ଅହମ୍ମଦାବାଦ,୨୯/୦୩: ଆଇପିଏଲ୍ର ନବମ ଲିଗ୍ ମୁକାବିଲାରେ ଗୁଜରାଟ ଟାଇଟନ୍ସ ଘରୋଇ ଗ୍ରାଉଣ୍ଡ୍ରେ ୫ଥର ଚାମ୍ପିଅନ ମୁମ୍ବାଇ ଇଣ୍ଡିଆନ୍ସକୁ ଭେଟିବ । ଉଭୟ ନିଜ ନିଜର ପ୍ରଥମ ମ୍ୟାଚ୍ ପରାଜିତ ହୋଇଥିବାରୁ ଆଜି ବିଜୟ ଖାତା ଖୋଲିବାକୁ ଉତ୍ସୁକତାର ସହ ଅପେକ୍ଷା କରିଛନ୍ତି । ପ୍ରଥମ ମ୍ୟାଚ୍ ଖେଳିନଥିବା ମୁମ୍ବାଇ ଇଣ୍ଡିଆନ୍ସ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଆଜି ଏକାଦଶକୁ ଫେରିବେ । ୨୦୨୨ ଓ ୨୩ ସିଜନରେ ସେ ଗୁଜରାଟ ଟାଇଟନ୍ସ ଦଳର ନେତୃତ୍ୱ ନେଇଥିଲେ । ପ୍ରଥମ ବର୍ଷ ଟାଇଟନ୍ସ ଚାମ୍ପିଅନ ଓ ପରବର୍ଷ ରନର୍ସ ଅପ ହୋଇଥିଲା।
ଉଭୟ ଦଳ ପରସ୍ପରକୁ ୫ଥର ଭେଟିଛନ୍ତି । ଏଥିରୁ ଟାଇଟନ୍ସ ୩ଟି ଓ ମୁମ୍ବାଇ ଇଣ୍ଡିଆନ୍ସ ୨ଟି ମ୍ୟାଚ ଜିତିଛନ୍ତି । ତେଣୁ ପୂର୍ବ ରେକର୍ଡକୁ ଦେଖି ମ୍ୟାଚ୍ର ପୂର୍ବାନୁମାନ କରିହେବ ନାହିଁ । ୨୦୨୨ ସଂସ୍କରଣ ଓ ଏ ବର୍ଷର ଦଳ ମଧ୍ୟରେ ବେଶ୍ ଫରକ ରହିଛି । ଟାଇଟନ୍ସକୁ ଚାମ୍ପିଅନ କରାଇଥିବା ହାର୍ଦ୍ଦିକ ପାଣ୍ଡ୍ୟା ଏବେ ମୁମ୍ବାଇ ଇଣ୍ଡିଆନ୍ସ ଅଧିନାୟକ । ଶୁଭମନ ଗିଲଙ୍କ ନେତୃତ୍ୱରେ ଟାଇଟନ୍ସ ଓ ପାଣ୍ଡ୍ୟାଙ୍କ ନେତୃତ୍ୱରେ ମୁମ୍ବାଇ ଇଣ୍ଡିଆନ୍ସ ଗତ ବର୍ଷ ନୈରାଶ୍ୟଜନକ ପ୍ରଦର୍ଶନ କରିଥିଲା । ମାତ୍ର ଏଥର ଉଭୟ ଅଧିନାୟକ ଏଥର ନିଜ ନିଜ ଦଳକୁ ସହଜରେ ପ୍ଲେ-ଅଫରେ ପହଞ୍ଚାଇବାକୁ ଉଦ୍ୟମ କରିବେ ।
ଚେନ୍ନାଇ ସୁପରକିଙ୍ଗ୍ସ ବିପକ୍ଷ ମ୍ୟାଚ୍କୁ ଦେଖିଲେ ମୁମ୍ବାଇ ଇଣ୍ଡିଆନ୍ସର ବ୍ୟାଟିଂ ବିଭାଗ ସମ୍ପୂର୍ଣ୍ଣ ପରିବର୍ତ୍ତନ ହୋଇସାରିଛି । ରୋହିତ ଶର୍ମାଙ୍କ ସହ ଓପନ କରୁଥିବା ର୍ୟାନ୍ ରିକେଲଟନ ନୂଆ । ୩ନଂ ସ୍ଥାନରେ ସୂର୍ଯ୍ୟକୁମାର ଓ ୪ନଂ ସ୍ଥାନରେ ତିଳକ ବର୍ମା ବ୍ୟାଟିଂ କରୁଥିଲେ । ମାତ୍ର ଏଥର ୱିଲ ଜ୍ୟାକ୍ସଙ୍କୁ ୩ନଂ ସ୍ଥାନରେ ବ୍ୟାଟିଂ କରାଯାଇ ଉଭୟ ସୂର୍ଯ୍ୟକୁମାର ଓ ତିଳକଙ୍କୁ ତଳକୁ ପଠା ଯାଇଛି । ଯାହା ବ୍ୟାଟିଂ ବିଭାଗକୁ ପ୍ରଭାବିତ କରୁଥିବା ଅନୁମାନ କରାଯାଉଛି ।
ଟାଇଟନ୍ସ ବ୍ୟାଟିଂ ବିଭାଗର ପ୍ରଥମ ୩ଟି ସ୍ଥାନକୁ ଛାଡ଼ିଦେଲେ ସମ୍ପୂର୍ଣ୍ଣ ମଧ୍ୟ କ୍ରମ ନୂଆ । ମାତ୍ର ବୋଲିଂ ବିଭାଗ ବେଶ୍ ଶକ୍ତିଶାଳୀ । କାଗିସୋ ରାବାଡା, ପ୍ରସିଦ୍ଧ କ୍ରିଷ୍ଣା ଓ ମହମ୍ମଦ ସିରାଜ ପେସ୍ ବୋଲିଂ ବିଭାଗ ସମ୍ଭାଳୁଛନ୍ତି । ସ୍ପିନ ବିଭାଗରେ ରସିଦ ଖାନ୍ ମୁଖ୍ୟ ଅସ୍ତ୍ର ଥିବାବେଳେ ଆର ସାଇ କିଶୋର ମଧ୍ୟ ଘାତକ ସାବ୍ୟସ୍ତ ହୋଇଛନ୍ତି ।
ଆଜି ଗିଲ୍ ଓ ସୂର୍ଯ୍ୟକୁମାରଙ୍କ ଉପରେ ନଜର ରହିବା ସ୍ୱାଭାବିକ । ଗିଲ୍ ଭାରତୀୟ ଟି-ଟ୍ୱେଣ୍ଟି ଦଳକୁ ଫେରିବାକୁ ପ୍ରୟାସ ଚଳାଇ ଥିବାବେଳେ ସୂର୍ଯ୍ୟକୁମାର ଫର୍ମ ଫେରିପାଇବାକୁ ସଂଘର୍ଷ କରୁଛନ୍ତି । ଉଭୟଙ୍କ ବ୍ୟାଟ୍ରୁ ବଡ ଇନିଂସ ଦେଖିବାକୁ ଦର୍ଶକ ଆଶାବାଦୀ ରହିଛନ୍ତି । ମୁମ୍ବାଇ ଇଣ୍ଡିଆନ୍ସର ନବାଗତ ବାମ ହାତି ଲେଗ ସ୍ପିନର ବିଘ୍ନେଶ ପୁଥୁରଙ୍କୁ ନେଇ ସମ୍ପ୍ରତି ଜୋରଦାର ଚର୍ଚ୍ଚା ଚାଲିଛି । ଚେନ୍ନାଇ ସୁପରକିଙ୍ଗ୍ସ ବିପକ୍ଷରେ ସେ ୩ଟି ୱିକେଟ୍ ନେଇ ନଜରକୁ ଆସିଥିଲେ । ଏପର୍ଯ୍ୟନ୍ତ ସେ ସିନିୟର ସ୍ତରରେ କୌଣସି ଘରୋଇ କ୍ରିକେଟ୍ ଖେଳି ନାହାନ୍ତି । ତଥାପି ତାଙ୍କ ଦକ୍ଷତାକୁ ପରଖି ମୁମ୍ବାଇ ଇଣ୍ଡିଆନ୍ସ ତାଙ୍କୁ ପ୍ରଥମ ମ୍ୟାଚ୍ରୁ ପଦାର୍ପଣ ସୁଯୋଗ ଦେଇଛି ।
ମୋଟେରା ଗ୍ରାଉଣ୍ଡର ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ ରହିବ । ପଞ୍ଜାବ କିଙ୍ଗ୍ସ ଓ ଟାଇଟନ୍ସ ମଧ୍ୟରେ ଅନୁଷ୍ଠିତ ପ୍ରଥମ ମ୍ୟାଚ୍ରେ ମୋଟ୍ ୪୭୫ ରନ ସଂଗୃହୀତ ହୋଇଥିଲା ଓ ୧୦ଟି ୱିକେଟ୍ର ପତନ ଘଟିଥିଲା । ଆଜି ଅପରାହ୍ଣରେ ତାମପାତ୍ରା କମିବ ଓ କାକର ଅନୁଭୂତ ହେବ । ଫଳରେ ଦ୍ୱିତୀୟ ଭାଗରେ ରନ ସଂଗ୍ରହ ସହଜ ହେବ । ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦ୍ବାଦଶ
ଗୁଜରାଟ ଟାଇଟନ୍ସ: ଶୁଭମନ ଗିଲ୍ (ଅଧିନାୟକ), ସାଇ ସୁଦର୍ଶନ, ଜୋସ ବଟଲର, ସେରଫାନ ରଦରଫୋର୍ଡ, ଶାହରୁଖ ଖାନ, ରାହୁଲ ତେୱାତିଆ, ରସିଦ ଖାନ, ଅର୍ସଦ ଖାନ, ଆର ସାଇ କିଶୋର, କାଗିସୋ ରାବାଡା, ମହମ୍ମଦ ସିରାଜ, ପ୍ରସିଦ୍ଧ କ୍ରିଷ୍ଣା ।
ମୁମ୍ବାଇ ଇଣ୍ଡିଆନ୍ସ: ରୋହିତ ଶର୍ମା, ର୍ୟାନ ରିକେଲଟନ, ୱିଲ ଜ୍ୟାକ୍ସ, ସୂର୍ଯ୍ୟକୁମାର ଯାଦବ, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ନମନ ଧୀର/ରବିନ ମିଞ୍ଜ, ମିଚେଲ ସାଣ୍ଟନର, ଦୀପକ ଚହର, ଟ୍ରେଣ୍ଟ ବୋଲ୍ଟ, ସତ୍ୟନାରାୟଣ ରାଜୁ, ବିଘ୍ନେଶ ପୁଥୁର ।
୧୭ ବର୍ଷ ପରେ ମିଳିଲା ସଫଳତା, ସିଏସକେ ବିପକ୍ଷରେ ଐତିହାସିକ ବିଜୟ ହାସଲ କଲା ଆରସିବି
