ନୂଆଦିଲ୍ଲୀ: ରାଷ୍ଟ୍ରପତି ନିର୍ବାଚନରୁ ଓହରିବେ ନାହିଁ ବୋଲି ସ୍ପଷ୍ଟ କରିଛନ୍ତି ଜୋ ବାଇଡେନ୍ । ଡେମୋକ୍ରାଟ ନେତା ବାରମ୍ବାର ବାଇଡେନଙ୍କୁ ଓହରିବାକୁ ଦାବି କରି ଆସିଥିବା ବେଳେ ୮୧ ବର୍ଷୀୟ ନେତା ନିଜ ଜିଦରେ ଅଟଳ ରହିଛନ୍ତି । ୨୦୨୪ ରାଷ୍ଟ୍ରପତି ନିର୍ବାଚନରେ ଡୋନାଲ୍ଡ ଟ୍ରମ୍ପଙ୍କୁ ହରାଇବା ଲାଗି ସେ ହିଁ ଉପଯୁକ୍ତ ବୋଲି ବାଇଡେନ୍ କହିଛନ୍ତି । ଦୁଇ ପୃଷ୍ଠାର ଷ୍ଟେଟମେଣ୍ଟ ଜାରି କରି ବାଇଡେନ୍ କହିଛନ୍ତି, ମିଡିଆ ଏବଂ ଅନ୍ୟାନ୍ୟ ସ୍ଥାନରେ ହେଉଥିବା ପ୍ରଚାରକୁ ଖାତିର ନକରି ରାଷ୍ଟ୍ରପତି ଦୌଡ଼ରେ ରହିବା ସହ ରିପବ୍ଲିକାନ୍ ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କୁ ହରାଇବେ ।
ଜୁନ୍ ୨୭ରେ ଡିବେଟ୍ ପରେ ନିର୍ବାଚନରୁ ଓହରିବା ଲାଗି ବାଇଡେନଙ୍କ ଉପରେ ଚାପ ବୃଦ୍ଧି ପାଇଛି । ଜୁନ୍ ୨୭ରେ ଟ୍ରମ୍ପଙ୍କ ସହ ଡିବେଟ୍ ସମୟରେ ବାଇଡେନ୍ଙ୍କ ଆତ୍ମବିଶ୍ବାସ କମ୍ ଥିଲା ଭଳି ମନେ ହେଉଥିଲା ଏବଂ ସେ ଅନ୍ୟମନସ୍କ ହୋଇଥିବା ନେଇ ଅଭିଯୋଗ ହୋଇଥିଲା । ସେପଟେ ବାଇଡେନ୍ ଆହୁରି କହିଛନ୍ତି ଯେ, ସେ ଗତ ୧୦ ଦିନ ହେଲା ଡେମୋକ୍ରାଟିମ୍ ନେତା ଏବଂ ସମର୍ଥକଙ୍କ ସହ ଆଲୋଚନା କରିଛନ୍ତି । ତାଙ୍କ ପ୍ରତି ଦଳର ସମର୍ଥନ ରହିଛି । ଏପରିକି ଡେମୋକ୍ରାଟିକ୍ ଦଳ ପକ୍ଷରୁ ରାଷ୍ଟ୍ରପତି ନିର୍ବାଚନ ଲାଗି ସେ ହିଁ ମୁଖ୍ୟ ଦାବିଦାର ବୋଲି ବାଇଡେନ୍ ଦାବି କରିଛନ୍ତି ।
ଗତ ସପ୍ତାହରେ ଏବିସି ନ୍ୟୁଜକୁ ଦେଇଥିବା ସାକ୍ଷାତକାରରେ ବାଇଡେନ୍ କହିଥିଲେ, ‘ଇଶ୍ବର ଚାହିଁଲେ ହିଁ ସେ ରାଷ୍ଟ୍ରପତି ନିର୍ବାଚନରୁ ଓହରିବେ । ଏହା ସହ ଡେମୋକ୍ରାଟ ନେତାମାନେ ଏକାଠି ହୋଇ ତାଙ୍କୁ ଓହରିବା ପାଇଁ ବାଧ୍ୟ କରିପାରିବେ ବୋଲି ଦାବିକୁ ସେ ଖଣ୍ଡନ କରିଥିଲେ । ତେବେ ୫ ଜଣ ଆମେରିକୀୟ ସାଂସଦ ବାଇଡେନ୍ ପୁଣି ଥରେ ନିର୍ବାଚନ ନଲଢ଼ନ୍ତୁ ବୋଲି ସାର୍ବଜନୀନ ଭାବରେ କହିସାରିଛନ୍ତି ।
