ପାରାଦ୍ୱୀପ,୦୬/୦୯: ଇଣ୍ଡିଆନ ଅଏଲ ଟର୍ମିନାଲ ପାଇପଲାଇନରୁ ଲିକ୍ ହେଲା ଶହ ଶହ ଲିଟର ତେଲ । ଜାହାଜରୁ ଇଣ୍ଡିଆନ ଅଏଲ ଟର୍ମିନାଲକୁ ପାଇପ ଯୋଗେ ଆସୁଥିଲା ଡିଜେଲ । ଅଗ୍ନିକାଣ୍ଡ ଡରରେ ବସିରହିଛନ୍ତି ସ୍ଥାନୀୟ ବସ୍ତିବାସିନ୍ଦା । ଗୁରୁବାର ବିଳମ୍ବିତ ରାତିରେ ଜଗତସିଂହପୁର ପାରାଦ୍ୱୀପ ବାଉରିଆପାଳନ୍ଦାରେ ଏହି ଦୁର୍ଘଟଣା ଘଟିଛି ।
ସୂଚନା ମୁତାବକ, ଜାହାଜରୁ ଇଣ୍ଡିଆନ ଅଏଲ ଟର୍ମିନାଲକୁ ପାଇପ ଯୋଗେ ଆସୁଥିଲା ଡିଜେଲ । ତେବେ ଗୁରୁବାର ବିଳମ୍ବିତ ରାତିରେ ଇଣ୍ଡିଆନ ଅଏଲ ଟର୍ମିନାଲ ପାଇପଲାଇନରୁ ଶହ ଶହ ଲିଟର ତେଲ ଲିକ୍ ହୋଇଥିଲା । ଏହା ଦେଖି ସ୍ଥାନୀୟଲୋକେ ଟର୍ମିନାଲ କର୍ତ୍ତୃପକ୍ଷକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଟର୍ମିନାଲ କର୍ତ୍ତୃପକ୍ଷର ସଦସ୍ୟ ପହଞ୍ଚି ଲିକ୍ ହେଉଥିବା ସ୍ଥାନକୁ ମରାମତି କରି ତେଲକୁ ନିୟନ୍ତ୍ରଣ କରିଥିଲେ । ଘଟଣା ସ୍ଥଳରେ ତେଲ ବ୍ୟାରେଲ ସହିତ କିଛି ପାଇପ ପଡିଥିବାର ମଧ୍ୟ ଦେଖିବାକୁ ମିଳିଥିଲା ।
କିଛି ଅସାଧୁ ବ୍ୟବୟାୟୀ ଉକ୍ତ ସ୍ଥାନରେ ବାରମ୍ବାର ଏହି ଭଳି ଭାବରେ ତେଲ ଲିକ୍ କରାଉଥିବା ନେଇ ସ୍ଥାନୀୟଲୋକେ ସନ୍ଦେହ କରୁଥିବା ଜଣାପଡ଼ିଛି । ଏଭଳି ଘଟଣା ବାରମ୍ବାର ଘଟୁଥିବା ସତ୍ତ୍ୱେ କୌଣସି ପ୍ରଶାସନିକ ଅଧିକାରୀ କିମ୍ବା କମ୍ପାନୀ ଅଧିକାରୀ ଏହା ଉପରେ ଗୁରୁତ୍ୱ ଦେଉନାହାନ୍ତି । କେବଳ ଲିକ୍ ସ୍ଥାନକୁ ମରାମତି କରି ଚୁପ୍ ହୋଇ ରହିଯାଉଛନ୍ତି । ଏହି ଟର୍ମିନାଲ ନିକଟରେ ବସ୍ତି ରହିଥିବାରୁ ଅଗ୍ନିକାଣ୍ଡକୁ ନେଇ ଅନେକ ସମୟରେ ଭୟଭୀତ ଅବସ୍ଥାରେ ରହୁଛନ୍ତି ବସ୍ତିବାସିନ୍ଦା ।
