ତେଲ୍ ଆଭିଭ୍,୦୩/୧୦: ଇସ୍ରାଏଲ୍ ଓ ଇରାନ୍ ମଧ୍ୟରେ ପୁଣି ବିବାଦ ବୃଦ୍ଧି ପାଇଛି । ଏପ୍ରିଲ ପରେ ପୁନର୍ବାର ଇରାନ୍ ପକ୍ଷରୁ ଇସ୍ରାଏଲ୍ ଉପରେ ମିସାଇଲ୍ ଆକ୍ରମଣ କରାଯାଇଛି । ଇସ୍ରାଏଲ୍ ଏହି ଆକ୍ରମଣର ଭୟଙ୍କର ଜବାବ ଦେବା ନେଇ ଦେଶର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ କହିଛନ୍ତି । ତେବେ ବର୍ତ୍ତମାନ ଯେଉଁ ଯୁଦ୍ଧ ଚାଲିଛି, ତାହା କେବଳ ଇସ୍ରାଏଲ୍ ଓ ଇରାନ୍ ମଧ୍ୟରେ ନୁହେଁ । ବରଂ ଇସ୍ରାଏଲ୍ ବର୍ତ୍ତମାନ ୮ ତରଫା ଚ୍ୟାଲେଞ୍ଜ୍ର ସମ୍ମୁଖୀନ ହେଉଛି ।
ମଙ୍ଗଳବାର ରାତିରେ ଇରାନ୍ ଯେଉଁ ୪୦୦ରୁ ଅଧିକ ମିସାଇଲ୍ ମାଡ଼ କରିଥିଲା, ସେଥିରୁ ୯୦% ଠିକଣା ଜାଗାକୁ ଟାର୍ଗେଟ୍ କରିଥିବା ଦେଶ ଦାବି କରିଛି । କିନ୍ତୁ ଇସ୍ରାଏଲ୍ରେ ଏହା ବଡ଼ଧରଣର କ୍ଷତି ଘଟାଇଥିବା ଜଣାପଡ଼ୁ ନାହିଁ । ଏହାର ଶକ୍ତିଶାଳୀ ବାୟୁ ପ୍ରତିରକ୍ଷା ବ୍ୟବସ୍ଥା ପ୍ରାୟ ସମସ୍ତ ମିସାଇଲ୍କୁ ଗତିରୋଧ (ଇଣ୍ଟରସେପ୍ଟ) କରି ଖସାଇ ଦେଇଛି । ଇରାନ୍ର ମିସାଇଲ୍ ହମ୍ଲାରେ ୱେଷ୍ଟ ବ୍ୟାଙ୍କରେ ଜଣେ ପାଲେଷ୍ଟାଇନ୍ ବ୍ୟକ୍ତିଙ୍କ ମୃତ୍ୟୁ ଘଟିଛି । ଇରାନ୍ର ଇସ୍ଲାମିକ୍ ରିଭଲ୍ୟୁସନ ଗାର୍ଡ କର୍ପସ (ଆଇଆର୍ଜିସି) କହିଛି ଯେ ଏହି ହମ୍ଲା ହମାସ୍ ମୁଖ୍ୟ ଇସ୍ମାଇଲ ହାନିୟେ, ହିଜ୍ବୁଲ୍ଲା ମୁଖ୍ୟ ହସନ୍ ନସ୍ରଲ୍ଲାହ ଏବଂ ଆଇଆରଜିସି କମାଣ୍ଡ ଅକ୍ରାସ୍ ନିଲ୍ଫୋରୋସାନ୍ଙ୍କ ହତ୍ୟାର ପ୍ରତିଶୋଧରେ କରାଯାଇଛି ।
ଗାଜା ପଟି
୧୯୮୭ରେ ଗଠିତ ହମାସ୍କୁ ଇସ୍ରାଏଲ୍ ଓ ଆମେରିକା ସମେତ ଅନେକ ଦେଶ ଆତଙ୍କୀ ସଙ୍ଗଠନ ଘୋଷଣା କରିସାରିଛନ୍ତି । ଇସ୍ମାଇଲ୍ ହାନିୟେ ଏହାର ମୁଖ୍ୟ ଥିଲା । ଜୁଲାଇରେ ତାକୁ ଇସ୍ରାଏଲ୍ ନିପାତ କରିଥିଲା । ୨୦୦୭ରୁ ଗାଜା ପଟିରେ ହମାସ୍ର ଦବ୍ଦବା ରହିଥିଲା । ହମାସ୍କୁ ସର୍ବାଧିକ ସମର୍ଥନ ଇରାନ୍ ଦେଉଛି । ଇରାନ୍ଠାରୁ ହିଁ ହମାସ୍କୁ ସର୍ବାଧିକ ପାଣ୍ଠି ମିଳୁଛି । ହମାସ୍ ବ୍ୟତୀତ ଗାଜା ପଟିରେ ପାଲେଷ୍ଟାଇନ୍ ଇସ୍ଲାମିକ୍ ଜିହାଦ ନାମକ ସଙ୍ଗଠନ ବି ସକ୍ରିୟ ରହିଛି । ଏହା ହମାସ୍ ପରେ ଦ୍ୱିତୀୟ ସର୍ବବୃହତ ସଙ୍ଗଠନ । ୧୯୭୦ରେ ଗଠିତ ଏହି ସଙ୍ଗଠନକୁ ମଧ୍ୟ ଇରାନ୍ ସମର୍ଥନ ଯୋଗାଇ ଦେଉଛି ।
ୱେଷ୍ଟ ବ୍ୟାଙ୍କ
ଇସ୍ରାଏଲ୍ର ପୂର୍ବ ସୀମାରେ ପ୍ରତିଷ୍ଠା ହୋଇଥିବା ୱେଷ୍ଟ ବ୍ୟାଙ୍କ ପାଲେଷ୍ଟାଇନ୍ର ଆଉ ଏକ ଅଂଶ। ୱେଷ୍ଟ ବ୍ୟାଙ୍କରେ ମଧ୍ୟ ହମାସ୍ ଓ ପାଲେଷ୍ଟାଇନ୍ ଇସ୍ଲାମିକ୍ ଜିହାଦ ସକ୍ରିୟ ରହିଛି । ଗାଜା ପଟି ସହ ୱେଷ୍ଟ ବ୍ୟାଙ୍କରୁ ବର୍ତ୍ତମାନ ହମାସ୍ ଓ ଇସଲାମିକ୍ ଜିହାଦ ଇସ୍ରାଏଲ୍ ଉପରେ ଆକ୍ରମଣ ଜାରି ରଖିଛନ୍ତି ।
ଲେବାନନ୍
ଏଠାରେ ଇରାନ୍ ସମର୍ଥିତ ଆତଙ୍କୀ ସଙ୍ଗଠନ ହିଜ୍ବୁଲ୍ଲା ସକ୍ରିୟ ରହିଛି । ହମାସ୍କୁ ସମର୍ଥନ ଜଣାଇ ଏହା ଇସ୍ରାଏଲ୍ ଉପରେ ଗତବର୍ଷ ଅକ୍ଟୋବର ୮ରେ ମିସାଇଲ୍ ମାଡ଼ କରିଥିଲା । ସେବେଠାରୁ ଇସ୍ରାଏଲ୍ ଓ ହିଜ୍ବୁଲ୍ଲା ମଧ୍ୟରେ ଯୁଦ୍ଧ ଲାଗିରହିଛି । ବର୍ତ୍ତମାନ ଏହା ନିର୍ଣ୍ଣାୟକ ମୋଡ଼ରେ ପହଞ୍ଚିଛି । ୧୯୮୨ରେ ଇରାନ୍ର ରିଭଲ୍ୟୁସନାରି ଗାର୍ଡସ ଏହି ସଙ୍ଗଠନକୁ ଗଠନ କରିଥିଲା । ହିଜ୍ବୁଲ୍ଲାକୁ ବି ଆତଙ୍କୀ ସଙ୍ଗଠନ ଘୋଷଣା କରାଯାଇଛି । ଏହାର ଲକ୍ଷ୍ୟ ହେଉଛି ଇରାନ୍ରେ ହୋଇଥିବା ଇସ୍ଲାମି କ୍ରାନ୍ତିକୁ ଅନ୍ୟ ଦେଶରେ ସମ୍ପ୍ରସାରଣ କରିବା । ଇସ୍ରାଏଲ୍ ବିରୋଧୀ ଯୁଦ୍ଧରେ ହିଜ୍ବୁଲ୍ଲା ବର୍ତ୍ତମାନ ହମାସ୍ର ସାଥ୍ ଦେଇ ଆକ୍ରମଣ କରୁଛି । ୨୦୦୬ରେ ବି ହିଜ୍ବୁଲ୍ଲା ଇସ୍ରାଏଲ୍ ସହିତ ୩୫ ଦିନ ଧରି ଲଢ଼ିଥିଲା । ଏଥିରେ ୧୫୮ ଇସ୍ରାଏଲୀ ନାଗରିକଙ୍କ ମୃତ୍ୟୁ ହୋଇଥିଲା ।
ଇରାକ୍
ଏଠାରେ ମଧ୍ୟ ଅନେକ ଚରମପନ୍ଥୀ ସଙ୍ଗଠନ ରହିଛନ୍ତି, ଯେଉଁମାନଙ୍କୁ ଇରାନ୍ ସମର୍ଥନ ଯୋଗାଇ ଦେଉଛି । ଇରାକ୍ରେ ପପୁଲାର୍ ମୋବିଲାଇଜେସନ ଫୋର୍ସେସ୍ ନାମକ ସଙ୍ଗଠନ ରହିଛି । ଏହା ପାଖରେ ୨ ଲକ୍ଷରୁ ଅଧିକ ଯୋଦ୍ଧା ରହିଛନ୍ତି । ବଦ୍ର ସଙ୍ଗଠନକୁ ଇରାନ୍-ଇରାକ୍ ଯୁଦ୍ଧ ବେଳେ ଇରାନୀ ଗୁଇନ୍ଦା ଏଜେନ୍ସି ବନାଇଥିଲା । ଏହାବ୍ୟତୀତ ଇରାକ୍ରେ ଅସୈବ ଅହଲ ଅଲ୍-ହକ୍ ନାମରେ ମଧ୍ୟ ଏକ ସଙ୍ଗଠନ ରହିଛି । ଏହା ପାଖରେ ୧୫ ହଜାରରୁ ୩୦ ହଜାର ଯୋଦ୍ଧା ରହିଥିବା କୁହାଯାଏ ।
ସିରିୟା
ସିରିୟାରେ ଫାତେମିଓଁ ବ୍ରିଗେଡ୍ ରହିଛି, ଯାହା ଇରାନ୍ରେ ଆଫଗାନୀ ଶରଣାର୍ଥୀଙ୍କର ଏକ ସଙ୍ଗଠନ । ଏହାକୁ ସିରିୟା ସରକାର ବିରୋଧରେ ବନାଯାଇଥିଲା । ସିରିୟାରେ ଲଢ଼ିବା ପାଇଁ ଶିୟା ପାକିସ୍ତାନୀମାନେ ଜୈନବିଓଁ ବ୍ରିଗେଡ୍ ନାମରେ ସଙ୍ଗଠନ ବନାଇଥିଲେ । ଏହାଛଡ଼ା ଏକ କୁୱତ ଅଲ୍-ରିଧା ନାମକ ସଙ୍ଗଠନ ବି ରହିଛି, ଯାହାର ଯୋଦ୍ଧାମାନଙ୍କୁ ହିଜ୍ବୁଲ୍ଲା ତାଲିମ ଦେଇଥାଏ । ଏହାଛଡ଼ା ବକୀର ବ୍ରିଗେଡ୍ ବି ରହିଛି ଏବଂ ଏହାକୁ ଆଇଆର୍ଜିସି ପୂର୍ଣ୍ଣ ସମର୍ଥନ ଯୋଗାଇ ଦେଉଛି । ଏହା ପାଖରେ ହଜାର ହଜାର ଯୋଦ୍ଧା ରହିଛନ୍ତି ।
ୟେମେନ୍
ଇସ୍ରାଏଲ୍ ଉପରେ ୟେମେନ ପଟୁ ବି ବିପଦ ରହିଛି । ଏଠାକାର ହୁତି ବିଦ୍ରୋହୀମାନେ ହମାସ୍କୁ ସମର୍ଥନ କରି ଇସ୍ରାଏଲ୍ ଉପରେ ଆକ୍ରମଣ କରୁଛନ୍ତି । ଏମାନେ ଆମେରିକା ବିରୋଧରେ ବି ଲଢ଼ୁଛନ୍ତି । ୯୦ ଦଶକରେ ହୁସେନ୍ ଅଲ୍-ହୁତି ଏହି ସଙ୍ଗଠନକୁ ନିର୍ମାଣ କରିଥିଲା । ୟେମେନ୍ର ବିଦ୍ରୋହୀମାନଙ୍କୁ ଇରାନ୍ର ସମର୍ଥନ ମିଳୁଛି । ହୁତି ବିଦ୍ରୋହୀମାନେ ୟେମେନ୍ରେ ରାଜନୈତିକ ରୂପରେ ମଜଭୁତ ରହିଛନ୍ତି । ହୁତି ପାଖରେ ୩୦ ହଜାରରୁ ଅଧିକ ସଦସ୍ୟ ରହିଛନ୍ତି ।
ବାହାରିନ୍
ଏଠାରେ ଅଲ୍-ଅସ୍ତାର ବ୍ରିଗେଡ ନାମକ ସଙ୍ଗଠନ ସକ୍ରିୟ ରହିଛି । ଇରାନ୍ର ସହାୟତାରେ ଏହି ସଙ୍ଗଠନ ବାହାରିନ୍ ସରକାରଙ୍କ ବିରୋଧରେ ଗଠନ କରାଯାଇଥିଲା । ୨୦୧୩ରେ ଏହା ସଙ୍ଗଠନ ଭାବେ ଗଢ଼ିଉଠିଥିଲା । ଏହାକୁ ଇରାନ୍ କେବଳ ପାଣ୍ଠି ଯୋଗାଉ ନାହିଁ, ବରଂ ଅସ୍ତ୍ରଶସ୍ତ୍ର ଓ ବିସ୍ଫୋରକ ବି ଯୋଗାଇ ଦିଆଯାଉଛି । ହିଜ୍ବୁଲ୍ଲା ମଧ୍ୟ ଏହାକୁ ସମର୍ଥନ କରୁଛି ।
