ନୂଆଦିଲ୍ଲୀ,୨୩/୦୮: ଭାରତୀୟ ମହିଳା ଦଳର ଅଭିଜ୍ଞ ସ୍ପିନର ଗୌହର ସୁଲତାନା ସବୁ ପ୍ରକାର ଫର୍ମାଟ୍ କ୍ରିକେଟରୁ ଅବସର ଘୋଷଣା କରିଛନ୍ତି । ସେ ସୋସିଆଲ୍ ମିଡିଆ ଇନ୍ଷ୍ଟାଗ୍ରାମ୍ରେ ଏ ବିଷୟ ଘୋଷଣା କରିଛନ୍ତି । ୩୭ ବର୍ଷୀୟା ସୁଲତାନା ୨୦୦୮ରେ ଅନ୍ତର୍ଜାତୀୟ ପଦାର୍ପଣ କରିଥିଲେ । କ୍ୟାରିୟର ମଧ୍ୟରେ ସେ ୫୦ଟି ଦିନିକିଆ ଓ ୩୭ଟି ଟି-ଟ୍ୱେଣ୍ଟି ଖେଳିଥିଲେ । ଦିନିକିଆରେ ୬୬ଟି ଏବଂ ଟି-ଟ୍ୱେଣ୍ଟିରେ ୨୯ଟି ୱିକେଟ୍ ହାସଲ କରିଥିଲେ । ୨୦୦୯ ଓ ୨୦୧୩ ବିଶ୍ୱକପ୍ରେ ଭାରତୀୟ ଦଳର ସଦସ୍ୟା ରହିଥିଲେ । ଏପରିକି ୩ଟି ଟି-ଟ୍ୱେଣ୍ଟି ବିଶ୍ୱକପ୍ ଖେଳିଥିଲେ ।
ସୁଲତାନା କହିଛନ୍ତି ଯେ, ଭାରତ ପକ୍ଷରୁ ପ୍ରତିନିଧିତ୍ୱ କରିବା ଗର୍ବର ବିଷୟ । ବିଶ୍ୱକପ୍ଠୁ ଆରମ୍ଭ କରି ବିଦେଶ ଗସ୍ତରେ ଖେଳିବାର ମଜା ସବୁଠୁ ଭିନ୍ନ । ୱିକେଟ୍ ନେବା, ଫିଲ୍ଡିଂ କରିବା ଏବଂ ଦଳକୁ ଜିତାଇବା ପାଇଁ ସବୁବେଳେ ଶତପ୍ରତିଶତ ଚେଷ୍ଟା କରିଥିଲି । କ୍ୟାରିୟର ମଧ୍ୟରେ ବହୁ ସ୍ମରଣୀୟ ମୂହୁର୍ତ୍ତ ରହିଛି, ଯାହାକୁ କେବେ ଭୁଲି ହେବନି ।
