ନୂଆଦିଲ୍ଲୀ: ଇସ୍ରାଏଲର ଆକ୍ରମଣ ପରଠାରୁ ଇରାନର ସୁରକ୍ଷା ଏଜେନ୍ସିଗୁଡ଼ିକ ଦେଶରେ ଥିବା ମୋସାଦ ଏଜେଣ୍ଟମାନଙ୍କୁ ଧରିବା ପାଇଁ ଏକ ଅଭିଯାନ ଚଳାଇଛନ୍ତି । ଜୁନ୍ ମାସରୁ ଡଜନେରୁ ଅଧିକ ଏଜେଣ୍ଟଙ୍କୁ ଗିରଫ କରାଯାଇଛି ଏବଂ କେତେକଙ୍କୁ ମୃତ୍ୟୁଦଣ୍ଡ ମଧ୍ୟ ଦିଆଯାଇଛି । ଇରାନର ନ୍ୟାୟପାଳିକା ଅନୁସାରେ, କିଛି ମାସ ମଧ୍ୟରେ ମୋସାଦର ୨୦ ଜଣ ସନ୍ଦିଗ୍ଧ ଗୁପ୍ତଚରଙ୍କୁ ଗିରଫ କରାଯାଇଛି । ସେମାନଙ୍କ ପ୍ରତି କୌଣସି ପ୍ରକାରର ଅନୁକମ୍ପା ଦେଖାଯିବ ନାହିଁ ଏବଂ ସେମାନଙ୍କୁ ଏକ କଠୋର ଦଣ୍ଡ ଦିଆଯିବ ।
ସରକାରୀ ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି ଯେ, ଇରାନ ବୁଧବାର ଦିନ ରୁଜବେହ ୱାଦି ନାମକ ଜଣେ ପରମାଣୁ ବୈଜ୍ଞାନିକଙ୍କୁ ମୃତ୍ୟୁଦଣ୍ଡ ଦେଇଛି । ସେ ଇସ୍ରାଏଲ ପାଇଁ ଗୁଇନ୍ଦାଗିରି କରୁଥିଲେ । ଜୁନ୍ ମାସରେ ଇରାନରେ ହୋଇଥିବା ଇସ୍ରାଏଲୀ ବିମାନ ଆକ୍ରମଣରେ ମୃତ୍ୟୁବରଣ କରିଥିବା ଆଉ ଜଣେ ପରମାଣୁ ବୈଜ୍ଞାନିକଙ୍କ ବିଷୟରେ ସୂଚନା ପ୍ରଦାନ କରିଥିଲେ । ସେପଟେ ସମସ୍ତ ସନ୍ଦିଗ୍ଧଙ୍କୁ ଦଣ୍ଡ ଦିଆଯାଉ ନାହିଁ । ଅଭିଯୋଗ ଭୁଲ ପ୍ରମାଣିତ ହେଲେ ଇରାନର କୋର୍ଟ ସେମାନଙ୍କୁ ମୁକ୍ତ ମଧ୍ୟ କରୁଛନ୍ତି ।
ନ୍ୟାୟପାଳିକା ମୁଖପାତ୍ର ଅସଗର ଜାହାଙ୍ଗିରି ତେହେରାନରେ ଗଣମାଧ୍ୟମକୁ କହିଛନ୍ତି ଯେ, ଗିରଫ ହୋଇଥିବା ୨୦ ଜଣ ସନ୍ଦିଗ୍ଧଙ୍କ ମଧ୍ୟରୁ କେତେ ଜଣଙ୍କ ଅଭିଯୋଗ ପ୍ରତ୍ୟାହାର କରାଯାଇଛି ଏବଂ ସେମାନଙ୍କୁ ମୁକ୍ତ କରାଯାଇଛି । ଇରାନର ନ୍ୟାୟାଳୟ ଇସ୍ରାଏଲର କୌଣସି ଗୁପ୍ତଚର ଏବଂ ଏଜେଣ୍ଟଙ୍କ ପ୍ରତି ନମ୍ରତା ଦେଖାଇବ ନାହିଁ । ତଦନ୍ତ ସମାପ୍ତ ହେବା ପରେ ସମ୍ପୂର୍ଣ୍ଣ ବିବରଣୀ ସାର୍ବଜନୀନ କରାଯିବ । ଏହି ବର୍ଷ ଇସ୍ରାଏଲ ପାଇଁ ଗୁପ୍ତଚର କାର୍ଯ୍ୟ ପାଇଁ ଦୋଷୀ ସାବ୍ୟସ୍ତ ଇରାନୀୟ ନାଗରିକଙ୍କୁ ମୃତ୍ୟୁଦଣ୍ଡ ଦେବା ସଂଖ୍ୟାରେ ଉଲ୍ଲେଖନୀୟ ବୃଦ୍ଧି ଘଟିଛି ।
ଗତ କିଛି ମାସ ମଧ୍ୟରେ ଅତି କମରେ ଆଠ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି। ସୂଚନାଯୋଗ୍ୟ ଯେ, ଜୁନ୍ ମାସରେ ଇସ୍ରାଏଲ ଦ୍ୱାରା କରାଯାଇଥିବା ଆକ୍ରମଣରେ ପ୍ରାୟ ୩୦ ଜଣ ଇରାନ ବୈଜ୍ଞାନିକଙ୍କ ମୃତ୍ୟୁ ହୋଇଥିଲା । ଇସ୍ରାଏଲ ଏଜେଣ୍ଟମାନଙ୍କ ଦ୍ୱାରା ପ୍ରଦାନ କରାଯାଇଥିବା ଗୁଇନ୍ଦା ସୂଚନା ଆଧାରରେ ଏହି ଆକ୍ରମଣ କରାଯାଇଥିଲା। ଏହା ସହିତ, ଇରାନ ଭିତରେ ଏହି ଏଜେଣ୍ଟମାନେ ବହୁ ଆକ୍ରମଣ କରିଥିଲେ ।
