ନୂଆଦିଲ୍ଲୀ: ଉଦୀୟମାନ ଭାରତୀୟ ବ୍ୟାଟର ନୀତୀଶ ରେଡ୍ଡି ଆଇସିସି ଟେଷ୍ଟ କ୍ରିକେଟ ମାନ୍ୟାତାରେ ବହୁ ଉପରକୁ ଉଠିଛନ୍ତି । ଶୀର୍ଷ ୧୦ ଭାରତୀୟ ବ୍ୟାଟରଙ୍କ ତାଲିକାରେ ସ୍ଥାନ ପାଇଛନ୍ତି ନୀତୀଶ । ୨୧ ବର୍ଷୀୟ ବ୍ୟାଟିଂ ଅଲରାଉଣ୍ଡର ଭାରତ-ଅଷ୍ଟ୍ରେଲିଆ ଚତୁର୍ଥ ଟେଷ୍ଟରେ ଶତକ ହାସଲ କରିଥିଲେ । ଅଷ୍ଟମ ସ୍ଥାନରେ ବ୍ୟାଟିଂ କରିବାକୁ ଆସି ସେ ଏହି ରନ୍ ସ୍କୋର କରି ସମସ୍ତଙ୍କୁ ଚକିତ କରିଦେଇଥିଲେ । ଏହା ପରେ ସେ ଆଇସିସି ଟେଷ୍ଟ ରାଙ୍କିଂରେ ୫୨୮ ପଏଣ୍ଟ ସହ ୫୩ ତମ ସ୍ଥାନରେ ପହଞ୍ଚିଛନ୍ତି ।
୨୦ଟି ସ୍ଥାନ ଉପରକୁ ଉଠିଛନ୍ତି ନୀତୀଶ ରେଡ୍ଡି । ସେ ଶ୍ରେୟସ ଆୟର ଏବଂ ଅକ୍ଷର ପଟେଲଙ୍କୁ ପଛରେ ପକାଇ ଦେଇଛନ୍ତି । ଏସବୁ ଭିତରେ, ଯଶସ୍ବୀ ଜୟସ୍ବାଲ ଏକାମାତ୍ର ଭାରତୀୟ ବ୍ୟାଟର ଭାବରେ ଶୀର୍ଷ ୧୦ ଖେଳାଳିଙ୍କ ମଧ୍ୟରେ ସ୍ଥାନ ପାଇଛନ୍ତି । ଟେଷ୍ଟ ରାଙ୍କିଂରେ ଚତୁର୍ଥ ସ୍ଥାନରେ ରହିଛନ୍ତି ଜୟସ୍ବାଲ । ସେପଟେ ଚଳିତ ବର୍ଡର ଗାଭାସ୍କର ଟ୍ରଫିରେ ଲଗାତାର ନୈରାଶ୍ୟଜନକ ପ୍ରଦର୍ଶନ କରୁଥିବା ଭାରତୀୟ ଅଧିନାୟକ ରୋହିତ ଶର୍ମାଙ୍କୁ ବହୁ କ୍ଷତିର ସାମ୍ନା କରିବାକୁ ପଡ଼ିଛି । ରୋହିତ ଶର୍ମା ୪୦ ତମ ସ୍ଥାନକୁ ଖସିଆସିଥିବା ବେଳେ ବିରାଟ କୋହଲି ୩ଟି ସ୍ଥାନ ଖସି ୨୪ତମ ସ୍ଥାନରେ ରହିଛନ୍ତି ।
ସେପଟେ ଭାରତୀୟ ଦ୍ରୁତ ବୋଲର ଯଶପ୍ରୀତ ବୁମରା ବୁଧବାର ଆଇସିସି ଦ୍ଵାରା ଜାରି ସଦ୍ୟତମ ଟେଷ୍ଟ ବୋଲିଂ ମାନ୍ୟତାରେ ଇତିହାସ ରଚିଛନ୍ତି। ସେ ବୋଲିଂ ମାନ୍ୟତାରେ ଶୀର୍ଷ ସ୍ଥାନ ବଳବତ୍ତର ରଖିବା ସହ ଅଧିକ ରେଟିଂ ହାସଲ କରିବାରେ ଭାରତୀୟ ବୋଲର ହେବାର କୀର୍ତ୍ତିମାନ ରଚିଛନ୍ତି। ବୁମରା ନିକଟରେ ସନ୍ନ୍ୟାସ ନେଇଥିବା ତାରକା ସ୍ପିନର ରବିଚନ୍ଦ୍ରନ ଅଶ୍ଵିନଙ୍କୁ ପଛରେ ପକାଇଛନ୍ତି।
ଅଶ୍ଵିନ ୨୦୧୬ରେ ୯୦୪ ପଏଣ୍ଟ ସହ ନିଜର ସର୍ବୋଚ୍ଚ ରେଟିଂ ହାସଲ କରିଥିଲେ। ବୁମରା ନିକଟରେ ଅଶ୍ଵିନଙ୍କ ସମକକ୍ଷ ହୋଇଥିଲେ। ଆଉ ଅଷ୍ଟ୍ରେଲିଆ ବିପକ୍ଷ ଚତୁର୍ଥ ଟେଷ୍ଟରେ ଶାଣିତ ବୋଲିଂ କରି ଭାରତୀୟ ବୋଲର ଭାବେ ନୂଆ ରେକର୍ଡ ସ୍ଥାପନ କରିଛନ୍ତି। ବୁମରା ୯୦୭ ରେଟିଂ ପଏଣ୍ଟ ସହ ସର୍ବକାଳୀନ ତାଲିକାରେ ଇଂଲଣ୍ଡର ଡେରେକ ଅଣ୍ଡରଉଡଙ୍କ ସହିତ ଯୁଗ୍ମ ୧୭ତମ ସ୍ଥାନରେ ରହିଛନ୍ତି।
ଅଷ୍ଟ୍ରେଲିଆର ଅଧିନାୟକ ତଥା ଦ୍ରୁତ ବୋଲର ପାଟ୍ କମିନ୍ସଙ୍କୁ ମଧ୍ୟ ମାନ୍ୟତାରେ ଫାଇଦା ମିଳିଛି। ସେ ମାନ୍ୟତାରେ ତୃତୀୟ ସ୍ଥାନରେ ପହଞ୍ଚିଛନ୍ତି। ଏହା ବ୍ୟତୀତ ମେଲବର୍ଣ୍ଣ ଟେଷ୍ଟରେ ବ୍ୟାଟିଂରେ ଉଲ୍ଲେଖନୀୟ ଯୋଗଦାନ ଦେଇ ଦଳ ବିଜୟରେ ମୁଖ୍ୟ ଭୂମିକା ଗ୍ରହଣ କରିଛନ୍ତି। ଟେଷ୍ଟ ବ୍ୟାଟିଂ ମାନ୍ୟତାରେ ଯଶସ୍ଵୀ ଜୟସ୍ଵାଲ ଗୋଟିଏ ସ୍ଥାନ ଉପରକୁ ଉଠି ଚତୁର୍ଥରେ ପହଞ୍ଚିଛନ୍ତି। ଯଶସ୍ଵୀଙ୍କୁ ୮୫୪ ରେଟିଂ ପଏଣ୍ଟ ମିଳିଛି । ସେ ଭାରତର ଏକ ମାତ୍ର ବ୍ୟାଟର ଭାବେ ଟପ୍-୧୦ରେ ରହିଛନ୍ତି। ଋଷଭ ପନ୍ତ ଗୋଟିଏ ସ୍ଥାନ ତଳକୁ ଖସି ୧୨ତମ ସ୍ଥାନରେ ରହିଥିବା ବେଳେ ଗିଲ୍ ୨୦ତମ ସ୍ଥାନରେ ରହିଛନ୍ତି। ବିରାଟ କୋହଲି ଓ ରୋହିତ ଶର୍ମା ଟପ୍-୨୦ରେ ବି ନାହାନ୍ତି ।
