପ୍ରକାଶ ପାଇସାରିଛି ।
ଚଳିତ ନିର୍ବାଚନରେ ଅଧିକ ୪୨ ହଜାର ୧୮୧ଜଣ ନୂଆ ଭୋଟର୍ ଯୋଡ଼ି ହୋଇଛନ୍ତି । ଯେଉଁମାନେ କି ଗଣତନ୍ତ୍ରର ମହାପର୍ବରେ ପ୍ରଥମ ଥର ସାମିଲ ହେବାକୁ ଯାଉଛନ୍ତି । ଏମାନଙ୍କର ବୟସ ୧୮ରୁ ୧୯ ବର୍ଷ ମଧ୍ୟରେ । ସେମାନଙ୍କ ଭୋଟ୍ ବେଶ୍ ଗୁରୁତ୍ୱ ରଖୁଛି । ମୋଟ୍ ଭୋଟର ସଂଖ୍ୟାର ଏହା ୨.୩୫ ପ୍ରତିଶତ । ତେଣୁ ଏହା ଉପରେ ଏବେ ସବୁ ପ୍ରାର୍ଥୀଙ୍କ ନଜର ।
ନୂଆ ଭୋଟର୍ଙ୍କୁ ଆକୃଷ୍ଟ କରିବା ପାଇଁ ୩ ପ୍ରମୁଖ ଦଳ ଆକର୍ଷଣୀୟ ଯୋଜନାର ଲୋଭ ଦେଖାଇଛନ୍ତି । କଲେଜ ପଢ଼ୁଆ ଛାତ୍ରଛାତ୍ରୀମାନେ ପ୍ରାୟତଃ ଏହି ବର୍ଗରେ ଅଧିକ ଥିବାରୁ ସେମାନଙ୍କୁ ନିଜ ସପକ୍ଷରେ ନେବା ପାଇଁ ନେତାମାନେ ମାଳମାଳ ପ୍ରତିଶ୍ରୁତି ଦେଇଛନ୍ତି । କେନ୍ଦ୍ରାପଡ଼ା ଲୋକସଭା କ୍ଷେତ୍ର ଅଧୀନ ୭ ବିଧାନସଭା କ୍ଷେତ୍ରରୁ ମୋଟ୍ ୧୭ ଲକ୍ଷ ୯୧ ହଜାର ୮୨ ଜଣ ଭୋଟ୍ର ଥିବାବେଳେ ସେମାନଙ୍କ ମଧ୍ୟର ନୂଆ ଭୋଟର୍ଙ୍କ ସଂଖ୍ୟା ୪୨ ହଜାର ୧୮୧ ଥିବା ଜଣାପଡ଼ିଛି । ପାଟକୁରା ବିଧାନସଭା କ୍ଷେତ୍ରରେ ୫ ହଜାର ୯୩୯ଜଣ ନୂଆ ଭୋଟର, କେନ୍ଦ୍ରାପଡ଼ା ବିଧାନସଭାରେ ୪ହଜାର ୯୬୭ ନୂଆ ଭୋଟର, ଆଳି ବିଧାନସଭାରେ ୫ ହଜାର ୬୯୯ ନୂଆ ଭୋଟ୍ର, ରାଜନଗର ବିଧାନସଭାରେ ୭ ହଜାର ୨୬୫, ମହାକାଳପଡ଼ା ବିଧାନସଭାରେ ୫ହଜାର ୬୩୧, ସାଲେପୁରରେୁ ୫ ହଜାର ୧୭୮ ଓ ମାହାଙ୍ଗାରେ ୭ ହଜାର ୫୦୨ ଜଣ ନୂଆ ଭୋଟର ଅଛନ୍ତି ।