ଚେନ୍ନାଇ: ଆଇପିଏଲର ୧୮ତମ ସିଜିନରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳ ଏମଏ ଚିଦାମ୍ବରମ ଷ୍ଟାଡିୟମରେ ଚେନ୍ନାଇ ସୁପର କିଙ୍ଗସକୁ ପରାସ୍ତ କରିଛି । ସିଏସକେକୁ ୫୦ ରନରେ ମାତ୍ ଦେଇ ସିଜିନରେ ଲଗାତାର ଦ୍ୱିତୀୟ ବିଜୟ ହାସଲ କରିଛି ଆରସିବି । ପ୍ରଥମେ ବ୍ୟାଟିଂ କରି, RCB ୨୦ ଓଭରରେ ୭ ୱିକେଟ୍ ହରାଇ ୧୯୬ରନ୍ କରିଥିଲା । ଅଧିନାୟକ ରଜତ ପାଟିଦାର ୫୧ ରନ୍ କରିଥିଲେ, ସଲ୍ଟ ଏବଂ କୋହଲି ଯଥାକ୍ରମେ ୩୨ ଏବଂ ୩୧ ରନ୍ କରିଥିଲେ। ଜବାବରେ ସଏସକେ ୨୦ ଓଭରରେ ମାତ୍ର ୧୪୬ ରନ କରିପାରିଥିଲା ଏବଂ ୫୦ ରନରେ ମ୍ୟାଚ୍ ହାରିଯାଇଥିଲା । ୧୭ ବର୍ଷ ପରେ ଆରସିବି ଦଳ ସିଏସକେକୁ ତାର ନିଜ ଗ୍ରାଉଣ୍ଡରେ ପରାସ୍ତ କରିବାରେ ସଫଳ ହୋଇଛି।
ଆରସିବି ବିପକ୍ଷ ମ୍ୟାଚ୍ରେ, ସିଏସକେ ଦଳକୁ ୧୯୭ ରନ୍ର ଏକ ବଡ଼ ଟାର୍ଗେଟ ମିଳିଥିଲା । ଟାର୍ଗେଟ ପିଛା କରିବାକୁ ଆସିଥିବା ସିଏସକେ ରାହୁଲ ତ୍ରିପାଠୀ ଏବଂ ଅଧିନାୟକ ଋତୁରାଜ ଗାଏକ୍ବାଡଙ୍କ ରୂପରେ ଦୁଇଟି ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ପ୍ରଥମ ୬ ଓଭର ଶେଷ ସୁଦ୍ଧା, ଚେନ୍ନାଇ ସୁପର କିଙ୍ଗ୍ସ ଦଳ ମାତ୍ର ୩୦ ରନରେ ତିନୋଟି ୱିକେଟ ହରାଇଥିଲେ। ଏପରି ପରିସ୍ଥିତିରେ, ଏଠାରୁ ମ୍ୟାଚ୍ରେ ଦଳକୁ ପ୍ରତ୍ୟାବର୍ତ୍ତନ କରିବା ବହୁତ କଷ୍ଟକର ହୋଇପଡ଼ିଥିଲା। ୯୯ ରନ ସ୍କୋର ସୁଦ୍ଧା, ସିଏସକେ ୭ ୱିକେଟ ହରାଇ ନିଜର ପରାଜୟ ନିଶ୍ଚିତ କରିଥିଲା ।
ଏହା ପରେ, ୨୦ ଓଭରରେ ୮ ୱିକେଟ୍ ହରାଇ କେବଳ ୧୪୬ ରନ୍ କରିପାରିଥିଲା ସିଏସକେ । ରଚିନ ରବିନ୍ଦ୍ର ୪୧ ରନର ଇନିଂସ ଖେଳିଥିଲେ । ଏମଏସ ଧୋନୀ ୧୬ ବଲରେ ୩୦ ରନର ଅପରାଜିତ ଇନିଂସ ଖେଳିଥିଲେ । ଆରସିବି ପକ୍ଷରୁ ଜୋଶ ହାଜେଲଉଡ୍ ୩ଟି ୱିକେଟ୍ ନେଇଥିବା ବେଳେ ୟଶ ଦୟାଲ ଏବଂ ଲିଆମ୍ ଲିଭିଂଷ୍ଟୋନ୍ ୨ଟି ଲେଖାଏଁ ୱିକେଟ୍ ନେଇଥିଲେ। ଏହା ବ୍ୟତୀତ ଭୁବନେଶ୍ୱର କୁମାର ମଧ୍ୟ ଗୋଟିଏ ୱିକେଟ୍ ନେବାରେ ସଫଳ ହୋଇଥିଲେ।
