ଆଗକୁ ଆସୁଛି ହୋଲି । ଏହି ପର୍ବ ଓଡ଼ିଆ ଘରର ଲୋକଙ୍କ ପାଇଁ ବେଶ୍ ମହତ୍ତ୍ୱପୂର୍ଣ୍ଣ । ଏହି ଦିନ ପ୍ରତ୍ୟେକଙ୍କ ଘରେ ବିଭିନ୍ନ ପ୍ରକାରର ସୁସ୍ୱାଦୁ ବ୍ୟଞ୍ଜନ ପ୍ରସ୍ତୁତ କରାଯାଇଥାଏ । ବିଶେଷ କରି ଶାକାହାରୀ ଖାଦ୍ୟ ପ୍ରସ୍ତୁତ କରାଯାଇଥାଏ । କାରଣ ହିନ୍ଦୁ ଧର୍ମରେ ପର୍ବପର୍ବାଣିରେ ଆମିଷ ଖାଦ୍ୟକୁ ବର୍ଜନ କରାଯାଇଛି । ଏହି ନିରାମିଷ ଖାଦ୍ୟରେ ଲୋକେ ପନିର ଖାଇବାକୁ ବହୁ ମାତ୍ରାରେ ପସନ୍ଦ କରିଥାନ୍ତି । କାରଣ ଶାକାହାରୀ ଲୋକଙ୍କ ପାଇଁ ଏହା ଏକ ମୁଖ୍ୟ ଖାଦ୍ୟ । ହେଲେ କ'ଣ ଆପଣ ଜାଣନ୍ତି କି, ବଜାରରେ ଏହାର ଡିମାଣ୍ଡ ଅଧିକ ହେବାରୁ କିଛି ଅସାଧୁ ଲୋକ ନିଜର ସ୍ୱାର୍ଥ ପାଇଁ ଲୋକଙ୍କ ଜୀବନକୁ ବିପଦରେ ପକାଇବାରୁ ମଧ୍ୟ ପଛାଉ ନାହାନ୍ତି । ପନିରରେ ଅପମିଶ୍ରଣ କରି ଅଧିକ ମାତ୍ରାରେ ପନିର ତିଆରି କରିଥାନ୍ତି । ଯଦି ଆପଣ ବଜାରରୁ ପନିର କିଣି ଆଣି ଘରେ ଏହାର ସୁସ୍ୱାଦୁ ବ୍ୟଞ୍ଜନ ପ୍ରସ୍ତୁତ କରଛନ୍ତି, ତେବେ ହୋଇ ଯାଆନ୍ତୁ ସାବଧାନ । ଏହା ଆପଣଙ୍କ ସ୍ୱାସ୍ଥ୍ୟ ଉପରେ ଅନେକ କୁପ୍ରଭାବ ପକାଇପାରେ । ତେବେ ଆସନ୍ତୁ ଜାଣିବା, ବଜାରରେ ମିଳୁଥିବା ଏହି ନକଲି ପନିରକୁ ଆପଣ କିପରି ଚିହ୍ନି ପାରିବେ ।
ଆପଣଙ୍କୁ କହିରଖୁଛୁ ଯେ, ଆଜିକାଲି ବଜାରରେ ନକଲି ପନିର ବହୁଳ ଭାବରେ ବିକ୍ରି ହେଉଛି । ଯାହା ସ୍ୱାସ୍ଥ୍ୟ ପାଇଁ ବହୁ କ୍ଷତିକାରକ। ତେଣୁ ଯଦି ଆପଣ ମଧ୍ୟ ବଜାରରୁ ପନିର କିଣିବାକୁ ଯାଉଛନ୍ତି, ତେବେ ଅସଲି ଏବଂ ନକଲି ପନିର ମଧ୍ୟରେ କିପରି ପାର୍ଥକ୍ୟ କରିବେ ତାହା ଜାଣନ୍ତୁ।
ପନିର ଅସଲି ନା ନକଲି ତାହା କିପରି ଜଣିବେ?
ପ୍ରଥମେ ପନିରକୁ ଏକ ପ୍ୟାନରେ ରଖନ୍ତୁ ଏବଂ ଏହାକୁ ଗରମ କରନ୍ତୁ । ଯଦି ପନିରଟି ଅସଲି, ତେବେ ଏହା ସୁନେଲି ରଙ୍ଗରେ ପରିଣତ ହେବ । ଅନ୍ୟପଟେ ଯଦି ପନିର ନକଲି ହୋଇଥାଏ, ତେବେ ଏହା ଧିରେ ଧିରେ ତରଳିବା ଆରମ୍ଭ କରିବ ଏବଂ ପରେ ଭାଙ୍ଗିଯିବ। କାରଣ ସେହି ପନିରରେ ପ୍ଲାଷ୍ଟିକ ଅପମିଶ୍ରଣ ହୋଇଛି ।
ପନିରକୁ ଚିହ୍ନିବା ପାଇଁ, ଆପଣ ହରଡ଼ ଡାଲିର ସାହାଯ୍ୟ ମଧ୍ୟ ନେଇପାରିବେ । ଏଥିପାଇଁ, ପନିରକୁ ଏକ ପାତ୍ରରେ ଗରମ କରନ୍ତୁ ଏବଂ ୧୦ ମିନିଟ୍ ପରେ ଏହାକୁ ଥଣ୍ଡା ପାଣିରେ ପକାଇ ଛାଡି ଦିଅନ୍ତୁ । ୧୦ ମିନିଟ୍ ପରେ ଏଥିରେ ହରଡ଼ ଡାଲି ପକାନ୍ତୁ । ଯଦି ସେହି ପାଣିର ରଙ୍ଗ ଲାଲ ହୋଇଯାଏ ତେବେ ପନିରଟି ଅପମିଶ୍ରିତ ହୋଇଛି । ଯଦି ପାଣିର ରଙ୍ଗରେ ପରିବର୍ତ୍ତନ ନହୁଏ ତେବେ ଏହା ଶୁଦ୍ଧ ବୋଲି ଆପଣ ନିଶ୍ଚିତ ହୋଇଯାଆନ୍ତୁ ।
