ନୂଆଦିଲ୍ଲୀ ୦୩/୧୦: ଇରାନ-ଇସ୍ରାଏଲ ମଧ୍ୟରେ ଆରମ୍ଭ ହୋଇଛି ମହାଯୁଦ୍ଧ । ହିଜବୁଲ୍ଲା ମୁଖ୍ୟ ହସନ୍ ନସରଲ୍ଲାହର ହତ୍ୟାର ପ୍ରତିଶୋଧରେ ଗତ ମଙ୍ଗଳବାର ରାତିରେ ଇସ୍ରାଏଲ ଉପରେ ପ୍ରାୟ ୨୦୦ ବାଲିଷ୍ଟିକ୍ ମିସାଇଲ ମାଡ଼ କରିଛି ଇରାନ । ଇସ୍ରାଏଲ, ଆମେରିକା ଓ ଜୋର୍ଡାନର ଆଣ୍ଟି-ମିସାଇଲ ଡିଫେନ୍ସ ଦ୍ୱାରା ଅଧିକାଂଶ ମିସାଇଲକୁ ରୋକାଯାଇଥିଲା ।
ଏହି ଆକ୍ରମଣ ପରେ ମଧ୍ୟ-ପ୍ରାଚ୍ୟରେ ସ୍ଥିତି ଆହୁରି ବିଗିଡ଼ିଛି । ଚଳିତ ବର୍ଷ ଇସ୍ରାଏଲ ଉପରେ ଇରାନର ଏହା ୨ୟ ବଡ଼ ଆକ୍ରମଣ । ଗତ ଏପ୍ରିଲରେ ଏହା ଇସ୍ରାଏଲ ଉପରେ ପ୍ରାୟ ୩୦୦ ମିସାଇଲ ଓ ଡ୍ରୋନ୍ ମାଡ଼ କରିଥିଲା । ସଦ୍ୟ ଆକ୍ରମଣ ପରେ ଇରାନକୁ କଡ଼ା ଚେତାବନୀ ଦେଇଛି ଇସ୍ରାଏଲ । ଇରାନ ବହୁତ ବଡ଼ ଭୁଲ କରିଦେଲା ବୋଲି ପ୍ରଧାନମନ୍ତ୍ରୀ ନେତନ୍ୟାହୁ କହିଛନ୍ତି । ଆକ୍ରମଣର ଭୟଙ୍କର ମୂଲ୍ୟ ଇରାନକୁ ଦେବାକୁ ପଡ଼ିବ ବୋଲି ଚେତାବନୀ ଦେଇଛନ୍ତି ।
ଅନ୍ୟପକ୍ଷେ, ଇରାନ ମଧ୍ୟ ପାଲଟା ଧମକ ଦେଇଛି । କହିଛି- ତାକୁ ଯଦି ଟାର୍ଗେଟ୍ କରାଯାଏ, ଏହାଠୁ ବଡ଼ ଆକ୍ରମଣ ମାଧ୍ୟମରେ ଜବାବ ଦେବ । ଏଭଳି ସ୍ଥିତିରେ କ୍ଷେତ୍ରୀୟ ଅସ୍ଥିରତା ଗମ୍ଭୀର ହେଉଥିବାରୁ ତୁରନ୍ତ ଯୁଦ୍ଧବିରତି ଲାଗି ଜାତିସଂଘ ଉଭୟ ଦେଶକୁ ଆହ୍ୱାନ ଦେଇଛି । ଉଭୟ ଇସ୍ରାଏଲ ଓ ଇରାନ ପ୍ରମୁଖ କ୍ଷେତ୍ରୀୟ ସାମରିକ ଶକ୍ତି । ଇସ୍ରାଏଲ ସେନାର ସଂଖ୍ୟା ଅପେକ୍ଷାକୃତ କମ୍ କିନ୍ତୁ ବୈଷୟିକ ଦୃଷ୍ଟିରୁ ଏହା ଖୁବ୍ ଉନ୍ନତ ଓ ସୁସଜ୍ଜିତ । ଇରାନର ସୈନ୍ୟବଳ ଅଧିକ କିନ୍ତୁ ମାନବଯୁକ୍ତ ଉଡ୍ଡୟନ ଓ ଅସ୍ତ୍ରଶସ୍ତ୍ର କ୍ଷେତ୍ରରେ ଏହା ପୁରୁଣା ଟେକ୍ନୋଲୋଜି ଉପରେ ନିର୍ଭରଶୀଳ । ୨୦୨୩ ମସିହା ରିପୋର୍ଟ ଅନୁସାରେ, ଇସ୍ରାଏଲର ସାମରିକ ବଜେଟ୍ ୧୯.୨ ବିଲିଅନ୍ ଡଲାର । ଅନ୍ୟପକ୍ଷେ, ଇରାନର ୭.୪ ବିଲିଅନ୍ ଡଲାର ।
ସୈନ୍ୟ ଶକ୍ତି
ଇସ୍ରାଏଲର ମୋଟ୍ ୧୬୦,୦୦୦ ସକ୍ରିୟ ସୈନ୍ୟ ଅଛନ୍ତି । ଏଥିସହ ୪୬୫,୦୦୦ ସଂରକ୍ଷିତ ଓ ୩୫ ହଜାର ପାରାମିଲିଟାରୀ ଫୋର୍ସର ସମର୍ଥନ ରହିଛି । ଏହା ତୁଳନାରେ ଇରାନର ସୈନ୍ୟ ବଳ ବହୁତ ଅଧିକ । ୬୧୦,୦୦୦ ସକ୍ରିୟ ସୈନ୍ୟଙ୍କ ସମେତ ଏହା ପାଖରେ ୩୫୦,୦୦୦ ସଂରକ୍ଷିତ ଓ ୨୨୦,୦୦୦ ପାରାମିଲିଟାରୀ ଫୋର୍ସ ଅଛି ।
ବାୟୁ ଶକ୍ତି
ଇସ୍ରାଏଲ ପାଖରେ ୬୧୨ ବିମାନ ଅଛି । ତନ୍ମଧ୍ୟରେ ୨୪୧ ଫାଇଟର ଜେଟ୍, ୧୪୬ ହେଲିକପ୍ଟର ଓ ୪୮ ଆଟାକ୍ ହେଲିକପ୍ଟର ରହିଛି । ୧୫୫ ଟ୍ରେନର୍ ବିମାନ, ୧୪ ଏରିଏଲ ଟ୍ୟାଙ୍କର୍ ବି ସାମିଲ । ଅନ୍ୟପକ୍ଷେ, ଇରାନ ପାଖରେ ମୋଟ୍ ୫୫୧ ବିମାନ ଅଛି । ୧୮୬ ଫାଇଟର ଜେଟ୍ ଓ ୧୨୯ ହେଲିକପ୍ଟର ରହିଛି । ତନ୍ମଧ୍ୟରୁ ୧୩ ଆଟାକ୍ ହେଲିକପ୍ଟର ରହିଛି । ୧୦୨ ଟ୍ରେନର୍ ବିମାନ ଓ ୭ ଏରିଏଲ ଟ୍ୟାଙ୍କର୍ ସାମିଲ । ସୂଚନାଯୋଗ୍ୟ, ଇସ୍ରାଏଲର ବାୟୁ ଶକ୍ତିରେ ୨୩ ସ୍ପେଶାଲ-ମିଶନ୍ ବିମାନ ସାମିଲ, ଯାହା ବାୟୁମାର୍ଗରେ ଏହାର ଯୁଦ୍ଧ ଦକ୍ଷତାକୁ ବଢ଼ାଉଛି । ଅନ୍ୟପକ୍ଷେ, ଇରାନର ବାୟୁ ଶକ୍ତିରେ ୧୦ ସ୍ପେଶାଲ-ମିଶନ ବିମାନ ରହିଛି ।
ଭୂ-ଶକ୍ତି
ଭୂ-ଶକ୍ତି ବିଭାଗରେ ଇସ୍ରାଏଲ ପାଖରେ ୧,୩୭୦ ଟ୍ୟାଙ୍କ୍ ଓ ୪୩,୪୦୭ ସଶସ୍ତ୍ର ଯାନ ସାମିଲ । ଏଥିସହ ୬୫୦ ସ୍ୱୟଂଚାଳିତ ତୋପଖାନା ୟୁନିଟ୍ ଓ ୧୫୦ ରକେଟ୍ ତୋପଖାନା ସିଷ୍ଟମ୍ ରହିଛି । ଅନ୍ୟପକ୍ଷେ, ଇରାନ ଟ୍ୟାଙ୍କ୍ ମାମଲାରେ ଇସ୍ରାଏଲକୁ ପଛରେ ପକାଇଛି । ଏହା ପାଖରେ ୧,୯୯୬ ଟ୍ୟାଙ୍କ୍ ଏବଂ ୬୫,୭୬୫ ସଶସ୍ତ୍ର ବାହନ ରହିଛି । ୫୮୦ ସ୍ୱୟଂଚାଳିତ ତୋପଖାନା ୟୁନିଟ୍ ଏବଂ ୭୭୫ ରକେଟ୍ ତୋପଖାନା ସିଷ୍ଟମ୍ ରହିଛି ।
ନୌ-ଶକ୍ତି
ଇସ୍ରାଏଲର ନୌସେନା କ୍ଷମତା ଅପେକ୍ଷାକୃତ ସୀମିତ । ଏହା ପାଖରେ ଆଦୌ ଫ୍ରିଗେଟ୍ ନ ଥିବାବେଳେ ମାତ୍ର ୫ ବୁଡ଼ାଜାହାଜ ରହିଛି । ୭ କୋର୍ଭେଟ୍ ଓ ୪୫ ପେଟ୍ରୋଲ ଜାହାଜ ସାମିଲ । ଅନ୍ୟପକ୍ଷେ, ଇରାନ ପାଖରେ ୭ ଫ୍ରିଗେଟ୍, ୩ ବୁଡ଼ାଜାହାଜ, ୧୯ ପେଟ୍ରୋଲ ଜାହାଜ ଏବଂ ଗୋଟିଏ ମାଇନ୍ ୱାରଫେୟାର ଜାହାଜ ଅଛି, ଯାହା ତା’ର ଶକ୍ତିଶାଳୀ ନୌଶକ୍ତିର ଉପସ୍ଥିତିକୁ ଦର୍ଶାଏ ।