ନୂଆଦିଲ୍ଲୀ,୦୪/୦୧: କ୍ରୀଡ଼ା ଜଗତରୁ ଦୁଃଖଦ ଖବର। ହକି ଇଣ୍ଡିଆର ପୂର୍ବତନ କୋଚ୍ ଜଗବୀର ସିଂଙ୍କୁ ଡାକ୍ତରଖାନାରେ ଭର୍ତ୍ତି । ହୃଦଘାତରେ ପୀଡିତ ଥିବାରୁ ତାଙ୍କୁ ଦିଲ୍ଲୀର ଆପୋଲୋ ହସ୍ପିଟାଲର ଆଇସିୟୁରେ ଭର୍ତ୍ତି କରାଯାଇଥିବା ଜଣାପଡିଛି । ତେବେ ବର୍ତ୍ତମାନ ତାଙ୍କ ସ୍ବାସ୍ଥ୍ୟାବବସ୍ଥା ଗୁରୁତର ରହିଥିବା ନେଇ ତାଙ୍କ ପରିବାର ସଦସ୍ୟ ସୂଚନା ଦେଇଛନ୍ତି।
ସୂଚନାନୁସାରେ, ୨ ଥର ଅଲିମ୍ପିଆନ୍ ଜଗବୀର ସିଂ ହକି ଇଣ୍ଡିଆ ଲିଗ୍ ପାଇଁ ଟିମ୍ ଗୋନାସିକାଙ୍କ ସହ ଦିଲ୍ଲୀ ଆସିଥିଲେ। ଏକ ପ୍ରଶିକ୍ଷଣ ଅଧିବେଶନରେ ତାଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡି ଯାଇଥିଲା। ଯେତେବେଳେ ସେ ଛାତି ଟାଣିବା ଏବଂ ନିଶ୍ୱାସ ନେବାରେ ଅସୁବିଧା ଅନୁଭବ କଲେ, ତାଙ୍କୁ ତୁରନ୍ତ ଆପୋଲୋ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଯାଞ୍ଚ କରିବା ପରେ ଜଣାପଡିଥିଲା ଯେ ତାଙ୍କ ହାର୍ଟ ବ୍ଲକ ଅଛି ଏଥିପାଇଁ ଅସ୍ତ୍ରୋପଚାର ଆବଶ୍ୟକ। ଅସ୍ତ୍ରୋପଚାର ସମୟରେ ଜଗବୀର ହୃଦଘାତରେ ପୀଡିତ ହୋଇ ଆଇସିୟୁରେ ଭର୍ତ୍ତି ହୋଇଥିଲେ।
ପ୍ରକାଶ ଥାଉକି, ଉତ୍ତରପ୍ରଦେଶର ଆଗ୍ରାସ୍ଥିତ ଏକ ଶିଖ ପରିବାରରେ ଜନ୍ମ ହୋଇଥିବା ୫୯ ବର୍ଷୀୟ ଜଗବୀର ସିଂ ଜଣେ ପୂର୍ବତନ ଅଲିମ୍ପିଆନ୍। ତାଙ୍କ ପିତା ଦର୍ଶନ ସିଂ ମଧ୍ୟ ଦେଶ ପାଇଁ ହକି ଖେଳିଥିଲେ। ସେ ତାଙ୍କ ସହରରେ ଅଲ ଇଣ୍ଡିଆ ଧ୍ୟାନ ଚାନ୍ଦ ଟୁର୍ନାମେଣ୍ଟ ଆୟୋଜନ କରିଥିଲେ। ୧୯୮୮ ମସିହାରେ ସିଓଲ୍ ଅଲିମ୍ପିକ୍ସରେ ଏବଂ ୧୯୯୨ରେ ବାର୍ସିଲୋନା ଅଲିମ୍ପିକ୍ସରେ ଜଗବୀର ସିଂ ଦୁଇଥର ଦେଶ ପ୍ରତିନିଧିତ୍ୱ କରିଥିଲେ। ସେ ୧୯୮୫ ରୁ ୧୯୯୬ ପର୍ଯ୍ୟନ୍ତ ଦେଶ ପାଇଁ ଖେଳିଥିଲେ। ସେ ସିଓଲରେ ଅନୁଷ୍ଠିତ ୧୯୮୬ ଏସିଆନ୍ ଗେମ୍ସରେ ଦେଶ ପାଇଁ ବ୍ରୋଞ୍ଜ ପଦକ ଜିତିଥିଲେ । ସେହିପରି ୧୯୯୦ ରେ, ସେ ବେଜିଂରେ ଆୟୋଜିତ ଏସୀୟ ଗେମ୍ସରେ ରୌପ୍ୟ ପଦକ ଜିତି ନିଜର ନାମ ପ୍ରସିଦ୍ଧ କରିଥିଲେ ।
