ନୂଆଦିଲ୍ଲୀ,୨୩/୦୮:ଟ୍ରମ୍ପଙ୍କୁ ବଡ଼ ଝଟକା । ଲଢ଼ୁଆ ଜେଟ ଇଞ୍ଜିନ ତିଆରି ଦିଗରେ ଆତ୍ମନିର୍ଭରଶୀଳ ହେବ ଭାରତ ।  ଫ୍ରାନ୍ସ ସହିତ ମିଶି ଭାରତ ନିଜର ସ୍ବଦେଶୀ ପଞ୍ଚମ ପିଢ଼ିର ଷ୍ଟେଲ୍ଥ  ଲଢ଼ୁଆ ଜେଟ  ପାଇଁ ଏକ ନୂତନ ଶକ୍ତିଶାଳୀ ଜେଟ ଇଞ୍ଜିନ ବିକଶିତ କରିବ। ଯାହା ଦୁଇ ଦେଶ ମଧ୍ୟରେ ରଣନୈତିକ ସହଭାଗୀତାକୁ ଆହୁରି ମଜବୁତ କରିବ।

ଭାରତ ଏବଂ ଫ୍ରାନ୍ସର ପ୍ରସିଦ୍ଧ କମ୍ପାନୀ ସାଫ୍ରନ ମିଳିତ ଭାବରେ ଏକ ଶକ୍ତିଶାଳୀ ୧୨୦ କେଏନ ଇଞ୍ଜିନ ତିଆରି କରିବ। ଯାହା ଭାରତୀୟ ବାୟୁସେନାକୁ ହାଇପର ପାୱାର ଦେବ। ଭାରତର ଏହି ପଦକ୍ଷେପ ଆମେରିକାକୁ ଏକ ବଡ଼ ଝଟକା ଦେଇଛି। କାରଣ ଆମେରିକା ଭାବିଥିଲା ଯେ ଭାରତ ଏହି ପ୍ରକଳ୍ପ ପାଇଁ ଜିଇ ୪୧୪ ଇଞ୍ଜିନ କିଣିବ, କିନ୍ତୁ ଭାରତ ସାଫ୍ରନ ସହିତ ଚୁକ୍ତି ଚୂଡ଼ାନ୍ତ କରିଛି। ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ ଖୁବଶୀଘ୍ର ଏହି ପ୍ରକଳ୍ପକୁ ସୁରକ୍ଷା ସମ୍ପର୍କିତ କ୍ୟାବିନେଟ କମିଟିକୁ ଅନୁମୋଦନ ପାଇଁ ପଠାଇବ। ଏହି ପ୍ରକଳ୍ପରେ, ଫ୍ରାନ୍ସର ବଡ଼ କମ୍ପାନୀ ସାଫ୍ରନ ଭାରତକୁ ୧୦୦% ପ୍ରଯୁକ୍ତିବିଦ୍ୟା ହସ୍ତାନ୍ତର କରିବ, ଯାହା ଦ୍ୱାରା ନୂତନ ୧୨୦ କିଲୋନ୍ୟୁଟନ ଇଞ୍ଜିନ ଭାରତରେ ହିଁ ବିକଶିତ, ଡିଜାଇନ, ପରୀକ୍ଷଣ, ପ୍ରମାଣିତ ଏବଂ ଉତ୍ପାଦନ କରାଯାଇପାରିବ।

ରିପୋର୍ଟ ଅନୁଯାୟୀ, ଜଣେ ଅଧିକାରୀ କହିଛନ୍ତି, DRDO ସଫ୍ରାନର ପ୍ରସ୍ତାବକୁ ଅନୁମୋଦନ କରିଛି, ଯାହା ଭାରତରେ ପୂର୍ବରୁ ବିଭିନ୍ନ ପ୍ରକାରର ହେଲିକପ୍ଟର ଇଞ୍ଜିନ ତିଆରି କରେ। ଏହା ପଞ୍ଚମ ପିଢ଼ିର ଲଢ଼ୁଆ ବିମାନ ପାଇଁ ସର୍ବୋତ୍ତମ ବିକଳ୍ପ। ଏହି ପ୍ରକଳ୍ପ ପାଇଁ ପ୍ରାୟ ୭ ବିଲିୟନ ଡଲାର ଖର୍ଚ୍ଚ ହେବ।’ ତେବେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଶୁକ୍ରବାର  ଦି ଇକୋନୋମିକ୍ ଟାଇମ୍ସ ୱାର୍ଲ୍ଡ ଲିଡର୍ସ ଫୋରମରେ ଭାଷଣ ଦେବା ସମୟରେ ଏହି ପ୍ରକଳ୍ପକୁ ନିଶ୍ଚିତ କରିଛନ୍ତି। ସେ କହିଛନ୍ତି, 'ଆମେ ଆମର ପଞ୍ଚମ ପିଢ଼ିର ଲଢ଼ୁଆ ବିମାନ ନିର୍ମାଣ ଦିଗରେ ପଦକ୍ଷେପ ନେଇଛୁ। ଆମେ ଭାରତରେ ହିଁ ଜେଟର ଇଞ୍ଜିନ ନିର୍ମାଣ କରିବା ଦିଗରେ ଆଗକୁ ବଢ଼ିଛୁ।  ଫ୍ରାନ୍ସ କମ୍ପାନୀ ସାଫ୍ରନ ସହିତ ମିଳିତ ଭାବରେ ଭାରତରେ ଇଞ୍ଜିନ ନିର୍ମାଣ କାର୍ଯ୍ୟ ଆରମ୍ଭ କରିବାକୁ ଯାଉଛୁ।'ଏହି ପ୍ରକଳ୍ପ ପାଇଁ ୟୁକେର ରୋଲ୍ସ ରୟସ୍ ଏବଂ ଆମେରିକାର GE ଭଳି ବଡ଼ ବଡ଼ କମ୍ପାନୀଗୁଡ଼ିକ ମଧ୍ୟ ପ୍ରତିଦ୍ୱନ୍ଦ୍ୱିତା କରୁଥିଲେ। ଫ୍ରାନ୍ସ ସହିତ ଏହି ପ୍ରକଳ୍ପ ସମାପ୍ତ କରିବାର ସ୍ପଷ୍ଟ ଅର୍ଥ ହେଉଛି ଯେ ପ୍ରାରମ୍ଭିକ AMCA ୟୁନିଟ୍ଗୁଡ଼ିକ GE-414 ଇଞ୍ଜିନ ସହିତ ଉଡ଼ାଣ ଭରିବ ।