ନୂଆଦିଲ୍ଲୀ, ୨୩/୦୮ : ରିଲିଜ୍ ହେବା ପୂର୍ବରୁ ଝୁଣ୍ଟିଲା ଫିଲ୍ମ ଅଜୟ : ଦ ଅନଟୋଲ୍ଡ ଷ୍ଟୋରୀ ଅଫ୍ ଏ ଯୋଗୀ। ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଉପରେ ଆଧାରିତ ଫିଲ୍ମ ରିଲିଜ୍ ମାମଲା ଏବେ ହାଇକୋର୍ଟରେ ପହଞ୍ଚିଛି। ସେଣ୍ଟ୍ରାଲ୍ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ ଜାଣିଶୁଣି ଅନୁମତି ଦେଉନଥିବା ଫିଲ୍ମ ନିର୍ମାତା ଅଭିଯୋଗ କରିଛନ୍ତି। ସେପଟେ ହାଇକୋର୍ଟ କହିଛନ୍ତି ଯେ, ଫିଲ୍ମ ନଦେଖି କୋର୍ଟ କିଛି ବି ରାୟ ଦେବେନାହିଁ। ଏହି ମାମଲାରେ ପରବର୍ତ୍ତୀ ଶୁଣାଣି ଅଗଷ୍ଟ ୨୫ରେ ହେବ।
ସମ୍ରାଟ ସିନେମାଟିକ୍ସ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଏହି ଫିଲ୍ମ ପ୍ରଡ୍ୟୁସ୍ କରିଛି। ତାଙ୍କର କହିବା ଅନୁଯାୟୀ, ଫିଲ୍ମ ଶାନ୍ତନୁ ଗୁପ୍ତାଙ୍କ ଫିଲ୍ମ ଦ ମଙ୍କ ହୁ ବିକେମ୍ ଚିଫ୍ ମିନିଷ୍ଟର ଉଉପରେ ଆଧାରିତ। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ମଧ୍ୟ ଫିଲ୍ମକୁ ନେଇ କୌଣସି ଆପତ୍ତି ଦର୍ଶାଯାଇ ନାହିଁ। ଜଣେ ରାଜନେତାଙ୍କ ଜୀବନ କାହାଣୀକୁ ଦର୍ଶାଇବା କେବଳ ଏହି ଫିଲ୍ମର ଉଦ୍ଦେଶ୍ୟ। ଏହା ସମସ୍ତଙ୍କୁ ଏକତା ଓ ଅଖଣ୍ଡତା ପାଇଁ ଏକଜୁଟ ହୋଇ ରହିବା ପାଇଁ ପ୍ରେରଣା ଦେବ।
ପ୍ରଡ୍ୟୁସରଙ୍କ ଅଭିଯୋଗ ଅନୁଯାୟୀ, ଚଳିତ ବର୍ଷ ଜୁନ ୫ରେ ସାର୍ଟିଫିକେସନ ପାଇଁ ଆବେଦନ କରାଯାଇଥିଲା। ସିବିଏଫସିକୁ ୭ ଦିନ ମଧ୍ୟରେ ଆବେଦନକୁ ଯାଞ୍ଚ କରିବା କଥା ଓ ୧୫ ଦିନ ମଧ୍ୟରେ ଫିଲ୍ମ ସ୍କ୍ରିନିଂ ହେବା କଥା। ହେଲେ ଆବେଦନକୁ ମାସେ ପୂରି ଯାଇଥିଲେ ସୁଦ୍ଧା ସିବିଏଫସି କୌଣସି କାର୍ଯ୍ୟାନୁଷ୍ଠାନ ନେଲା ନାହିଁ। ଏହାପରେ ପୁଣି ଥରେ ପ୍ରାୟୋରିଟି ସ୍କିମ୍ରେ ଆବେଦନ କରାଯାଇଥିଲା। ସିବିଏଫସି ଜୁଲାଇ ୭ରେ ସ୍କ୍ରିନିଂ ତାରିଖ ଧାର୍ଯ୍ୟ କରିଥିଲା। ହେଲେ ଏହି ତାରିଖକୁ ବି ରଦ୍ଦ କରିଦିଆଗଲା। ଏନେଇ ସେନ୍ସର ବୋର୍ଡ ପକ୍ଷରୁ ରଦ୍ଦ କରାଯିବା ନେଇ କୋଣସି କାରଣ ଦିଆଯାଇ ନଥିଲା। ତେଣୁ ବାଧ୍ୟହୋଇ ହାଇକୋର୍ଟଙ୍କ ଦ୍ଵାରସ୍ଥ ହେବାକୁ ପଡ଼ିଲା।
