ନୂଆଦିଲ୍ଲୀ,୦୪/୧୦: ଇସ୍ରାଏଲ ଭାରତ ମାଧ୍ୟମରେ ଇରାନକୁ ଏକ ବାର୍ତ୍ତା ପଠାଇଛି, ଏହି ବାର୍ତ୍ତାରେ ତେହେରାନକୁ ସଂଯମତା ଏବଂ ସତର୍କତା ଅବଲମ୍ବନ କରିବାକୁ କୁହାଯାଇଛି। ଭାରତରେ ଇସ୍ରାଏଲର ରାଷ୍ଟ୍ରଦୂତ ରୁବିନ୍ ରୁବେନ୍ ଅଜହର କହିଛନ୍ତି ଯେ ଯେଉଁ ଦେଶ ମାଧ୍ୟମରେ ଇସ୍ରାଏଲ ଇରାନକୁ ବାର୍ତ୍ତା ପଠାଇଛନ୍ତି ସେହି ଦେଶ ମଧ୍ୟରେ ଭାରତ ଅଛି। ସେ କହିଛନ୍ତି ଯେ ଇରାନର ବର୍ତ୍ତମାନ ଆକ୍ରମଣ ଉତ୍ତେଜନାକୁ ବଢ଼ାଇବାକୁ ଯାଉଛି ତେଣୁ ଆମେ ସେମାନଙ୍କୁ ଚେତାବନୀ ଦେଇଛୁ। ଫାର୍ଷ୍ଟପୋଷ୍ଟକୁ ଦେଇଥିବା ଏକ ସାକ୍ଷାତକାରରେ ରୁବିନ୍ ଏପରି କିଛି କହିଛନ୍ତି।

ଫର୍ଷ୍ଟପୋଷ୍ଟ ରିପୋର୍ଟ ଅନୁଯାୟୀ ରୁବିନ୍ କହିଛନ୍ତି ଯେ 'ଆମେ ଭାରତ ସମେତ ଅନେକ ଦେଶ ମାଧ୍ୟମରେ ବାର୍ତ୍ତା ପଠାଇଛୁ। ଆମେ ଇରାନକୁ କହିଛୁ ଯେ ସେମାନେ ଇସ୍ରାଏଲ ଉପରେ ଆକ୍ରମଣ କରିବା ଉଚିତ ନୁହେଁ କାରଣ ଏଥିପାଇଁ ବହୁ ପରିଣାମ ଭୋଗିବାକୁ ପଡ଼ିବ। ଇସ୍ରାଏଲ୍ ରାଷ୍ଟ୍ରଦୂତଙ୍କ ଏହି ବିବୃତ୍ତିରୁ ଜଣାପଡ଼ୁଛି ଯେ, ବିବାଦ ହ୍ରାସ କରିବାରେ ଭାରତର ଭୂମିକା ଗୁରୁତ୍ୱପୂର୍ଣ୍ଣ ହୋଇପାରେ। ଉଭୟ ଇରାନ ଏବଂ ଇସ୍ରାଏଲ ସହିତ ଭାରତର ସାଧାରଣ ସମ୍ପର୍କ ରହିଛି।

ରୁବିନ୍ ଆହୁରି କହିଛନ୍ତି, 'ଇସ୍ରାଏଲ ଦୀର୍ଘ ସମୟ ଧରି ଇରାନରୁ ଆକ୍ରମଣର ସମ୍ମୁଖୀନ ହୋଇଛି, ଏହି ଆକ୍ରମଣ ତେହେରାନର ଇସ୍ରାଏଲକୁ ଧ୍ୱଂସ କରିବାର ଚିନ୍ତାଧାରା ଦ୍ୱାରା ଅନୁପ୍ରାଣିତ ହୋଇଛି। ବିଶ୍ୱ ମଧ୍ୟ ଏଥିପ୍ରତି ଧ୍ୟାନ ଦେଇନାହିଁ। ତେହେରାନ ଉପରେ ଆନ୍ତର୍ଜାତୀୟ ସମ୍ପ୍ରଦାୟର ଚାପ ନୈରାଶ୍ୟଜନକ। ତେବେ ଆତଙ୍କବାଦ ବିରୋଧରେ ଭାରତର ଦୃଢ଼ ଆଭିମୁଖ୍ୟକୁ ସେ ପ୍ରଶଂସା କରିଛନ୍ତି।