ନୂଆଦିଲ୍ଲୀ: ଭାରତରେ ହେବାକୁ ଥିବା ଆସନ୍ତା ୭୬ତମ ସାଧାରଣତନ୍ତ୍ର ଦିବସରେ ମୁଖ୍ୟ ଅତିଥି ଭାବେ ଯୋଗ ଦେବାକୁ ଯାଉଛନ୍ତି ଇଣ୍ଡୋନେସିଆର ରାଷ୍ଟ୍ରପତି ପ୍ରବୋ ସୁବିଆନ୍ତୋ। ଗୁରୁବାର ଏହି ସୂଚନା ଦେଇଛି ବୈଦେଶିକ ବ୍ୟାପାର ମନ୍ତ୍ରଣାଳୟ। ଆସନ୍ତା ଜାନୁଆରି ୨୫ ଓ ୨୬ ତାରିଖରେ ସୁବିଆନ୍ତୋ ଭାରତ ଗସ୍ତରେ ଆସିବେ। ଏହା ତାଙ୍କର ପ୍ରଥମ ଭାରତ ଗସ୍ତ ହେବାକୁ ଯାଉଛି।
ଚଳିତ ବର୍ଷର ସାଧାରଣତନ୍ତ୍ର ଦିବସରେ ମୁଖ୍ୟ ଅତିଥି ଭାବେ ସୁବିଆନ୍ତୋଙ୍କ ଯୋଗଦାନ ଭାରତ ଓ ଇଣ୍ଡୋନେସିଆ ମଧ୍ୟରେ କୂଟନୈତିକ ସମ୍ପର୍କକୁ ମଜବୁତ କରିବ। ଏଣୁ ତାଙ୍କର ଏହି ଯାତ୍ରାକୁ ଅତ୍ୟନ୍ତ ଗୁରୁତ୍ତ୍ୱପୂର୍ଣ୍ଣ ବୋଲି ମନେକରାଯାଉଛି। ତେବେ ଭାରତର ଆକ୍ଟ ଇଷ୍ଟ ପଲିସି ଓ ଇଣ୍ଡୋ-ପେସିଫିକ ନୀତିରେ ଇଣ୍ଡୋନେସିଆ ପ୍ରମୁଖ ଭୂମିକା ଗ୍ରହଣ କରିଛି। ଏଣୁ ଚଳିତ ଥରର ସାଧାରଣତନ୍ତ୍ର ଉତ୍ସବରେ ଇଣ୍ଡୋନେସିଆ ରାଷ୍ଟ୍ରପତିଙ୍କୁ ମୁଖ୍ୟ ଅତିଥି ଭାବେ ନିମନ୍ତ୍ରଣ କରାଯାଇଛି ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ ଘୋଷଣା କରିଛି।
ସୂଚନା ମୁତାବକ, ଭାରତ ପ୍ରତିବର୍ଷ ସାଧାରଣତନ୍ତ୍ର ଦିବସ ଉତ୍ସବରେ ଯୋଗ ଦେବା ପାଇଁ ବିଶ୍ୱ ନେତା ମାନଙ୍କୁ ଆମନ୍ତ୍ରୀତ କରିଥାଏ। ପୂର୍ବ ବର୍ଷ ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋ ମୁଖ୍ୟ ଅତିଥି ରୁପେ ଏହି ଉତ୍ସବରେ ଯୋଗ ଦେଇଥିଲେ। ୨୦୨୩ ମସିହାରେ ମିଶ୍ରର ରାଷ୍ଟ୍ରପତି ଅବ୍ଦେଲ ଫତହା ଅଲ-ସିସି ଏହି ଉତ୍ସବରେ ଯୋଗଦେଇ ଉତ୍ସବର ଗାରିମା ମଣ୍ଡନ କରିଥିଲେ। ୨୦୨୧ ଓ ୨୦୨୨ରେ କୋଭିଡ-୧୯ ମହାମାରୀ କାରଣରୁ ସାଧାରଣତନ୍ତ୍ର ଦିବସରେ କୌଣସି ମୁଖ୍ୟ ଅତିଥି ଏହି ଉତ୍ସବରେ ଯୋଗଦେଇ ନଥିଲେ। ତେବେ ୨୦୨୦ରେ ବ୍ରାଜିଲର ତତ୍କାଳିନ ରାଷ୍ଟ୍ରପତି ଜେର ବୋଲସେନାରେ, ୨୦୧୯ରେ ଦକ୍ଷିଣ ଆଫ୍ରିକାର ତତ୍କାଳିନ ରାଷ୍ଟ୍ରପତି ସିରିଲ ରାମାଫେସା ଓ ୨୦୧୮ରେ ASEAN ଦେଶର ସମସ୍ତ ୧୦ ନେତା ଏହି ଉତ୍ସବରେ ଯୋଗଦେଇ ଥିଲେ।
ଗଣତନ୍ତ୍ର ଦିବସରେ ଭାଗନେଇଥିବା ଅନ୍ୟ ପ୍ରମୁଖ ରାଷ୍ଟ୍ରାଧ୍ୟକ୍ଷ ମାନଙ୍କ ମଧ୍ୟରେ ନିକୋଲସ ସରଫୋଜୀ, ଭ୍ଲାଦିମିର ପୁତିନ, ନେଲସନ ମାଣ୍ଡେଲା, ଜନ ମେଜର, ମହମ୍ମଦ ଖାତମୀ ଓ ଜେକ୍ସ ସିରାଫ ଆଦି ରହିଛନ୍ତି। ୧୯୯୩ ମସିହାରେ ତତ୍କାଳିନ ବ୍ରିଟିଶ ପ୍ରଧାନମନ୍ତ୍ରୀ ଜନ ମେଜର, ୧୯୯୫ ମସିହାରେ ନେଲସନ ମାଣ୍ଡେଲା ଓ ୨୦୧୦ ମସିହାରେ ତତ୍କାଳିନ ଦକ୍ଷିଣ କୋରିଆର ରାଷ୍ଚ୍ରପତି ଲି ମ୍ୟୁଙ୍ଗ ବାକ ମଧ୍ୟ ଏହି ମହାନ ଉତ୍ସବରେ ଯୋଗ ଦେଇ ଏହାର ଗରିମା ମଣ୍ଡନ କରିଥିଲେ।
