ନୂଆଦିଲ୍ଲୀ: ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳା ଯାଉଥିବା ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଶେଷ ପର୍ଯ୍ୟାୟରେ ପହଞ୍ଚିଛି । ଜାନୁଆରୀ ୩ରୁ ବର୍ଡର-ଗାଭାସ୍କର ଟ୍ରଫିର ପଞ୍ଚମ ଟେଷ୍ଟ ସିଡନୀରେ ଖେଳାଯିବ । ଏହି ଟେଷ୍ଟ ଜିତି ଭାରତୀୟ ଦଳ ବର୍ଡର-ଗାଭାସ୍କର ଟ୍ରଫିକୁ ଡ୍ର କରାଇବା ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇବ । ତେବେ ସିରିଜରେ ଋଷଭ ପନ୍ତଙ୍କ ଖରାପ ସଟ୍ ଭାରତୀୟ ଦଳର ଅଡ଼ୁଆ ବଢାଇ ଦେଇଛି। ତେଣୁ ପନ୍ତଙ୍କୁ ସିଡନୀ ଟେଷ୍ଟରୁ ବାଦ୍ ଦିଆଯାଇ ତାଙ୍କ ସ୍ଥାନରେ ଧ୍ରୁବ ଜୁରେଲଙ୍କୁ ସୁଯୋଗ ଦିଆଯାଇପାରେ ।
ମେଲବର୍ଣ୍ଣ ଟେଷ୍ଟରେ ଋଷଭ ପନ୍ତ ଅନେକ ଭୁଲ କରିଛନ୍ତି । ଯେଉଁ ସମୟରେ ଧୈର୍ଯ୍ୟର ସହ ବ୍ୟାଟିଂ କରିବାର ଥିଲା, ସେହି ସମୟରେ ସେ ବଲ୍ରେ ବେପରୁଆ ସଟ୍ ଖେଳି ଆଉଟ୍ ହୋଇଥିଲେ। ଏହା ପରେ ଭାରତୀୟ ଦଳ ୧୫୫ ରନରେ ଅଲଆଉଟ୍ ହୋଇଥିଲା ଏବଂ ହାରିଥିଲା । ପନ୍ତଙ୍କ ପ୍ରଦର୍ଶନ ଦଳ ପ୍ରବନ୍ଧକଙ୍କୁ ପଞ୍ଚମ ଟେଷ୍ଟ ପୂର୍ବରୁ ଚୂଡ଼ାନ୍ତ ଏକାଦଶ ଉପରେ ପୁନର୍ବିଚାର ପାଇଁ ବାଧ୍ୟ କରିଛି।
ଋଷଭ ପନ୍ତଙ୍କ ଖରାପ ପ୍ରଦର୍ଶନ ପରେ ଯୁବ ଓ୍ଵିକେଟ୍ କିପର ବ୍ୟାଟର ଧ୍ରୁବ ଜୁରେଲଙ୍କ ନାଁ ଚର୍ଚ୍ଚାକୁ ଆସିଛି। ଜୁରେଲ୍ ଇଣ୍ଡିଆ ଏ ଓ ଅଷ୍ଟ୍ରେଲିଆ ଏ ମଧ୍ୟରେ ଖେଳା ଯାଇଥିବା ମ୍ୟାଚରେ ଦମଦାର ପ୍ରଦର୍ଶନ କରିଛନ୍ତି । ସେ ମେଲବର୍ଣ୍ଣରେ ୮୦ ରନ ଓ ୬୮ ରନର ଗୁରୁତ୍ଵପୂର୍ଣ୍ଣ ଇନିଂସ ଖେଳିଥିଲେ । ଏହା ବ୍ୟତୀତ ଇରାନୀ ଟ୍ରଫିରେ ମଧ୍ୟ ୯୩ ରନର ଅପରାଜିତ ଇନିଂସ ଖେଳିଥିଲେ । ଜୁରେଲଙ୍କ ପ୍ରଥମ ଶ୍ରେଣୀ ରେକର୍ଡ ମଧ୍ୟ ପନ୍ତଙ୍କଠୁ ଉନ୍ନତ ରହିଛି । ସେ ୨୨ ମ୍ୟାଚରେ ୪୫.୪୭ ହାରରେ ୧୨୩୫ ରନ କରିଛନ୍ତି । ଜୁରେଲ ଭାରତ ପାଇଁ ଟେଷ୍ଟରେ ୬ଟି ଇନିଂସରୁ ୪୦.୪୦ ହାରରେ ୨୦୨ ରନ କରିଛନ୍ତି । ଏଥିରେ ଗୋଟିଏ ଅର୍ଦ୍ଧଶତକ ସାମିଲ ।
