ସେଞ୍ଚୁରୀୟନ, ୧୩/୧୧ : ଘରୋଇ ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଆଜି ଖେଳାଯିବ ତୃତୀୟ ଟି-ଟ୍ୱେଣ୍ଟି । ଉଭୟ ଦଳ ଇତି ମଧ୍ୟରେ ଗୋଟିଏ ଲେଖାଏଁ ମ୍ୟାଚ୍ ଜିତି ସାରିଥିବାରୁ ଏହି ମ୍ୟାଚ୍କୁ ନେଇ ଉତ୍ସାହ ବଢି ଯାଇଛି । ଆଗକୁ ଆଉ ୨ଟି ମ୍ୟାଚ୍ ବାକି ରହିଛି । ବର୍ତ୍ତମାନ ଅଗ୍ରଣୀ ପାଇଁ ଉଭୟ ଦଳ ଜୋରଦାର ପ୍ରସ୍ତୁତି କରିଥିବାବେଳେ ଏହି ମ୍ୟାଚ୍ ପାଇଁ ପ୍ରସ୍ତୁତ କରାଯାଇଥିବା ପିଚ୍ ଫୋକସ୍ରେ ରହିଛି । ଡର୍ବାନରେ ଭାରତ ବିଜୟୀ ହୋଇଥିଲା । ସଞ୍ଜୁ ସାମସନ ଶତକ ଅର୍ଜନ କରିଥିଲେ ଓ ଭାରତ ୨୦୨ ରନ୍ର ପାହାଡ଼ ଛିଡ଼ା କରିଥିଲା । ମାତ୍ର ପୋର୍ଟ ଏଲିଜାବେଥ୍ରେ ଅନୁଷ୍ଠିତ ଦ୍ୱିତୀୟ ମ୍ୟାଚ୍ରେ ଦକ୍ଷିଣ ଆଫ୍ରିକା ଘାତକ ବୋଲିଂ କରି ମ୍ୟାଚ୍କୁ ଫେରିଥିଲା ।
ଘରୋଇ ଦଳର ପେସ୍ ବାହିନୀ ଆଗରେ ଭାରତୀୟ ବିଭାଗ ତୁଚ୍ଛ ମନେ ହୋଇଥିଲା । ସେଞ୍ଚୁରୀୟନ୍ ପିଚ୍ ମଧ୍ୟ ପେସ୍ ବୋଲରଙ୍କୁ ସହାୟତା କରିବ । ଏଠାରେ ଅପେକ୍ଷାକୃତ ଅଧିକ ବାଉନ୍ସ ହେବା ସହ ବଲ୍ ଯଥେଷ୍ଟ ସୁଇଂ କରିବ । ସମୁଦ୍ର ପତନ ଠାରୁ ଗ୍ରାଉଣ୍ଡ ଢେର ଉଚ୍ଚରେ ରହିଥିବାରୁ ଏଠାରେ ବିଶାଳ ସଟ୍ ଖେଳିବା ମଧ୍ୟ ସହଜ ହେବ । କ୍ରିଜ୍ରେ ଜମିଲେ ବିଶାଳ ସ୍କୋର ସଂଗୃହୀତ ହୋଇପାରିବ । ଶେଷ ୨ଟି ଯାକ ମ୍ୟାଚ୍ ତୀବ୍ର ସଂଘର୍ଷପୂର୍ଣ୍ଣ ରହିବା ନିଶ୍ଚିତ । ଦ୍ୱିତୀୟ ମ୍ୟାଚ୍ ଜିତିବା ପରେ ଘରୋଇ ଦଳର ମନୋବଳ ଦ୍ୱିଗୁଣା ହୋଇଛି । ଭାରତର ଯୁବ ବାହିନୀ ମଧ୍ୟ ପୂର୍ବ ମ୍ୟାଚ୍ର ତ୍ରୁଟି ସୁଧାରି ନେଇଛି । କେବଳ ଓପନର ଅଭିଷେକ ଶର୍ମାଙ୍କ ଫର୍ମକୁ ନେଇ ଦଳ ଚିନ୍ତାରେ ରହିଛି । ଦଳରେ ତୃତୀୟ ଓପନର ନଥିବାରୁ ଅଭିଷେକ ଆଜି ଖେଳିବା ନିଶ୍ଚିତ । ଦକ୍ଷିଣ ଆଫ୍ରିକାର ଭେଟେରାନ ବ୍ୟାଟର ଡେଭିଡ୍ ମିଲର ମଧ୍ୟ ଫର୍ମ ଫେରି ପାଇବାକୁ ସଂଘର୍ଷ କରୁଛନ୍ତି । ଉଭୟ ଦଳ ଆସନ୍ତା କାଲି ଏକାଦଶରେ ପରିବର୍ତ୍ତନ କରିବାର ସମ୍ଭାବନା ରହିଛି । ଶେଷ ୨ଟି ମ୍ୟାଚ୍ ପାଇଁ ଡାକରା ପାଇଥିବା ପେସ୍ ବୋଲର ଲୁଥୋ ସିମ୍ପାଲା ଆଜି ଦକ୍ଷିଣ ଆଫ୍ରିକା ଏକାଦଶରେ ସ୍ଥାନ ପାଇବେ । ଭାରତ ମଧ୍ୟ ଯୁବ ଅଲ୍ରାଉଣ୍ଡର ରମଣଦୀପ ସିଂହଙ୍କୁ ଖେଳାଇବାକୁ ଯୋଜନା କରୁଛି ।
ଆଜି ଭାରତୀୟ ସ୍ପିନରଙ୍କ ଉପରେ ନଜର ରହିବ । ରବି ବିଷ୍ଣୋଇ ଓ ବରୁଣ ଚକ୍ରବର୍ତ୍ତୀ ପ୍ରଥମ ୨ଟି ଯାକ ମ୍ୟାଚ୍ରେ ୧୬ ଓଭର ବୋଲିଂ କରି ୧୨ଟି ୱିକେଟ୍ ନେଇ ସାରିଛନ୍ତି ।
-: ସମ୍ଭାବ୍ୟ ଦଳ :-
ଦକ୍ଷିଣ ଆଫ୍ରିକା: ରିଜା ହେଣ୍ଡରିକ୍ସ, ର୍ୟାନ ରିକେଲଟନ, ଆଡେନ ମାରକ୍ରମ (ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ହେନରିକ କ୍ଲାସେନ, ଡେଭିଡ୍ ମିଲର, ମାର୍କୋ ଜାନସେନ, ଗେରାଲ୍ଡ କୋଏଜି, ଆଣ୍ଡିଲ ସିମେଲେନ/ଲୁଥୋ ସିମ୍ପାଲା, ନକାବ୍ୟୋମଜି ପିଟର, କେଶବ ମହାରାଜ ।
ଭାରତ: ସଞ୍ଜୁ ସାମସନ, ଅଭିଷେକ ଶର୍ମା, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା, ରିଙ୍କୁ ସିଂହ, ଅକ୍ଷର ପଟେଲ, ରମଣଦୀପ ସିଂହ/ଅଭେଶ ଖାନ, ରବି ବିଷ୍ଣୋଇ, ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ ।
