ନୂଆଦିଲ୍ଲୀ,୦୯/୦୮:ଆଫ୍ରିକାର କେନିଆରେ ମର୍ମନ୍ତୁଦ ସଡ଼କ ଦୁର୍ଘଟଣା । ଭାରସାମ୍ୟ ହରାଇ ଖାଇକୁ ଖସିଲା ବସ। ଫଳରେ ୨୧ ଜଣଙ୍କ ମୃତ୍ୟୁ ହୋଇଛି। ବସ ଯୋଗେ ସମସ୍ତ ମୃତକ ପଶ୍ଚିମ ସହର କାକାମେଗାରୁ ଏକ ଅନ୍ତିମ ସଂସ୍କାର ସାରି କିସୁମୁ ସହରକୁ ଫେରୁଥିବା ବେଳେ ଏହି ଘଟଣା ଘଟିଛି।
ପୁଲିସର ସୂଚନା ମୁତାବକ, ଦକ୍ଷିଣ-ପଶ୍ଚିମ କେନିଆରେ ଏକ ଅନ୍ତିମ ସଂସ୍କାରରୁ ବସ୍ ଯୋଗେ ସେମାନେ ଘରକୁ ଫେରୁଥିଲେ। ହେଲେ ଶୁକ୍ରବାର ସନ୍ଧ୍ୟାରେ ବସଟି ଭାରସାମ୍ୟ ହରାଇ ଓଲଟି ପଡ଼ି ଏକ ଖାଇକୁ ଖସି ପଡ଼ିଥିଲା। ଯେଉଁଥିରେ ଅତି କମରେ ୨୧ ଜଣଙ୍କର ମୃତ୍ୟୁ ହୋଇଛି।ମୃତକଙ୍କ ମଧ୍ୟରେ ୧୦ ଜଣ ମହିଳା, ୧୦ ଜଣ ପୁରୁଷ ଏବଂ ଜଣେ ୧୦ ବର୍ଷର ଝିଅ ଅଛନ୍ତି।ସ୍ଥାନୀୟ ପୁଲିସ ଅଧିକାରୀ ପିଟର ମାଇନାଙ୍କ ଅନୁଯାୟୀ, ବସ୍ ଟି ଦ୍ରୁତ ଗତିରେ ଏକ ବୁଲାଣି ନିକଟରେ ପହଞ୍ଚିବା ବେଳକୁ ଡ୍ରାଇଭର ନିୟନ୍ତ୍ରଣ ହରାଇଲେ ଏବଂ ବସ୍ ଟି ଖାଇକୁ ଖସି ପଡ଼ିଲା। କେନିଆ ଏବଂ ପୂର୍ବ ଆଫ୍ରିକୀୟ ଅଞ୍ଚଳରେ ସଡ଼କ ଦୁର୍ଘଟଣା ସାଧାରଣ, ଯେଉଁଠାରେ ରାସ୍ତାଗୁଡ଼ିକ ପ୍ରାୟତଃ ସଂକୀର୍ଣ୍ଣ ଏବଂ ଖରାପ ଏବଂ ଅନେକ ଗାତ ଥାଏ। ପୁଲିସ ପ୍ରାୟତଃ ସଡ଼କ ଦୁର୍ଘଟଣା ପାଇଁ ଦ୍ରୁତ ଗତିରେ ଗାଡି ଚାଳନା କରୁଥିବା ଚାଳକମାନଙ୍କୁ ଏଥିପାଇଁ ଦାୟୀ କରିଥାଏ।ଗୁରୁବାର ଦିନ ମଧ୍ୟ ଅନ୍ୟ ଏକ ଦୁର୍ଘଟଣା ହୋଇଥିଲା । ନାକୁରୁ କାଉଣ୍ଟିର ନାଇଭାସା ସହରରେ ଏକ ବସ୍ ଦୁର୍ଘଟଣାରେ ୯ ଜଣଙ୍କର ମୃତ୍ୟୁ ହୋଇଥିଲା।
