ମୁମ୍ବାଇ,୨୧/୦୮: ସଞ୍ଜୁଙ୍କ ପାଇଁ ଶୁବମନ ଅଡ଼ୁଆ । ସାମସନଙ୍କ ମୁଣ୍ଡ ଉପରେ ଝୁଲୁଛି ଗିଲ୍ ଖଣ୍ଡା । ଚୂଡ଼ାନ୍ତ ଏକାଦଶରେ ମିଳିବନି ସୁଯୋଗ । ଏସିଆ କପ୍ରେ ଓପନିଂ ଯୋଡ଼ି ସ୍ଥିର । ବଦଳିଲା ଗୌତମଙ୍କ ଗମ୍ଭୀର ବୟାନ । ବର୍ଷ ୨୦୨୦, ସଞ୍ଜୁ ସାମସନଙ୍କୁ ନେଇ ସୋସିଆଲ୍ ମିଡିଆରେ ଗୁରୁତ୍ବପୂର୍ଣ୍ଣ ପୋଷ୍ଟ କରିଥିଲେ ବର୍ତ୍ତମାନର ଟିମ୍ ଇଣ୍ଡିଆର ହେଡ୍ କୋଚ୍ ଗୌତମ ଗମ୍ଭୀର । ସେ ଲେଖିଥିଲେ, ସଞ୍ଜୁ ସର୍ବଶ୍ରେଷ୍ଠ ଯୁବ ଓ୍ବିକେଟ୍ କିପର ବ୍ୟାଟର । ସାମସନଙ୍କୁ ନେଇ ତର୍କ ମଧ୍ୟ ରଖିଥିଲେ ଗୌତମ । ହେଲେ ପାଞ୍ଚ ବର୍ଷ ପରେ ଅଲୋଡ଼ା ହୋଇଗଲେ ଭାରତୀୟ ଟି-୨୦ ଦଳର ଏହି ଓପନିଂ ବ୍ୟାଟର । ଏସିଆ କପ୍ ସ୍କ୍ବାର୍ଡରେ ସିଲେକସନ ହୋଇଛନ୍ତି ସତ ହେଲେ ଚୂଡ଼ାନ୍ତ ଏକାଦଶରେ ସ୍ଥାନ ମିଳିବା କଷ୍ଟକର । କାରଣ ଶୁବମନ ଗିଲଙ୍କୁ ଉପ-ଅଧିନାୟକ କରାଯିବା ପରେ ସେ ପ୍ଲେଇଙ୍ଗ ଇଲେଭେନରେ ସ୍ଥାନ ପାଇବା ସ୍ଥିର ।
ମଙ୍ଗଳବାର ଏସିଆ କପ୍ ପାଇଁ ଟିମ୍ ଇଣ୍ଡିଆ ଘୋଷଣା ହୋଇଛି । ୧୫ ଜଣିଆ ଟି-ଟ୍ବେଣ୍ଟି ଦଳରେ ସ୍ଥାନ ପାଇଛନ୍ତି ଶୁବମନ ଗିଲ୍ । ଖାଲି ଏତିକି ନୁହେଁ ଅକ୍ଷର ପଟେଲଙ୍କ ସ୍ଥାନରେ ବିସିସିଆଇ ତାଙ୍କୁ ଉପଅଧିନାୟକ କରି ଗୁରୁଦାୟିତ୍ବ ମଧ୍ୟ ଦେଇଛି । ଏସିଆ କପରେ ଯଦି ଅଭିଷେକ୍ ଶର୍ମାଙ୍କ ସହିତ ଶୁବମନ ଗିଲ୍ ଓପନିଂ କରିନ୍ତି ତେବେ ସାମସନ ଡ୍ରେସିଂ ରୁମ୍ରେ ବସିବା ଟା ଥୟ । ଏପଟେ ସଞ୍ଜୁଙ୍କ ସ୍ପଷ୍ଟ ଜବାବ ରଖିଛନ୍ତି ଚିଫ୍ ସିଲେକ୍ଟର ଅଜିତ ଅଗରକର । ଟି-୨୦ ଦଳରେ ଶୁବମନ ଗିଲ୍ ଏବଂ ଯଶସ୍ବୀ ଜୟସ୍ବାଲ ନଥିବାରୁ ତାଙ୍କୁ ସୁଯୋଗ ମିଳିଥିଲା । ଅନ୍ୟପଟେ ଏହି ଫର୍ମାଟରେ ବର୍ତ୍ତମାନ ସଞ୍ଜୁ ସାମସନଙ୍କ ଫର୍ମ ସାମାନ୍ୟ ଗଡ଼ବଡ଼ ରହିଛି । ପୂର୍ବ ପାଞ୍ଚଟି ଟି-୨୦ ମୁକାବିଲାରେ ସେ ମାତ୍ର ୫୧ ରନ ସଂଗ୍ରହ କରିଛନ୍ତି । ସେପଟେ ଶୁବମନ ଗିଲ୍ ମଧ୍ୟ ଜବଦସ୍ତ ଫର୍ମରେ ରହିଛନ୍ତି । ଇଂଲଣ୍ଡ ବିପକ୍ଷ ଟେଷ୍ଟ ସିରିଜରେ ସେ ୭ଶହରୁ ଅଧିକ ରନ୍ ସଂଗ୍ରହ କରି ଫେରିଛନ୍ତି ।
କାହିଁକି ସାମସନଙ୍କ ଉପରେ ଭାରି ପଡ଼ିଲେ ଗିଲ୍ ? ଶୁବମନ ଗିଲ୍ ଭବିଷ୍ୟତରେ ଅଲ୍ ଫର୍ମାଟ୍ ଅଧିନାୟକ ହେବ କି ? ଏଭଳି କିଛି ପ୍ରଶ୍ନର ଉତ୍ତର ଏସିଆ କପ୍ ଟିମ୍ ଚୟନରୁ ମଧ୍ୟ ମିଳିଛି । କାରଣ ମ୍ୟାନେଜମେଣ୍ଟ ଟିମ୍ ଇଣ୍ଡିଆର ଅଲ୍ ଫର୍ମାଟ୍ରେ ଜଣିଏ କ୍ୟାପଟେନ୍ ରଖିବାକୁ ଚିନ୍ତା କରୁଛନ୍ତି । ଗିଲ୍ ଯଦି ଫିଟ୍ ରୁହନ୍ତି ତେବେ ୨୦୨୭ରେ ହେବାକୁ ଥିବା ଦିନିକିଆ ବିଶ୍ବ ଏବଂ ୨୦୨୮ ଲସ୍ ଏଞ୍ଜିଲସ ଅଲମ୍ପିକ୍ସରେ ନେତୃତ୍ବ ନେବା ଏକ ପ୍ରକାର ସୁନିଶ୍ଚିତ । ସେପଟେ ଟି-20 ଓ୍ବାର୍ଲ୍ଡକପ୍ ପର୍ଯ୍ୟନ୍ତ ରିଷଭ ପନ୍ତ ସୁସ୍ଥ ହେଲେ ସଞ୍ଜୁ ସାମସନଙ୍କ ଟିମ୍ରେ ସ୍ଥାନ ପକ୍କା କରିବା ମୁସ୍କିଲ୍ ହେବ । ସେପ୍ଟେମ୍ବର ୯ ତାରିଖରୁ ଏସିଆ କପ୍ ଆରମ୍ଭ ହେଉଛି । ଭାରତ ନିଜର ଅଭିଯାନ ୧୦ ତାରିଖରେ ଆରମ୍ଭ କରିବ । ତେବେ ଟିମ୍ ଦୁବାଇରେ ପହଞ୍ଚିବା ପରେ ଚୂଡ଼ାନ୍ତ ଏକାଦଶ ସ୍ଥିର କରାଯିବ ବୋଲି ଚିଫ୍ ସିଲେକ୍ଟର ଅଜିତ ଅଗରକର କହିଛନ୍ତି ।..
