ନୂଆଦିଲ୍ଲୀ,୦୮/୧୦:ହରିୟାଣାର ବିଧାନସଭା ଆସନରେ ଜାରି ରହିଛି ଭୋଟ ଗଣତି । ଏହାରି ମଧ୍ୟରେ ଭୋଟ୍ ଗଣତିରେ ବିଳମ୍ବ ହେଉଥିବା ଅଭିଯୋଗ ହୋଇଛି। କେବଳ ସେତିକି ନୁହେଁ ନିର୍ବାଚନ ଆୟୋଗର ଅଫିସିଆଲ୍ ୱେବସାଇଟରେ ଫଳାଫଳ ଦେଖାଇବାରେ ମଧ୍ୟ ବିଳମ୍ବ ହେଉଛି। ଏଭଳି କିଛି ଅଭିଯୋଗ ଆଣିଛି କଂଗ୍ରେସ। ଏନେଇ ନିର୍ବାଚନ ଆୟୋଗଙ୍କ ନିକଟରେ ସେ ଖୁବଶୀଘ୍ର ଲିଖିତ ଅଭିଯୋଗ କରିବ ବୋଲି କଂଗ୍ରେସ କହିଛି। ସେପଟେ କଂଗ୍ରେସ ନେତା ଜୟରାମ ରମେଶ କହିଛନ୍ତି ଯେ ଆମେ ଏକ ସ୍ମାରକପତ୍ର ଦାଖଲ କରି ଅଭିଯୋଗ କରୁଛୁ।ଆଶା କରୁଛୁ ଇସିଆଇ ଆମ ପ୍ରଶ୍ନର ଉତ୍ତର ଦେବେ।କାରଣ ୧୧-୧୨ ରାଉଣ୍ଡର ଫଳାଫଳ ଆସିଛି କିନ୍ତୁ ଯାହା ଅପଡେଟ୍ ହୋଇଛି ତାହା କେବଳ ୪ରୁ୫ ରାଉଣ୍ଡ ଦେଖାଯାଉଛି। ଲୋକସଭା ନିର୍ବାଚନ ବେଳେ ମଧ୍ୟ ଏହା ଘଟିଥିଲା।
ସେପଟେ ହରିୟାଣାରେ କଂଗ୍ରେସ ଟ୍ରେଣ୍ଡରେ ପଛୁଆ ପଡିଯାଇଥିବା ବେଳେ ଆଗରେ ରହିଛି ବିଜେପି। ଏହାକୁ ନେଇ ଏବେ କଂଗ୍ରେସକୁ ପଛରେ ପକାଇ ବାଜି ମାରିଛି ବିଜେପି। ଏନେଇ କଂଗ୍ରେସ ନେତା ଜୟରାମ ରମେଶଙ୍କୁ କାଉଣ୍ଟର କରି ବିଜେପି ନେତା ସୁଧାଂଶୁ ତ୍ରିବେଦୀ କହିଛନ୍ତି ଯେ,'ହରିୟାଣାରେ ବିଜୟ ମୁହାଁ ବିଜେପି। କଂଗ୍ରେସକୁ ନିଜ ହାର ମାନି ନେବା ଉଚିତ। ନିର୍ବଚନ ଆୟୋଗଙ୍କ ଉପରେ ଅଙ୍ଗୁଳି ନିର୍ଦ୍ଦେଶ କରିବା ଅର୍ଥ ସେମାନେ ଏବେଠୁ ନିଜ ହାର ପାଇଁ ପ୍ରସ୍ତୁତି ଆରମ୍ଭ କରିଦେଲେଣି ବୋଲି ସେ କହିଛନ୍ତି। ପ୍ରକାଶ ଥାଉକି, ଟ୍ରେଣ୍ଡ ଅନୁସାରେ ବର୍ତ୍ତମାନ ହରିୟାଣାର ୯୦ ଆସନରୁ ବିଜେପି ୪୯ଟି ଆସନରେ ଆଗୁଆ ରହିଛି। ସେହିପରି କଂଗ୍ରେସ କେବଳ ୩୫ ଆସନରେ ଆଗୁଆ ଥିବା ସୂଚନା ମିଳିଛି ।