ଢାକା,୧୮/୦୪: ଚଳିତ ଆଇପିଏଲ୍ରେ ଚେନ୍ନାଇ ସୁପରକିଙ୍ଗ୍ସ ପକ୍ଷରୁ ଖେଳୁଥିବା ବାମହାତି ପେସ୍ ବୋଲର ମୁସ୍ତାଫିଜୁର ରେହମାନଙ୍କୁ ସ୍ୱଦେଶ ଫେରାଇ ଆଣିବାକୁ ବାଂଲାଦେଶ କ୍ରିକେଟ୍ ବୋର୍ଡ ନିଷ୍ପତ୍ତି ନେଇଛି । ଆସନ୍ତା ମାସ ୨ ତାରିଖ ସୁଦ୍ଧା ତାଙ୍କୁ ସ୍ୱଦେଶରେ ପହଞ୍ଚିବାକୁ ନିର୍ଦ୍ଦେଶ ଦିଆଯାଇଛି । ୩ତାରିଖରୁ ଜିମ୍ବାୱେ ବିପକ୍ଷ ଘରୋଇ ସିରିଜ ଆରମ୍ଭ ହେବ । ବାଂଲାଦେଶ କ୍ରିକେଟ୍ ବୋର୍ଡର ଏଭଳି ନିଷ୍ପତ୍ତି ସୁପରକିଙ୍ଗ୍ସକୁ ଚକିତ କରିଛି । ସେ ଇତିମଧ୍ୟରେ ସୁପରକିଙ୍ଗ୍ସ ପକ୍ଷରୁ ୫ଟି ମ୍ୟାଚ୍ ଖେଳି ୧୦ଟି ୱିକେଟ୍ ନେଇ ସାରିଛନ୍ତି ।
ବାଂଲାଦେଶ କ୍ରିକେଟ୍ ବୋର୍ଡ ପ୍ରମୁଖ ସଦସ୍ୟ ଜଲାଲ ୟୁନିସ କହିଛନ୍ତି, ମୁସ୍ତାଫିଜୁର ଆଇପିଏଲ୍ରୁ କିଛି ଶିଖିପାରିବେ ନାହିଁ । ତାଙ୍କ ଶିଖିବା ସମୟ ଶେଷ ହୋଇଛି । ବରଂ ତାଙ୍କ ଠାରୁ ଭାରତର ଯୁବ ବୋଲରମାନେ ଶିଖିବାକୁ ସୁଯୋଗ ପାଇବେ । ଏଥିରେ ବାଂଲାଦେଶ ଲାଭବାନ ହେବ ନାହିଁ । ଆଗକୁ ଟି-ଟ୍ୱେଣ୍ଟି ବିଶ୍ୱକପ୍ ରହିଥିବାରୁ ମୁସ୍ତାଫିଜୁରଙ୍କ ଫିଟ୍ନେସ୍ ଆମ ପାଇଁ ଗୁରୁତ୍ୱପୂର୍ଣ୍ଣ । ସେମାନେ(ସୁପରକିଙ୍ଗ୍ସ) ମୁସ୍ତାଫିଜୁରଙ୍କୁ ପ୍ରବଳ ଖଟାଉଛନ୍ତି । ତାଙ୍କ କାର୍ଯ୍ୟଭାରକୁ ନେଇ ସେମାନେ ଚିନ୍ତିତ ନୁହନ୍ତି ।
ସୂଚନାଯୋଗ୍ୟ, ମୁସ୍ତାଫିଜୁର ସ୍ୱଦେଶ ଫେରିବା ପୂର୍ବରୁ ୧୯ ଓ ୨୩ ତାରିଖରେ ଲକ୍ଷ୍ନୌ ସୁପରଜାଏଣ୍ଟ୍ସ, ୨୮ତାରିଖରେ ସନରାଇଜର୍ସ ହାଇଦ୍ରାବାଦ ଓ ମେ ୧ ତାରିଖରେ ପଞ୍ଜାବ କିଙ୍ଗ୍ସ ବିପକ୍ଷ ମ୍ୟାଚ୍ ଖେଳିବେ ।