ଭୁବନେଶ୍ୱର ୧୪/୧୨(ସସ୍ମିତା ମଲ୍ଲ): ବର୍ଷ ୨୪ ଓଡ଼ିଶାର ମହିଳାଙ୍କ ପାଇଁ ଥିଲା ଚମକର ବର୍ଷ । ପ୍ରଥମ ଥର ଲାଗି ବିଧାୟକ ହେଇଥିବା ଜଣେ ମହିଳା ଏକାଥରକେ ଉପମୁଖ୍ୟମନ୍ତ୍ରୀ ପଦ ଅଳଙ୍କୃତ କଲେ । ଯାହାଦ୍ୱାରା ଓଡ଼ିଶା ଦେଖିଲା ପ୍ରଥମ ମହିଳା ଉପମୁଖ୍ୟମନ୍ତ୍ରୀ । ପୁଣି ଥରେ ଓଡ଼ିଶା ବିଧାନସଭାରେ ଦ୍ୱିତୀୟ ଥର ପାଇଁ ଆଉ ଜଣେ ମହିଳା ବାଚସ୍ପତି ଆସନ ଅଳଙ୍କୃତ କଲେ । ସେମିତି ବିଧାନସଭା ଇତିହାସରେ ପ୍ରଥମ ଥର ଲାଗି ଜଣେ ମହିଳା ହେଲେ ବିରୋଧୀଦଳ ମୁଖ୍ୟ ସଚେତକ । ସରକାରଙ୍କ ତରଫରୁ ଘୋଷଣା ହେଲା ସୁଭଦ୍ରା ଯୋଜନା । ୫ବର୍ଷରେ ମହିଳାଙ୍କ ବ୍ୟାଙ୍କ ଖାତାକୁ ଆସିବ ୫୦ହଜାର ଟଙ୍କା । କିସ୍ତି ଦିଆ ବି ଆରମ୍ଭ ହୋଇଗଲା । ଋତୁସ୍ରାବ ପାଇଁ ମହିଳାଙ୍କୁ ଗୋଟିଏ ଦିନ ବୋନ୍ସ ଛୁଟି ଭଳି ଐତିହାସିକ ନିଷ୍ପତ୍ତି ଆସିଲା । ଅଗ୍ନିଯୋଦ୍ଧାରେ ବି ସାମିଲ ହେଲେ ମହିଳା । ମୋଟାମୋଟି ଭାବେ ୨୪ରେ ଚମକିଲେ ନାରୀଶକ୍ତି....
ଓଡ଼ିଶାର ପ୍ରଥମ ମହିଳା ଉପମୁଖ୍ୟମନ୍ତ୍ରୀ
ଯାହା ହୋଇନଥିଲା ତାହା ହେଲା । ଓଡ଼ିଶା ଦେଖିଲା ତା’ର ପ୍ରଥମ ଉପମୁଖ୍ୟମନ୍ତ୍ରୀ । ସେହି ପଦବି ପାଇଁ ମହିଳାଙ୍କୁ ଚୟନ କରାଗଲା । ଚଳିତ ବର୍ଷ ନିର୍ବାଚନରେ ବିଜେପି ସରକାର ଗଠନ କଲା । ଏହାପରେ ଉପମୁଖ୍ୟମନ୍ତ୍ରୀ ପଦ ପାଇଁ ୨ଜଣଙ୍କୁ ଚୟନ କରାଯାଇଥିଲା । ସେଥିରୁ ଜଣେ ମହିଳା ଏହି ଆସନର ଅଧିକାରୀ ହେଲେ । କଟକ ଜିଲ୍ଲା ନିଆଳି ବ୍ଲକ୍ ନିଭରଣ ଗ୍ରାମର ପ୍ରଭାତୀ ପରିଡ଼ା । ସେ ନିଆଳି ବ୍ଲକ୍ରୁ ୨୦୦୨ରୁ ରାଜନୀତି ଆରମ୍ଭ କରିଥିଲେ ।
ଓଡ଼ିଶାର ୫ଲକ୍ଷ ଲକ୍ଷପତି ଦିଦି
ଦିନଦୟାଲ ଅନ୍ତୋଦ୍ୟୋୟ ଯୋଜନା' ମାଧ୍ୟମରେ ସ୍ୱୟଂ ସହାୟକ ଗୋଷ୍ଠୀ ସମୂହଙ୍କୁ ଆତ୍ମନିର୍ଭର କରିବା ଓ ସେମାନଙ୍କୁ ଲକ୍ଷପତି ଦିଦି କରାଇବା ଉଦ୍ଦେଶ୍ୟରେ ଚଳିତ ବର୍ଷ ସୁଦ୍ଧା ବଜେଟରେ ୩ କୋଟି ଲକ୍ଷପତି ଦିଦି କରିବାର ଲକ୍ଷ୍ୟ ରଖାଯାଇଛି । ପ୍ରଧାନମନ୍ତ୍ରୀଙ୍କ ଲକ୍ଷପତି ଦିଦି ସ୍କିମ୍ ଓ ଡ୍ରୋନ୍ ଦିଦି ମାଧ୍ୟମରେ ମହିଳାମାନେ ଉପକୃତ ହୋଇପାରୁଛନ୍ତି । ଓଡ଼ିଶାରେ ଏପର୍ଯ୍ୟନ୍ତ ୫ଲକ୍ଷ ୩୭ହଜାର ଲକ୍ଷପତି ଦିଦି ଓ ୧୨ ଡ୍ରୋନ ଦିଦି ତିଆରି ହୋଇପାରିଛନ୍ତି । ଲକ୍ଷପତି ଦିଦି ବାର୍ଷିକ ଏକ ଲକ୍ଷ ଟଙ୍କା ଆୟ କରୁଥିବା ବେଳେ ଡ୍ରୋନ୍ ଦିଦି ମାଧ୍ୟମରେ ଏସ୍ଏଚ୍ଜି ମହିଳାଙ୍କୁ ଡ୍ରୋନ୍ ପ୍ରଦାନ କରାଯାଉଛି ।
ବଲିଉଡ୍ ମଞ୍ଚରେ ଓଡ଼ିଆ ଲୋକ ସଙ୍ଗୀତ
ଓଡ଼ିଶାର ଲୋକଗୀତ । ‘ଉଠ କଙ୍କାଳ ଛିଡ଼ୁ ଶୃଙ୍ଖଳ....’ । ଲୋକଗୀତକୁ ନୂଆ ରୂପ ଦେଇ ଲୋକଲୋଚନକୁ ଆଣିଛନ୍ତି ଓଡ଼ିଆ ଝିଅ ବର୍ଣ୍ଣାଳୀ ହୋତା । ସରଳ ଦେଶୁଆ ଭାଷାର ଗୀତକୁ ଜାତୀୟସ୍ତରରେ ପହଞ୍ଚାଇ କୋଟି କୋଟି ଓଡ଼ିଆଙ୍କ ହୃଦୟରେ ରାଜ୍ କରିଥିଲେ । ରିଏଲିଟି ଶୋ’ ମାଧ୍ୟମରେ ଓଡ଼ିଶାର ଲୋକଗୀତକୁ ଜାତୀୟ ସ୍ତରରେ ପହଞ୍ଚାଇଥିଲେ । ଏଥିପାଇଁ ଓଡ଼ିଶାବାସୀଙ୍କ ଭଲ ପାଇବା ବି ସାଉଣ୍ଟି ଥିଲେ । ବର୍ଣ୍ଣାଳୀ ଦ୍ୱିତୀୟ ରନର୍ସ ଅପ୍ ହୋଇ ଓଡ଼ିଶାର କଳା, ସଂସ୍କୃତି ଓ ଲୋକଗୀତକୁ ବେଶ ଲୋକପ୍ରିୟ କରାଇଥିଲେ ।
ସରୋଜିନୀଙ୍କୁ ଶାରଳା ପୁରସ୍କାର
ସେ କାଳେ ନାରୀମାନଙ୍କୁ ବେଶ୍ ଭଲପାଆନ୍ତି । ସେଥିପାଇଁ ତ କିଏ ତାଙ୍କୁ ନାରୀବାଦୀ ଲେଖିକା କୁହନ୍ତି ତ କିଏ ବାମବାଦୀ ଲେଖିକା । ତାଙ୍କର ଅନେକ ବହି ମଧ୍ୟ ନାରୀମାନଙ୍କ ଉପରେ ପର୍ଯ୍ୟବେସିତ । ଓଡ଼ିଆ ସାହିତ୍ୟ ଜଗତକୁ ବିଶେଷ ଅବଦାନ ପାଇଁ ଡକ୍ଟର ସରୋଜିନୀ ସାହୁଙ୍କୁ ଚଳିତବର୍ଷ ମର୍ଯ୍ୟାଦାଜନକ ୪୫ତମ ଶାରଳା ପୁରସ୍କାର ପ୍ରଦାନ କରାଯାଇଛି । ଉପନ୍ୟାସ ‘ଅସ୍ଥିର ପାଦ’ ପାଇଁ ସେ ସମ୍ମାନର ଅଧିକାରୀ ହୋଇପାରିଛନ୍ତି ।
ମିଲେଟ୍ରାଣୀ ରାଇମତୀଙ୍କୁ ଡକ୍ଟରେଟ୍
୭୦ରୁ ଅଧିକ ଚାଷୀଙ୍କୁ ବଞ୍ଚିବାର ବାଟ ଦେଖାଉଛନ୍ତି । ୭୦ରୁ ଅଧିକ କିସମର ଧାନ ଓ ୩୦୦ରୁ ଅଧିକ କିସମର ମାଣ୍ଡିଆ ବିହନ ସାଇତିଛନ୍ତି । କମ୍ ବୟସରୁ କୃଷି, ସାମାଜିକ ବ୍ୟବସ୍ଥା, ଜୀବନଜୀବିକାର ଉନ୍ନତି, ଜୈବ ବିବିଧତାର ସଂରକ୍ଷଣ, ମହିଳା ସଶକ୍ତୀକରଣ ପରି ଅନେକ ପ୍ରଗତିମୂଳକ କାର୍ଯ୍ୟରେ ସାମିଲ ହୋଇ ନିଜ ପାଇଁ ସୃଷ୍ଟି କରିଛନ୍ତି ସ୍ୱତନ୍ତ୍ର ପରିଚୟ । ସେ ହେଉଛନ୍ତି ମିଲେଟରାଣୀ କୋରାପୁଟ ଜିଲ୍ଲା କୁନ୍ଦ୍ରା ବ୍ଲକ ନୂଆଗୁଡା ଗାଁର ଭୂମିଆ ସମ୍ପ୍ରଦାୟର ମହିଳା ରାଇମତୀ ଘିଉରିଆ । କୃଷି କ୍ଷେତ୍ରରେ ଜାରି ରଖିଥିବା ଗବେଷଣା ପାଇଁ ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟର(ଓୟୁଏଟି) ସମାବର୍ତ୍ତନ ଉତ୍ସବରେ ରାଷ୍ଟ୍ରପତି ତାଙ୍କୁ ସମ୍ମାନିତ କରିଛନ୍ତି ।
ଋଷିତାଙ୍କ ଆପ୍ ଗର୍ଭବତୀଙ୍କୁ ସୁରକ୍ଷା ଗର୍ଭବତୀ
ମହିଳା ନିରାପଦରେ କିଭଳି ଯାତ୍ରା କରିବେ । ଗର୍ଭବତୀ ମହିଳା ଯଦି କୌଣସି ବସ୍ଷ୍ଟପ୍ରେ ଛିଡ଼ା ହୋଇଥିବେ ତେବେ ବସ୍କୁ ମିଳିବ ଆଗୁଆ ସୂଚନା । ଏମିତି ଏକ ଆପ୍ ତିଆରି କରିଛନ୍ତି ଭୁବନେଶ୍ୱରର ଋିଷିତା ସାମନ୍ତରାୟ । ଏଥିପାଇଁ ୨୦୨୩-୨୪ ବର୍ଷ ପାଇଁ ସେ ଏ.ପି. ଜେ ଅବଦୁଲ କଲାମ ଜାତୀୟ ପୁରସ୍କାର ପାଇଛନ୍ତି ।
ସୁଭଦ୍ରା ପାଇଁ ମହିଳାଙ୍କ ଭିତରେ ଉତ୍ସାହ
ସୁଭଦ୍ରା ଯୋଜନାରେ ମହିଳାମାନେ ହେବେ ଲାଭବାନ୍ । ୫ ବର୍ଷରେ ମହିଳାଙ୍କ ଆକାଉଣ୍ଟକୁ ଯିବ ୫୦ ହଜାର ଟଙ୍କା । ଏନେଇ ମୁଖ୍ୟମନ୍ତ୍ରୀ ଘୋଷଣା କଲେ । ଏହାକୁ ନେଇ ଓଡ଼ିଶାର ମହିଳାଙ୍କ ଭିତରେ ଦେଖାଗଲା ଉତ୍ସାହ ।
ଅଗ୍ନିଯୋଦ୍ଧା ହେବେ ମହିଳା
ଫାୟାର ମ୍ୟାନ ଯଥା ଅଗ୍ନିଯୋଦ୍ଧା ପଦବିରେ ନିଜର ପରାକାଷ୍ଠା ଦେଖାଇବେ ମହିଳା । ଅଗ୍ନିଯୋଦ୍ଧା ଭାବେ ମହିଳାଙ୍କୁ ମିଳିବ ନିଯୁକ୍ତି । ରାଜ୍ୟସ୍ତରୀୟ ଅଗ୍ନିଯୋଦ୍ଧା ନିଯୁକ୍ତି ସମାରୋହରେ ମୁଖ୍ୟମନ୍ତ୍ରୀ ଏଭଳି ଘୋଷଣା କରିଛନ୍ତି ।
ନାରୀଙ୍କ ହାତରେ ଜଳ ସଂରକ୍ଷଣ ଭାର
ମହିଳା କେବଳ ଘର ପରିଚାଳନା ଦାୟିତ୍ୱ ସମ୍ଭାଳୁଛନ୍ତି ତାହା ନୁହେଁ । ଏବେ ଜଳସଂରକ୍ଷଣର ଭାର ମଧ୍ୟ ମହିଳାମାନଙ୍କୁ ଦିଆଯାଇଛି । ଜଳାଶୟକୁ ସଫା ରଖିବା, ପୁନରୁଦ୍ଧାର ଭଳି ଦାୟିତ୍ୱ ସ୍ୱୟଂସହାୟିକା ଗୋଷ୍ଠୀଙ୍କୁ ପ୍ରଦାନ କରାଯାଇଛି ।
ଦ୍ୱିତୀୟ ମହିଳା ବାଚସ୍ପତି
ସ୍ୱାଧୀନତା ପରେ ଓଡ଼ିଶାର ଦ୍ୱିତୀୟ ବାଚସ୍ପତି ଭାବେ ସାଧାରଣ ଜନତା ଯାହାକୁ ଦେଖିଲେ ସେ ହେଉଛନ୍ତି ରଣପୁର ବିଧାୟିକା ସୁରମା ପାଢ଼ୀ । ୧୯୮୮ ମସିହାରେ ବିଜେପିରେ ଯୋଗଦେବା ପରେ ୧୯୯୮-୨୦୦୦ ମସିହା ଯାଏ ରାଜ୍ୟ ବିଜେପି ମହିଳା ମୋର୍ଚ୍ଚାର ମଙ୍ଗ ରହିଥିଲା ସୁରମାଙ୍କ ହାତରେ । ୨୦୨୪ ନିର୍ବାଚନ ସୁରମାଙ୍କ ଜୀବନରେ ଆଣିଛି ନୂଆ ଅଧ୍ୟାୟ । ନିଦ୍ୱର୍ନ୍ଦ୍ୱରେ ମର୍ଯ୍ୟାଦାଜନକ ବାଚସ୍ପତି ଆସନ ଅଳଙ୍କୃତ କରିବାରେ ସୁରମା ଥିଲେ ଦ୍ୱିତୀୟ ମହିଳା ।
ପ୍ରମିଳା ବିରୋଧୀ ଦଳ ମୁଖ୍ୟ ସଚେତକ
ନାରୀଶକ୍ତି ଦିନକୁ ଦିନ ସୁଦୃଢ଼ ହେଉଛି । ଘର କୋଣଠାରୁ ଆରମ୍ଭ କରି ରାଜ୍ୟ ରାଜନୀତିରେ ହଟଚମଟ କରୁଛନ୍ତି ମହିଳା । ରାଜ୍ୟ ରାଜନୀତିରେ ପ୍ରଥମ ଥର ବିରୋଧୀ ଦଳ ମୁଖ୍ୟ ସଚେତକ ଆସନ ହାତେଇଥିଲେ ପ୍ରମିଳା ମଲ୍ଲିକ । ଖୋଦ୍ ବିରୋଧୀ ଦଳ ମୁଖିଆ ନରୀ ଶକ୍ତିକୁ ପ୍ରାଧାନ୍ୟ ଦେଇ ଏଭଳି ଏକ ନିଷ୍ପତ୍ତି ନେଇଥିଲେ ।
ଋତୁସ୍ରାବ ପାଇଁ ଦିନେ ଛୁଟି
ରାଜ୍ୟ ସରକାର ମହିଳାଙ୍କ ଋତୁସ୍ରାବ ଜନିତ ସମସ୍ୟାକୁ ଦୃଷ୍ଟିରେ ରଖି ତାଙ୍କ ପାଇଁ ଗୋଟିଏ ଦିନ ଛୁଟି ଘୋଷଣା କଲେ । ମାସକରେ ଗୋଟିଏ ଦିନ ସେମାନେ ଏହି ଛୁଟି ନେଇପାରିବେ । ପୂର୍ବରୁ ମିଳୁଥିବା ବାର୍ଷିକ ଅତିରିକ୍ତ ସାମୟିକ ଛୁଟି ୧୨ଦିନକୁ ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଲେ ।
ମହିଳାଙ୍କ ପାଇଁ ମିଶନ ଶକ୍ତି ବଜାର
ମା’ମାନଙ୍କୁ ଆର୍ଥିକ କ୍ଷେତ୍ରରେ ସଶକ୍ତ କରିବା ପାଇଁ ମିଶନ ଶକ୍ତି ବଜାର ଉଦ୍ଘାଟନ କରାଯାଇଥିଲା । ଗୋଟିଏ ଛାତ ତଳେ ଭଳିକି ଭଳି ସାମଗ୍ରୀ ମିଳିବା ସହ ବିକ୍ରିବଟା ପାଇଁ ରାଜ୍ୟର କୋଣ ଅନୁକୋଣରୁ ଏସ୍ଏଚଜି ମା’ମାନେ ସାମଗ୍ରୀ ଆଣିବେ । ବିକ୍ରିବଟା କରିବେ । ଯାହାଫଳରେ ହାତ ପାଆନ୍ତାରେ ଗ୍ରାହକ ମନ ମୁତାବକ ସାମଗ୍ରୀ କିଣିପାରିବେ । ଏସଏଚଜି ମା’ମାନେ ଉପଯୁକ୍ତ ବଜାର ମୂଲ୍ୟ ପାଇବେ । ଏମିତି ସୁଯୋଗ ଆଣିଛି ମିଶନ ଶକ୍ତି ବଜାର । ରାଜଧାନୀରେ ଖୋଲିଥିବା ଏହି ମିଶନ ଶକ୍ତି ବଜାରକୁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଉଦ୍ଘାଟନ କରାଯାଇଥିଲା
ସାବାସ ଶିବାନୀ
ଘଡ଼ଘଡ଼ି ମାରୁଥାଏ । ବର୍ଷା ବି ପ୍ରବଳ ଛେଚୁଥାଏ । ତାଣ୍ଡବ ରଚୁଥାଏ ବାତ୍ୟା ଦାନା । ଏତିକିବେଳେ କେନ୍ଦ୍ରପଡ଼ାର ଜଣେ ମହିଳା ଝଡ଼ ବର୍ଷାକୁ ଖାତିର ନକରି ମାନବିକତା ଦେଖାଇଥିଲେ । ବାତ୍ୟା ପବନରେ ଘରୁ ବାହାରିବା ଅସମ୍ଭବ ଥିଲାବେଳେ ବାହାରେ ଫସି ଯାଇଥିଲେ ଜଣେ ବୃଦ୍ଧା । ତାଙ୍କ ପାଇଁ ଦେବଦୂତ ପାଲଟି ଥିଲେ କେନ୍ଦ୍ରାପଡ଼ା ରାଜନଗର ବ୍ଲକ ଖାସମୁଣ୍ଡା ଗାଁର ଆଶାକର୍ମୀ ଶିବାନୀ ମଣ୍ଡଳ । ବୃଦ୍ଧାଙ୍କୁ କାନ୍ଧରେ ବୋହି ସୁରକ୍ଷିତ ସ୍ଥାନକୁ ନେଇ ଆସିଥିଲେ । ଏହି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ତାଙ୍କ ପାଖକୁ ଛୁଟିଥିଲା ପ୍ରଶଂସାର ସୁଅ ।
- ଆରଆର ଇଭେଣ୍ଟସ୍ ଆଣ୍ଡ ସିନେ ପ୍ରଡକ୍ସନ୍ ପକ୍ଷରୁ ଓଡ଼ିଶା କୁଇନ୍ ସଜିନି୍-୪ ବିଜୟିନୀ ହୋଇଥିଲେ ବାଲେଶ୍ୱରର ରାମିୟା ହୁଇ ।
- ଓଡ଼ିଆ ଝିଅ ଆଦ୍ୟାଂଶା ପାଣିଗ୍ରାହୀ ଜିତିଲେ "ଷ୍ଟାର୍ ମିସ ଟିନ ଇଣ୍ଡିଆ' କ୍ରାଉନ୍ । ୩୫ ଜଣ ପ୍ରତିଯୋଗୀଙ୍କୁ ପଛରେ ପକାଇ ସେ ଏହି କ୍ରାଉନ୍ ହାତେଇବାରେ ସଫଳ ହୋଇଛନ୍ତି ।
- ମାଲେସିଆରେ ଆୟୋଜିତ ଗ୍ଲାମନ ମିସ୍ ଇଣ୍ଡିଆ- ୨୦୨୪ର ଟାଇଟଲ ହାତେଇବାର ସୌଭାଗ୍ୟ ଆଣିଥିଲେ ବ୍ରହ୍ମପୁର ନିବାସୀ ରଶ୍ମୀ ନାୟକ । ଖାଲି ସେତିକି ନୁହେଁ ରଶ୍ମୀ ମିସ ପପୁଲାର ଫେସ୍ର ଆଖ୍ୟା ମଧ୍ୟ ପାଇଛନ୍ତି ।
- ଓଡ଼ିଶା ଫ୍ୟାଶନ୍ ଭିଲ୍ଲା ପକ୍ଷରୁ ଓଡ଼ିଶା ଫ୍ୟାଶନ୍ ଆଇକନ୍ ପୁରସ୍କାର ୨୦୨୪ରେ ମିସ୍ ବର୍ଗରେ କୋରାପୁଟରୁ ହିନାରାନି ଟାଇଟଲ୍ ଜିତିଥିଲେ ।
