ଭୁବନେଶ୍ୱର ୨୨/୧୨: ଶ୍ରୀଲଙ୍କାର ନବନିର୍ବାଚିତ ରାଷ୍ଟ୍ରପତିଙ୍କ ‘ଇଣ୍ଡିଆ ଫାଷ୍ଟ୍’ ନୀତି ଭାରତ ମହାସାଗରରେ ଚୀନ୍ର ଦବ୍ଦବାକୁ ଚାଲେଞ୍ଜ ଦେବ । ଭାରତକୁ ଚାପଗ୍ରସ୍ତ କରି ରଖିବାକୁ ଚୀନ୍ ଆକ୍ରମଣାତ୍ମକ ଢଙ୍ଗରେ ‘ମିଶନ୍ ଭାରତ ମହାସାଗର’କୁ ଆଗକୁ ବଢ଼ାଉଥିବା ବେଳେ ଦିସାନାୟକେ ଡ୍ରାଗନ୍ର ନିଆଁରେ ପାଣି ଢାଳିଛନ୍ତି । ତାଙ୍କ ଭାରତ ଗସ୍ତ ନୂଆଦିଲ୍ଲୀ-କଲମ୍ବୋ ସମ୍ପର୍କରେ ଯୋଡ଼ିଛି ନୂଆ ଫର୍ଦ୍ଦ ।
ଜଳୁଛି ମରମ । ଜିଓ ପଲିଟିକ୍ସକୁ ଧକ୍କା । କଟା ଘା’ରେ ଲାଗିଛି ଚୂନ । ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାର ଦିସାନାୟକେଙ୍କ ଭାରତ ଗସ୍ତ ଡ୍ରାଗନ୍ ଚୀନ୍କୁ ଦେଇଛି ଝଟ୍କା । ଭାରତ ସହ ଶ୍ରୀଲଙ୍କାର ସମ୍ପର୍କ ଯୁଗ ଯୁଗର । ଶ୍ରୀଲଙ୍କାର ବିଶ୍ୱାସ ଜିତିଛି ଭାରତ । ଚୀନ୍କୁ ଆଇନା ଦେଖାଇଛି । ନୂଆଦିଲ୍ଲୀ ସହ ସମ୍ପର୍କକୁ ନୂଆ ସୋପାନକୁ ନେବା ଏବଂ ଅଧିକ ସଶକ୍ତ କରିବାକୁ କଲମ୍ବୋ ଆଗ୍ରହୀ ବୋଲି ଦିସାନାୟକେଙ୍କ ଭାବଭଙ୍ଗୀ କହୁଛି । ଯଦି ଏ ଅନୁମାନ ସତ ହୁଏ, ତେବେ ଭାରତଶ୍ରୀଲଙ୍କାର ସମ୍ପର୍କ ନୂଆ ଉଡ଼ାଣ ଭରିବ । ଉଭୟ ଦେଶକୁ ଏ ବଳୁଆ ଦ୍ୱିପାକ୍ଷିକ ସମ୍ପର୍କ ଲାଭ ହିଁ ଲାଭ ଦେବ । ଫାଶ ବିଛାଇ ଶିକାର କରିବା ସହ ନିଜ ସ୍ୱାର୍ଥ ସାଧନ ପାଇଁ ଚୀନ୍ର ମାଷ୍ଟର୍ପ୍ଲାନ୍ ପାଣିଫୋଟକା ଭଳି ମିଳେଇଯିବ ।
ଭାରତ ବିରୋଧୀ ଅଭିଯାନକୁ ନା’
ଭାରତ ମାଟିରେ ଦୃଢ଼ ପ୍ରତିଶ୍ରୁତି । କଥା ଦେଇଛନ୍ତି ଶ୍ରୀଲଙ୍କା ରାଷ୍ଟ୍ରପତି । ଭାରତ ବିରୋଧରେ ବ୍ୟବହାର ହେବନି ଶ୍ରୀଲଙ୍କା । ଭାରତର ସୁରକ୍ଷା ପ୍ରତି ବିପଦ ସୃଷ୍ଟି କରୁଥିବା କୌଣସି ତତ୍ତ୍ୱକୁ ଶ୍ରୀଲଙ୍କାର ମାଟିରେ କେବେ ହେଲେ ବ୍ୟବହାର କରିବାକୁ ଦିଆଯିବ ନାହିଁ ବୋଲି ଦିସାନାୟକେ ସ୍ପଷ୍ଟ କରିଛନ୍ତି । ଶ୍ରୀଲଙ୍କାର ରାଷ୍ଟ୍ରପତି ହେବା ପରେ ପ୍ରଥମ ଥର ଦିଲ୍ଲୀ ଗସ୍ତରେ ଆସି ଦିସାନାୟକେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏ ବଡ଼ ପ୍ରତିଶ୍ରୁତି ଦେଇଛନ୍ତି ।
ମାର୍କ୍ସବାଦୀ ନେତା ଭାବେ ପରିଚିତ ଦିସାନାୟକେ ଶ୍ରୀଲଙ୍କାର ରାଷ୍ଟ୍ରପତି ଭାବେ ନିର୍ବାଚିତ ହେବା ପରେ ପ୍ରଥମ ବିଦେଶ ଗସ୍ତ ପାଇଁ ଭାରତକୁ ବାଛିବା ଭାରତର କୂଟନୈତିକ ବିଜୟ ବୋଲି ବିଦେଶ ନୀତି ବିଶେଷଜ୍ଞମାନେ କହୁଛନ୍ତି । ନୂଆଦିଲ୍ଲୀରେ ପ୍ରଧାନମନ୍ତ୍ରୀ ମୋଦିଙ୍କ ସହ ଯୁଗ୍ମ ସାମ୍ବାଦିକ ସମ୍ମିଳନୀରେ ଦିସାନାୟକେ ସିଂହଳ ମାଟି ଭାରତ ବିରୋଧୀ ଅଭିଯାନକୁ ପ୍ରଶ୍ରୟ ଦେବନାହିଁ ବୋଲି ଦମ୍ଭ ବାଢ଼ିବା ଚାଇନାର ଚିନ୍ତା ବଢ଼ାଇଛି ।
ଶ୍ରୀଲଙ୍କାର ନବନିର୍ବାଚିତ ରାଷ୍ଟ୍ରପତିଙ୍କ ‘ଇଣ୍ଡିଆ ଫାଷ୍ଟ’ ନୀତି ଭାରତ ମହାସାଗରରେ ଡ୍ରାଗନ୍ର ଦବ୍ଦବାକୁ କେତେକାଂଶରେ ହ୍ରାସ କରିବ । ଭାରତକୁ ଚାପଗ୍ରସ୍ତ କରି ରଖିବାକୁ ଚୀନ୍ ଆକ୍ରମଣାତ୍ମକ ଢଙ୍ଗରେ ‘ମିଶନ୍ ଭାରତ ମହାସାଗର’କୁ ଆଗକୁ ବଢ଼ାଉଥିବା ବେଳେ ଦିସାନାୟକେ ଡ୍ରାଗନ୍ର ନିଆଁରେ ପାଣି ଢ଼ାଳିଛନ୍ତି । ଅବଶ୍ୟ ଶ୍ରୀଲଙ୍କା ରାଷ୍ଟ୍ରପତିଙ୍କର ଏହା ଅନ୍ତରର କଥା ନା ଦୋମୁହାଁ ତା’ର ଉତ୍ତର ତ ଭବିଷ୍ୟତ କହିବ । ମାତ୍ର ଶ୍ରୀଲଙ୍କାର ସାମ୍ପ୍ରତିକ ସ୍ଥିତି ଯାହା କଲମ୍ବୋ ଭାରତକୁ ବାଦ୍ ନେଇ ଅନ୍ୟ ଦେଶ ସହ ସମ୍ପର୍କ ଆଧାରରେ ଯେ ଆଗକୁ ଯାଇପାରିବନି ତାହା ଜଳଜଳ । ପୂର୍ବରୁ ଭାରତ ବିରୋଧୀ ମନୋଭାବ ପୋଷଣ କରି ଆସୁଥିବା ବାମପନ୍ଥୀ ଦିସାନାୟକେ ଏହାକୁ ଭଲଭାବରେ ବୁଝି ସାରିଛନ୍ତି । ବେଜିଂକୁ ପଛକୁ ଠେଲି ଦିଲ୍ଲୀକୁ ପ୍ରଥମ ପସନ୍ଦ ଭାବେ ବାଛିଛନ୍ତି । ନମ୍ବର୍ୱାନ୍ ସୁପର୍ପାୱାର୍ ପାଇଁ ବ୍ୟାକୁଳ ଚୀନ୍ ଯେ ଏବେ ଚୁପ୍ ବସିବ ଭାବିବା ଭୁଲ୍ । ବେଜିଂ ନିଶ୍ଚୟ ଗୋଟି ଚଳାଇବ । ଚାଲ୍ ଖେଳିବ । ମାତ୍ର ଭାରତ ମଧ୍ୟ ନଛୋଡ଼ବନ୍ଧା ଆଭିମୁଖ୍ୟକୁ ଅପରିବର୍ତ୍ତିତ ଯେ ରଖିବ ତାହା ସ୍ପଷ୍ଟ ।
ପଡ଼ୋଶୀ ପ୍ରଥମ
ଭାରତର ବୈଦେଶିକ ନୀତିରେ ‘ପଡ଼ୋଶୀ ପ୍ରଥମ’ ନୀତିକୁ ବଳବତ୍ତର ରଖିଛି । ମାତ୍ର ବିଶ୍ୱର ବିଗ୍ବ୍ରଦର୍ ହେବାକୁ ରେସ୍ରେ ଥିବା ଆମେରିକା ଓ ଚୀନ୍ କିନ୍ତୁ ଏ ପଡ଼ୋଶୀ ରାଷ୍ଟ୍ରକୁ ହତିଆର କରି ଭାରତରେ ଅଶାନ୍ତି ଓ ଅସ୍ଥିରତା ବାତାବରଣ ସୃଷ୍ଟି କରିବାକୁ ଉଦ୍ୟମ ଜାରି ରଖିଛନ୍ତି । ଉପରକୁ ବନ୍ଧୁତାର ହାତ ବଢ଼ାଇ ପଛରୁ ଛୁରି ମାରୁଛନ୍ତି । ଏହି କାରଣରୁ ପାକିସ୍ତାନ, ନେପାଳ, ଭୁଟାନ୍, ବାଂଲାଦେଶ, ମିଆଁମାର ଓ ଶ୍ରୀଲଙ୍କା ସବୁଠି ବିସ୍ତାରବାଦୀ ଶକ୍ତିମାନେ ଭାରତ ବିରୋଧୀ ମିଶନ୍ରେ ଲିପ୍ତ ଅଛନ୍ତି ।
ବିନା ଲଢ଼େଇରେ ଯୁଦ୍ଧ ଜୟ ଫର୍ମୁଲା ଆପଣାଇଛି ଆମେରିକା । ବାଂଲା-ଭାରତର ସମ୍ପର୍କ ହଜମ ହେଲାନି । ଦକ୍ଷିଣ ଏସିଆ ଓ ପ୍ରଶାନ୍ତ ମହାସାଗର ଉପରେ ନିଜ ଦବ୍ଦବା ଜାହିର କରିବାକୁ କଳ, ବଳ ଓ କୌଶଳ ଲଗାଇ ସଫଳ ହୋଇଛି ହ୍ୱାଇଟ୍ହାଉସ୍ । ଭାରତର ଘନିଷ୍ଠ ବନ୍ଧୁ ହସିନାଙ୍କୁ ଗାଦିଚ୍ୟୁତ ସହ ନୂଆଦିଲ୍ଲୀ-ଢ଼ାକା ସମ୍ପର୍କର ପକ୍ଷଛେଦନ ଓ ବାଂଲା ଅଶାନ୍ତର ମାଷ୍ଟର୍ମାଇଣ୍ଡ୍ ଯୁକ୍ତରାଷ୍ଟ୍ରର ମୁଖା ଧରାପଡ଼ିଛି । ଡ୍ରାଗନ୍ ଚୀନ୍ ବି କିଛି କମ୍ ନୁହଁ । ଦୀର୍ଘମିଆଦି ଭିତ୍ତିରେ ଚୀନ୍ ଯେ ଭାରତ ବିରୋଧରେ କିଛି ଷଡ଼ଯନ୍ତ୍ରରେ ଲିପ୍ତ ତାହା ଜଳଜଳ । ଗୁଇନ୍ଦାଗିରି କରି ଚୀନ୍ ‘ହାଇବ୍ରିଡ୍ ୱାର୍ଫେୟାର୍’ ସାମରିକ କୌଶଳ ଆପଣାଇଛି ।
ଭବିଷ୍ୟତରେ ଏ ବ୍ୟକ୍ତିଗତ ତଥ୍ୟକୁ ଆଧାର କରି ଚୀନ୍ ଚାହିଁଲେ ଦେଶରେ ଅସ୍ଥିରତା ସୃଷ୍ଟି କରିପାରିବ । ଭାରତର କୌଣସି ସହରରେ ଦଙ୍ଗା ଓ ହିଂସା ସୃଷ୍ଟି ପାଇଁ ବେଶୀ କଷ୍ଟ କରିବାକୁ ପଡ଼ିବନି । ଭାରତ ଭୂ-ଖଣ୍ଡ ଉପରେ ଚୀନ୍ର ସବୁବେଳେ ଆଖି । ଚାଇନା ଭାରତ ମହାସାଗରରେ ନିଜର ଗୁପ୍ତ ମିଶନ୍ କାର୍ଯ୍ୟକାରୀ କରୁଛି। ଏହା ଭାରତର ମୁଣ୍ଡ ବିନ୍ଧାର କାରଣ ସାଜିଛି । ଚାଇନା ଠାରୁ ଶ୍ରୀଲଙ୍କା ବିପୁଳ ପରିମାଣର ଋଣ ନେଇଥିଲା । ଏହାକୁ ପରିଶୋଧ ନ କରିବାରୁ ବେଜିଂ ଶ୍ରୀଲଙ୍କାର ହଂବନଟୋଟା ବନ୍ଦରକୁ ଅକ୍ତିଆର କରି ସାମରିକ ଘାଟି ଭଳି ବ୍ୟବହାର କରୁଛି । ଡ୍ରାଗନ୍ ଏଠାରେ ବାଲେଷ୍ଟିକ୍ ମିସାଇଲ୍ ଟ୍ରାକିଂ ଜାହାଜ ମୁତୟନ ସହ ଭାରତ ଉପରେ ତୀକ୍ଷ୍ଣ ନଜର ରଖିଛି ।
ଭାରତ ମହାସାଗର ସୀମାରେ ଭାରତକୁ ଘେରିବାକୁ ଚୀନ୍ ସମସ୍ତ ପ୍ରକାର ଖେଳ ଖେଳୁଛି । ମାତ୍ର ଦିସାନାୟକେଙ୍କ ସହ ସମ୍ପର୍କକୁ ମଜଭୁତ କରି ଭାରତ ଚୀନ୍ର ଏ ମିଶନ୍କୁ ବିଫଳ କରିବା ଲକ୍ଷ୍ୟରେ ରହିଛି । ଶ୍ରୀଲଙ୍କା ରାଷ୍ଟ୍ରପତି ମଧ୍ୟ ନିଜ ପ୍ରତିବଦ୍ଧତାକୁ ଦୋହରାଇଛନ୍ତି । ସେ ସ୍ପଷ୍ଟ କରିଛନ୍ତି, ଦିଲ୍ଲୀ-କଲମ୍ବୋ ସହଯୋଗ ଆହୁରି ମାର୍ଜିତ ହେବ । ଆମ ସଙ୍କଟ ସମୟରେ ଭାରତ କାନ୍ଥ ଭଳି ଛିଡ଼ା ହୋଇଛି । ବନ୍ଧୁ ଭଳି ସହଯୋଗ କରିଛି । ଭାରତ ପ୍ରତି ଆମର ସମର୍ଥନ ଜାରି ରହିବ ।
ନୂଆ ସୋପାନ ଛୁଇଁବ ଭାଗୀଦାରୀ
ରାଷ୍ଟ୍ରପତି ଦିସାନାୟକେଙ୍କ ଗସ୍ତକୁ ନେଇ ବିଦେଶ ନୀତି ବିଶେଷଜ୍ଞମାନେ ବେଶ୍ ଆଶାବାଦୀ । ଏହା ଦୁଇ ଦେଶ ମଧ୍ୟରେ ସମ୍ପର୍କର ନୂଆ ଗତିଶୀଳତା ସୃଷ୍ଟି କରିଛି । ଦୁଇଦେଶ ଚୁକ୍ତି କରିଛନ୍ତି, ବିଭିନ୍ନ କ୍ଷେତ୍ରରେ ଭାଗୀଦାରୀ ଆହୁରି ବଢ଼ିବ । ନିବେଶଭିତ୍ତିକ ଅଭିବୃଦ୍ଧି, ଯୋଗାଯୋଗ, ଡିଜିଟାଲ୍ ଏବଂ ଶକ୍ତି ସଂଯୋଗ ହେବ ଭାଗୀଦାରୀ ମୂଳସ୍ତମ୍ଭ । ଉଭୟ ଦେଶ ମଧ୍ୟରେ ବିଜୁଳି ଗ୍ରୀଡ୍ ସଂଯୋଗ, ମଲ୍ଟି ପ୍ରଡକ୍ଟ ପେଟ୍ରୋଲିୟମ୍ ପାଇପ୍ଲାଇନ୍ ସ୍ଥାପନ ହେବ । ସାମପୁର ସୌର ଶକ୍ତି ପ୍ରକଳ୍ପ କାମ ତ୍ୱରାନ୍ୱିତ ହେବ । ଶ୍ରୀଲଙ୍କାର ପାୱାର୍ ପ୍ଳାଣ୍ଟ ପାଇଁ ଭାରତ ଯୋଗାଇଦେବ ଏଲ୍ଏନ୍ଜି । ଆଞ୍ଚଳିକ ଶାନ୍ତି, ନିରାପତ୍ତା, ସାମୁଦ୍ରିକ ନିରାପତ୍ତା, ଆତଙ୍କବାଦ ମୁକାବିଲା, ସାଇବର ସୁରକ୍ଷା ଓ ସଂଗଠିତ ଅପରାଧର ମୁକାବିଲା କରିବାକୁ ସହଯୋଗ ଜାରି ରହିବ ।
ଆସନ୍ତା ୫ ବର୍ଷ ମଧ୍ୟରେ ୧୫୦୦ ଶ୍ରୀଲଙ୍କା ପ୍ରଶାସନିକ ଅଧିକାରୀଙ୍କୁ ଭାରତରର ତାଲିମ୍ ମିଳିବ । ଗୃହ ନିର୍ମାଣ, ଅକ୍ଷୟ ଶକ୍ତି ଏବଂ ଭିତ୍ତିଭୂମି ପ୍ରକଳ୍ପଗୁଡ଼ିକ ତ୍ୱରିତ୍ ହେବ । ବୌଦ୍ଧ ସର୍କିଟ୍ ଜରିଆରେ ପର୍ଯ୍ୟଟନ ଆଗକୁ ବଢ଼ାଇବାକୁ ମୋଦି-ଦିସାନାୟକେ ସହମତି ହୋଇଛନ୍ତି। ଶ୍ରୀଲଙ୍କାର ଆର୍ଥିକ ସଙ୍କଟ ଓ ଦେବାଳିଆ ସ୍ଥିତି ଭଳି ଦୁର୍ଦ୍ଦଶାର ଖଳନାୟକ ହେଉଛି ଖୋଦ ଚୀନ୍ । ଭାରତ କିନ୍ତୁ ତ୍ରାଣକର୍ତ୍ତା ଭାବେ କଲମ୍ବୋର ବିପଦରେ ସବୁବେଳେ ଛିଡ଼ା ହୋଇଛି ।
ଦିସାନାୟକେ ବେଜିଂ ସହ ସମ୍ପର୍କରେ ରହିଲେ ମଧ୍ୟ ଭାରତକୁ ସେ ପ୍ରଥମ ପସନ୍ଦ ଭାବେ ବାଛି ନିଜ ରଜନୈତିକ ଓ କୂଟନୈତିକ ପରିପକ୍ୱତାର ପ୍ରମାଣ ଦେଇଛନ୍ତି । ହଁ...ଏହା ସତ ଯେ ଏକବିଂଶ ଶତାବ୍ଦୀ ଏସିଆର ହେବାକୁ ଯାଉଛି । ଚୀନ୍ ସୁପର୍ପାୱାର୍ ଭାବେ ଉଭା ହୋଇଛି । ଭାରତ ମଧ୍ୟ ରାଇଜିଂ ସୁପର୍ପାୱାର୍ ଭାବେ ନିଜକୁ ପରିଚିତ କରାଇପାରିଛି । ଭାରତ ଟପିଯିବ କି? ଏମିତି ଭୟରେ ଘାଣ୍ଟି ହେଉଛି ବେଜିଂ । ଚୀନ୍ ଭଳି ମହାଶକ୍ତି ସହ ଦ୍ୱିପାକ୍ଷିକ ସମ୍ପର୍କକୁ ବର୍ତ୍ତମାନ ସନ୍ତୁଳିତ କରି ରଖିବାକୁ ଭାରତ ନିଶ୍ଚୟ ଚାହିଁବ । ମାତ୍ର ନିଜ ପଡ଼ୋଶୀମାନଙ୍କ ସହ ସମ୍ପର୍କକୁ ସୁଦୃଢ଼ କରିବାକୁ ନୂଆଦିଲ୍ଲୀ ନିଜ ରଣନୀତିକୁ କରିଛି ତେଜୀୟାନ୍ ।
