ଚେନ୍ନାଇ, ୧।୫: ଚଳିତ ଆଇପିଏଲର ୪୯ତମ ଲିଗ୍ ମୁକାବିଲାରେ ଆସନ୍ତା କାଲି ଡିଫେଣ୍ଡିଂ ଚାମ୍ପିଅନ୍ ଚେନ୍ନାଇ ସୁପରକିଙ୍ଗ୍ସ ଓ ପଞ୍ଜାବ କିଙ୍ଗ୍ସ ପରସ୍ପରକୁ ଭେଟିବାକୁ ଯାଉଛନ୍ତି । ଗତ ଦୁଇ ବର୍ଷ ଭଳି ସୁପରକିଙ୍ଗ୍ସ ବିପକ୍ଷରେ ଆଧିପତ୍ୟ ଜାରି ରଖିବାକୁ ପଞ୍ଜାବ କିଙ୍ଗ୍ସ ଯୋଜନା କରୁଛି । ମାତ୍ର ସୁପରକିଙ୍ଗ୍ସ ପ୍ରତିଶୋଧ ଅପେକ୍ଷାରେ ରହିଛି । ଗତ ୧୬ ବର୍ଷ ମଧ୍ୟରେ ଥରେ ହେଲେ ଟାଇଟଲ ଜିତି ନଥିଲେ ହେଁ ପଞ୍ଜାବ କିଙ୍ଗ୍ସ ଜାଏଣ୍ଟ କିଲର ଭାବେ ପ୍ରମାଣିତ କରିଛି । ଉଭୟ ଦଳ ମଧ୍ୟରେ ଅନୁଷ୍ଠିତ ଶେଷ ୫ଟି ମ୍ୟାଚ୍ରୁ ପଞ୍ଜାବ କିଙ୍ଗ୍ସ ୪ଟି ମ୍ୟାଚ ଜିତିଛି । ୨୦୨୨ରେ ଦଳ ୨ଟି ଯାକ ମ୍ୟାଚ୍ ଜିତିଥିଲା । ଗତ ବର୍ଷ ଉଭୟ ଥରେ ମାତ୍ର ସାମ୍ନା ସାମ୍ନି ହୋଇଥିଲେ ଓ ପଞ୍ଜାବ କିଙ୍ଗ୍ସ ବିଜୟୀ ହୋଇଥିଲା । ଗତ ୨୬ ତାରିଖରେ ଅନୁଷ୍ଠିତ ନାଇଟ୍ ରାଇଡର୍ସ ବିପକ୍ଷ ମ୍ୟାଚ୍ରେ ୨୬୨ ରନ୍ର ବିଶାଳ ଲକ୍ଷ୍ୟକୁ ୮ଟି ବଲ୍ ବାକି ଥାଇ ହାସଲ କରିବା ପରେ ପଞ୍ଜାବ କିଙ୍ଗସ୍ର ମନୋବଳ ଏବେ ଶିଖର ଛୁଇଁଛି ।
ଆଜି ମଧ୍ୟ ବିପର୍ଯ୍ୟୟ ଘଟାଇବାକୁ ଦଳ ପ୍ରସ୍ତୁତ ରହିଛି । ପୂର୍ବ ରେକର୍ଡ ସୁପରକିଙ୍ଗ୍ସ ପକ୍ଷରେ ରହିଛି । ଉଭୟ ଦଳ ପରସ୍ପରକୁ ୨୮ଥର ଭେଟିଛନ୍ତି । ଏଥିରୁ ସୁପରକିଙ୍ଗ୍ସ ୧୫ଟି ମ୍ୟାଚ୍ ଜିତିଥିବା ବେଳେ ପଞ୍ଜାବ କିଙ୍ଗ୍ସକୁ ୧୩ଟି ମ୍ୟାଚ୍ରେ ବିଜୟ ମିଳିଛି । ସନରାଇଜର୍ସ ବିପକ୍ଷରେ ବିଜୟ ପରେ ଦଳ ପୁନର୍ବାର ଲୟକୁ ଫେରିଛି । ପ୍ରତ୍ୟେକ ଖେଳାଳି ଫିଟ ଓ ଫର୍ମରେ ରହିଛନ୍ତି । ତେଣୁ ଏକାଦଶରେ ମଧ୍ୟ ପରିବର୍ତ୍ତନ ସମ୍ଭାବନା ନାହିଁ । ପଞ୍ଜାବ କିଙ୍ଗ୍ସ ପାଇଁ ବିଜୟ ଜରୁରି ହୋଇ ଯାଇଛି । ୯ଟି ମ୍ୟାଚ୍ ଖେଳି ଦଳ ୩ଟି ବିଜୟ ସହ ୬ ପଏଣ୍ଟ ହାସଲ କରିଛି । ପ୍ଲେ ଅଫ୍ରେ ପ୍ରବେଶ କରିବାକୁ ହେଲେ ଶେଷ ୬ଟି ମ୍ୟାଚ୍ରୁ ଅତି କମ୍ରେ ୪ଟି ମ୍ୟାଚ୍ ଜିତିବାକୁ ହେବ । ତେଣୁ ସବୁ ତ୍ରୁଟିକୁ ପଛରେ ପକାଇ ଦଳ ଆସନ୍ତା କାଲି ଶ୍ରେଷ୍ଠ ପ୍ରଦର୍ଶନ କରିବାକୁ ପ୍ରୟାସ କରିବ । ଶିଖର ଧାୱନ ଫିଟ୍ ଘୋଷିତ ହେଲେ ବୁଧବାର ଏକାଦଶକୁ ଫେରିବେ । ନଚେତ ଦଳ ଅପରିବର୍ତ୍ତିତ ରହିବ ।
ବୁଧବାର ଦୁଇ ଯୁବ ବ୍ୟାଟର ଶଶାଙ୍କ ସିଂହ ଓ ଆଶୁତୋଶ ଶର୍ମାଙ୍କ ଉପରେ ନଜର ରହିବ । ଉଭୟ ବିସ୍ଫୋରକ ବ୍ୟାଟିଂ କରି ଅଗଣିତ ପ୍ରଶଂସକ ସୃଷ୍ଟି କରିଛନ୍ତି । ସେହିପରି ସୁପରକିଙ୍ଗ୍ସର ପେସ୍ ବୋଲିଂ ବିଭାଗ ପ୍ରତି ପଞ୍ଜାବ କିଙ୍ଗ୍ସକୁ ସତର୍କ ରହିବାକୁ ପଡ଼ିବ । ମଥିଶା ପତିରଣା, ମୁସ୍ତାଫିଜୁର ରେହମାନ, ଦୀପକ ଚହର ଓ ତୁଷାର ଦେଶପାଣ୍ଡେଙ୍କୁ ନେଇ ଗଠିତ ପେସ୍ ବିଭାଗ ଶୃଙ୍ଖଳିତ ବୋଲିଂ କରୁଥିବାବେଳେ ଇମ୍ପାକ୍ଟ ପ୍ଲେୟାର ଭାବେ ସର୍ଦୁଲ ଠାକୁର ଯୋଗ ଦେଇ ଶକ୍ତି ଦ୍ୱିଗୁଣା କରୁଛନ୍ତି । ଚିପକ ଷ୍ଟାଡ଼ିୟମ୍ର ପିଚ୍ ସାମାନ୍ୟ ମନ୍ଥର ରହିବ । ତଥାପି କ୍ରିଜ୍ରେ ଜମିଲେ ବିଶାଳ ସ୍କୋର ସଂଗୃହୀତ ହୋଇପାରିବ । ରାତ୍ରିରେ ମ୍ୟାଚ୍ ଖେଳାଯାଉଥିବାରୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।