ଭୁବନେଶ୍ୱର,୨୩/୦୮: ବିସିସିଆଇର ପୁରୁଷ ବରିଷ୍ଠ ଜାତୀୟ ଚୟନ କମିଟିର ଦୁଇ ଜଣ ସଦସ୍ୟଙ୍କ କାର୍ଯ୍ୟକାଳ ଶେଷ ହେବାକୁ ଯାଉଛି । ଅଧ୍ୟକ୍ଷ ଅଜିତ ଅଗରକରଙ୍କ କାର୍ଯ୍ୟକାଳକୁ ଆସନ୍ତା ବର୍ଷ ପର୍ଯ୍ୟନ୍ତ ବଢ଼ାଇ ଦିଆଯାଇଛି । ସେମିତି ଅନ୍ୟ ଦୁଇ ଜଣଙ୍କ ସ୍ଥାନ ପୂରଣ ପାଇଁ ବିସିସିଆଇ ପକ୍ଷରୁ ଦରଖାସ୍ତ ଆହ୍ୱାନ କରାଯାଇଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ପୂର୍ବତନ ଅନ୍ତର୍ଜାତୀୟ ଓଡ଼ିଆ ସ୍ପିନର ପ୍ରଜ୍ଞାନ ଓଝା ଦକ୍ଷିଣାଞ୍ଚଳରୁ ଚୟନ ହେବେ । ଯଦି ଏହା ହୁଏ ତେବେ ବିସିସିଆଇର ଚୟନ କମିଟିରେ ଦୁଇ ଜଣ ଓଡ଼ିଆଙ୍କୁ ଦେଖିବାକୁ ମିଳିବ । ପୂର୍ବରୁ ପୂର୍ବତନ ଟେଷ୍ଟ ଓପନର ଶିବସୁନ୍ଦର ଦାସ କେନ୍ଦ୍ରାଞ୍ଚଳରୁ କମିଟିର ସଦସ୍ୟ ରହିଛନ୍ତି ।
ପୁରୁଷ ବରିଷ୍ଠ ଜାତୀୟ ଚୟନ କମିଟିରେ ୨ ଜଣ, ମହିଳାରେ ୪ ଜଣ ସଦସ୍ୟ ଏବଂ ଜୁନିୟର ପୁରୁଷରେ ଜଣେ ସଦସ୍ୟ ପୂରଣ ପାଇଁ ବିସିସିଆଇ ପକ୍ଷରୁ ବିଜ୍ଞପ୍ତି ଜାରି କରାଯାଇଛି । ଆସନ୍ତା ମାସ ୧୦ ତାରିଖ ଆବେଦନର ଶେଷ ତାରିଖ ରହିଛି । ୨୦୨୩ ଜାନୁଆରୀ ମାସରୁ ଶିବ ସୁନ୍ଦର ଜାତୀୟ ଚୟନ କମିଟିରେ କେନ୍ଦ୍ରାଞ୍ଚଳରୁ ରହିଛନ୍ତି । ପୂର୍ବତନ ଅଧ୍ୟକ୍ଷ ଚେତନ ଶର୍ମାଙ୍କ ସ୍ଥାନରେ ୨୦୨୩ ଜାନୁଆରୀ ମାସରେ କିଛି ଦିନ ସେ ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଦାୟିତ୍ୱ ନିର୍ବାହ କରିଥିଲେ । ଏହାପରେ ଅଗରକରଙ୍କୁ ନୂଆ ଅଧ୍ୟକ୍ଷ ନିଯୁକ୍ତ କରାଯାଇଥିଲା।
ଦକ୍ଷିଣାଞ୍ଚଳରୁ ଏବେ ଶ୍ରୀଧରନ ଶରଥ ସଦସ୍ୟ ରହିଛନ୍ତି । ଆସନ୍ତା ସେପ୍ଟେମ୍ବରରେ ତାଙ୍କର କାର୍ଯ୍ୟକାଳ ପୂରଣ ହେବ । ଏହି ସ୍ଥାନରେ ପ୍ରଜ୍ଞାନ ଜାତୀୟ କମିଟିରେ ସାମିଲ ହେବେ । ସେ ଚୟନ ହେଲେ ପୂର୍ବରୁ କମିଟିରେ ଶିବ ସୁନ୍ଦର ରହିଛନ୍ତି । ହୁଏତ ଏହି ଓଡ଼ିଆ ଯୋଡ଼ି ଅଧିକ ଦିନ ମିଳିତ ଭାବେ କାର୍ଯ୍ୟ କରିବାର ସୁଯୋଗ ପାଇ ନପାରନ୍ତି । କାରଣ କମିଟିରେ ଦ୍ୱିତୀୟ ସଦସ୍ୟ ଭାବେ କିଏ ବାଦ ପଡ଼ିବେ ତାହା ସ୍ପଷ୍ଟ ହୋଇନି ।
ଶିବସୁନ୍ଦର କେନ୍ଦ୍ରାଞ୍ଚଳରୁ ରହିଛନ୍ତି । ଅଗରକରଙ୍କ ପ୍ରମୁଖ ସହଯୋଗୀ ଭାବେ କାର୍ଯ୍ୟ କରି ଆସୁଛନ୍ତି । ଉଭୟଙ୍କୁ ପ୍ରାୟତଃ ଏକାଠି ଦେଖିବାକୁ ମିଳୁଛି । ପୂର୍ବରୁ ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଭୂମିକା ମଧ୍ୟ ନିର୍ବାହ କରିଛନ୍ତି । ତଥାପି କେନ୍ଦ୍ରାଞ୍ଚଳର ସଦସ୍ୟତାକୁ ନେଇ କିଛିଟା ଅନିଶ୍ଚିତତା ରହିଛି । ପୂର୍ବାଞ୍ଚଳରୁ ସୁବ୍ରତ ବାନାର୍ଜୀ ସଦସ୍ୟ ଅଛନ୍ତି । ଉଭୟ ବାନାର୍ଜୀ ଓ ଶିବ ସୁନ୍ଦର ପୂର୍ବାଞ୍ଚଳରୁ ହିଁ ନିଜ ନିଜ ରାଜ୍ୟ ଦଳରୁ ଘରୋଇ କ୍ରିକେଟ୍ ଖେଳୁଥିଲେ ।
ଶିବ ସୁନ୍ଦର ଓ ପ୍ରଜ୍ଞାନ ଉଭୟ ଜାତୀୟ ଚୟନ କମିଟିରେ ସାମିଲ ହେଲେ ବି ଓଡ଼ିଶା କ୍ରିକେଟର ଭାଗ୍ୟ ବଦଳିବାର ନାହିଁ । କାରଣ ଜାତୀୟ କ୍ରିକେଟ୍ରେ (ବିସିସିଆଇ ଘରୋଇ ଟୁର୍ଣ୍ଣାମେଣ୍ଟ) ଓଡ଼ିଶାର ପ୍ରଦର୍ଶନ ଆଦୌ ଭଲ ନାହିଁ । ଓଡ଼ିଆ ଖେଳାଳିମାନେ ସେମିତି ପ୍ରଭାବଶାଳୀ ପ୍ରଦର୍ଶନ ଦେବାରେ ବିଫଳ ରହିଛନ୍ତି । ପ୍ରଦର୍ଶନ ନଥିଲେ କମିଟିର ସଦସ୍ୟମାନେ କେମିତି ଖେଳାଳିଙ୍କ ନାମ ସୁପାରିସ କରିପାରିବେ । ତେଣୁ ଓଡ଼ିଆ ଖେଳାଳିଙ୍କୁ ପ୍ରଭାବୀ ପ୍ରଦର୍ଶନ କରିବାକୁ ପଡ଼ିବ । ପୂର୍ବରୁ ଦେବାଶିଷ ମହାନ୍ତି ଜାତୀୟ ଚୟନ କମିଟିର ସଦସ୍ୟ ଥିଲେ ।
ନିୟମ ଅନୁସାରେ, ଅବସର ନେବାର ୫ ବର୍ଷ ପରେ ଜଣେ ଖେଳାଳି ଚୟନ କମିଟିର ସଦସ୍ୟ ହୋଇପାରିବେ । ପ୍ରଜ୍ଞାନ ୨୦୨୦ରୁ ସନ୍ନ୍ୟାସ ନେଇ ଭାଷ୍ୟକାର ଭୂମିକା ନିର୍ବାହ କରୁଛନ୍ତି । ସେ ୨୪ଟି ଟେଷ୍ଟ ଖେଳି ୧୨୪ଟି ୱିକେଟ୍ ହାସଲ କରିଥିଲେ । ସେହିପରି ଦିନିକିଆରେ ୧୮ଟି ମ୍ୟାଚ୍ ଖେଳି ୨୧ଟି ୱିକେଟ୍ ପାଇଥିଲେ ।
