ନୂଆଦିଲ୍ଲୀ ୦୮/୧୦: ମଙ୍ଗଳବାର ଜମ୍ମୁ-କାଶ୍ମୀର ଓ ହରିଆଣା ବିଧାନସଭା ନିର୍ବାଚନର ଭୋଟ ଗଣତି ଅନୁଷ୍ଠିତ ହେବ । ଏଥିପାଇଁ ଭୋଟ ଗଣତି କେନ୍ଦ୍ରରେ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ସକାଳ ୮ଟାରେ ପ୍ରଥମେ ପୋଷ୍ଟାଲ ବାଲଟ ଗଣତି କରାଯିବ । ଏହା ପରେ ଇଭିଏମ୍ର ଭୋଟ ଗଣତି ହେବ । ମଧ୍ୟାହ୍ନ ସୁଦ୍ଧା ଫଳାଫଳ ଚିତ୍ର ସ୍ପଷ୍ଟ ହୋଇଯିବ । ଲୋକସଭା ନିର୍ବାଚନ ପରେ ଏହା ପ୍ରଥମ ବଡ ରାଜନୈତିକ ଲଢ଼େଇ ହୋଇଥିବାରୁ ଫଳାଫଳକୁ ନେଇ ଜାତୀୟ ଦଳ ଠାରୁ ଆରମ୍ଭ କରି ଆଞ୍ଚଳିକ ଦଳମାନଙ୍କ ଭିତରେ ବେଶ୍ ଉତ୍କଣ୍ଠା ଲାଗି ରହିଛି । ବିଭିନ୍ନ ସଂସ୍ଥ ପକ୍ଷରୁ କରାଯାଇଥିବା ଏକ୍ଜିଟ ପୋଲ ଅନୁସାରେ ହରିଆଣାରେ କଂଗ୍ରେସ ଓ ଜମ୍ମୁ-କାଶ୍ମୀରରେ ଝୁଲା ସରକାର ହେବାର ସମ୍ଭାବନା ରହିଛି ।
ଜମ୍ମୁ-କାଶ୍ମୀରରୁ ୨୦୧୯ରେ ଧାରା ୩୭୦ ଉଚ୍ଛେଦ ପରେ ଏହା ପ୍ରଥମ ନିର୍ବାଚନ । ଯଦିଓ ଏହା କେନ୍ଦ୍ର ଶାସିତ ଅଞ୍ଚଳ ହୋଇରହିଛି ତଥାପି ବିଧାନସଭା ନିର୍ବାଚନରେ ବିଜୟୀ ହୋଇ ‘ନୂଆ କାଶ୍ମୀର’ରେ ପ୍ରଥମଥର ପାଇଁ ସରକାର ଗଢ଼ିବାକୁ ପ୍ରମୁଖ ଦଳମାନେ ଆଶାବାଦୀ ଅଛନ୍ତି । ବିକାଶ ଓ ଆତଙ୍କବାଦ ଦମନକୁ ମୁଖ୍ୟ ପ୍ରସଙ୍ଗ କରି ବିଜେପି ଜନମତ ପାଇବାକୁ ଆଶା ରଖିଛି । ଅନ୍ୟପକ୍ଷରେ ଧାରା ୩୭୦ ଉଚ୍ଛେଦ ହିଁ କଂଗ୍ରେସ-ଏନ୍ସି ମଧ୍ୟରେ ମେଣ୍ଟ ଗଠନକୁ ସୁଦୃଢ଼ କରିଛି । ଇଣ୍ଡିଆ ମେଣ୍ଟର ଅଂଶୀଦାର ଥିବା ଏହି ଦୁଇଦଳ କ୍ଷମତା ଦଖଲ କରିବେ ବୋଲି ଆଶାବାଦୀ ଅଛନ୍ତି ।
୨୦୧୮ରେ ବିଜେପି ମେଣ୍ଟ ସରକାରରୁ ଓହରିଯିବା ପରେ ପିଡିପିକୁ ଶକ୍ତ ଝଟ୍କା ଲାଗିଥିଲା । ହେଲେ ଏଥର ନିର୍ବାଚନରେ ପିଡିପି କିଙ୍ଗମେକର ହେବ ବୋଲି କହିଛି । ଏଥର ନିର୍ବାଚନରେ ୮୭୩ ପ୍ରାର୍ଥୀ ନିଜର ଭାଗ୍ୟ ପରୀକ୍ଷା କରୁଛନ୍ତି । ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ଅଛନ୍ତି ଏନ୍ସି ନେତା ଓମାର ଅବଦୁଲ୍ଲା, ପିପୁଲ୍ସ କନଫରେନ୍ସ ନେତା ସାଜଦ ଗନି ଲୋନ, ପିସିସି ସଭାପତି ତାରିକ ହମିଦ କାରା ଓ ବିଜେପି ରାଜ୍ୟ ସଭାପତି ରବିନ୍ଦ୍ର ରାଇନା । ୯୦ ଆସନ ବିଶିଷ୍ଟ ଜମ୍ମୁ-କାଶ୍ମୀରରେ ୩ଟି ପର୍ଯ୍ୟାୟ (ସେପ୍ଟେମ୍ବର ୧୮ ଓ ୨୫ ଏବଂ ଅକ୍ଟୋବର ୧)ରେ ଭୋଟ ଗ୍ରହଣ ହୋଇଥିଲା । ମତଦାନ ହାର ଥିଲା ୬୩.୮୮ ପ୍ରତିଶତ । ଯାହାକି ଶେଷ ନିର୍ବାଚନ ୨୦୧୪ ତୁଳନାରେ କମ୍ ।
ହରିଆଣାରେ ବିଜେପି ତୃତୀୟଥର ପାଇଁ କ୍ଷମତାକୁ ଫେରିବ ବୋଲି ଆଶାବାଦୀ ଅଛି । କିଛିମାସ ତଳେ ମୁଖ୍ୟମନ୍ତ୍ରୀ ପରିବର୍ତ୍ତନ କରିବା ଓ ରାଜ୍ୟରେ ବହୁଥିବା ସରକାର ବିରୋଧୀ ହାୱାକୁ ମାତ୍ ଦେଇ ବିଜେପି କ୍ଷମତାସୀନ ହେବ ବୋଲି ଆଶା ରଖିଛି । ଅନ୍ୟପକ୍ଷରେ ଦୀର୍ଘ ୧୦ ବର୍ଷ ହେଲା ବିରୋଧୀ ଦଳରେ ବସିଥିବା କଂଗ୍ରେସ ଏଥର କିନ୍ତୁ ବିଜେପିକୁ ତଡି କ୍ଷମତା ଦଖଲ କରିବ ବୋଲି ଦୃଢ଼ୋକ୍ତି ପ୍ରକାଶ କରିଛି ।
ସେହିଭଳି ଆଇଏନ୍ଏଲ୍ଡି ଓ ଜେଜେପି ଭଳି ଆଞ୍ଚଳିକ ଦଳ ଜାତି ସମୀକରଣକୁ ନେଇ ନିଜର ଶକ୍ତି ବଢ଼ାଇବାକୁ ପୂର୍ଣ୍ଣ ପ୍ରାଣରେ ଲାଗିପଡିଥିବା ଦେଖିବାକୁ ମିଳିଛି । ଲୋକସଭା ନିର୍ବାଚନ ପରେ ଏଠାରେ କଂଗ୍ରେସ ଓ ବିଜେପି ମଧ୍ୟରେ ପ୍ରଥମ ଲଢ଼େଇ ହେଉଛି । ୯୦ ଆସନ ବିଶିଷ୍ଟ ହରିଆଣାରେ ଗୋଟିଏ ପର୍ଯ୍ୟାୟରେ ଗତ ୫ ତାରିଖରେ ଭୋଟ ହୋଇଥିଲା । ମତଦାନ ହାର ୬୭.୯ ପ୍ରତିଶତ ରହିଥିଲା । ୧୦୧ ମହିଳା ଓ ୪୬୪ ସ୍ୱାଧୀନ ପ୍ରାର୍ଥୀଙ୍କ ସମେତ ୧୦୩୧ ପ୍ରାର୍ଥୀ ଚଳିତଥର ନିର୍ବାଚନରେ ସେମାନଙ୍କ ଭାଗ୍ୟ ପରୀକ୍ଷା କରିଛନ୍ତି । ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ଅଛନ୍ତି ମୁଖ୍ୟମନ୍ତ୍ରୀ ନାୟବ ସିଂହ ସୈନି, ବିରୋଧୀ ଦଳ ନେତା ଭୁପେନ୍ଦ୍ର ସିଂହ ହୁଦା, ଆଇଏନ୍ଏଲ୍ଡି ନେତା ଅଭୟ ଚୌତାଲା, ଜେଜେପିର ଦୁଶ୍ୟନ୍ତ ଚୌତାଲା, ବିଜେପିର ଅନିଲ ଭିଜ୍ ଓ କଂଗ୍ରେସର ଭିନେଶ ଫୋଗଟ।
