ଭୁବନେଶ୍ୱର ୨୮/୦୨: ଲମ୍ବା ଅଭିନୟ କ୍ୟାରିଅର ଭିତରେ ଉତ୍ତମ ମହାନ୍ତି ଅନେକ ନାୟିକାଙ୍କ ସହ ଅଭିନୟ କରିଛନ୍ତି । ବିଶେଷକରି ଅପରାଜିତାଙ୍କ ସହ ୫୦ରୁ ଅଧିକ ଫିଲ୍ମ କରି ଦର୍ଶକଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ତିଆରି କରିଥିଲେ । ଦୁହିଁଙ୍କ ଯୋଡି ସାରା ଓଡ଼ିଶାବାସୀଙ୍କ ହୃଦୟରେ ଦୀର୍ଘ ବର୍ଷ କରିଛି ରାଜୁତି । ଏବେ ବି ସିନେପ୍ରେମୀ ଆଖି ବନ୍ଦ କରିଦେଲେ ନାଚି ଉଠେ ଦୁହିଁଙ୍କ ଛଳଛଳ ମୁହଁ । ଏହି ଯୋଡ଼ି ଫିଲ୍ମର ରିଲ୍ ଦୁନିଆରୁ ଆଗକୁ ବଢି ବାସ୍ତବ ଜୀବନରେ ଘର ବସାଇଥିଲେ । ସଫଳ ଯୋଡ଼ି ସାଜିଥିଲେ । ଓଡ଼ିଆ ଚଳଚ୍ଚିତ୍ର ଜଗତରେ ଆଜି ଯାଏଁ ହିଟ୍ ନାୟକ-ନାୟିକା ଯୋଡ଼ି ମଧ୍ୟରେ ଶୀର୍ଷରେ ଅଛନ୍ତି ଉତ୍ତମ-ଅପରାଜିତା ।
୮୦ଦଶକରେ ଅସ୍ତରାଗ ଚଳଚ୍ଚିତ୍ରରୁ ଆରମ୍ଭ ହୋଇଥିବା ଏହି ଯୋଡ଼ି ଅନେକ ସୁପରହିଟ୍ ଫିଲ୍ମରେ ଏକାଠି ନଜର ଆସିଥିଲେ । ତା ଭିତରେ ପୂଜା ଚନ୍ଦନ, ଜାଇଫୁଲ, ଉଦଣ୍ଡି ସୀତା, ଲକ୍ଷ୍ମଣ ରେଖା, ମା ପରି କିଏ ହେବ, ଶଂଖା ସିନ୍ଦୁର, ତୁଣ୍ଡ ବାଇଦ, ଥିଲି ଝିଅ ହେଲି ବୋହୂ, ଜଗା ହାତରେ ପଘା ଭଳି ସୁପରହିଟ୍ ଚଳଚ୍ଚିତ୍ର ଭେଟି ଦେଇଥିଲେ ।
ଖାଲି ଅପରାଜିତା ନୁହଁନ୍ତି ମହାଶ୍ୱେତା ରାୟଙ୍କ ସହ ପ୍ରାୟ ୩୦ ଚଳଚ୍ଚିତ୍ରରେ ଉତ୍ତମ ନାୟକ ଭୂମିକାରେ ଆସିଥିଲେ । ପରବର୍ତ୍ତୀ ସମୟରେ ହିନ୍ଦୀ ଚଳଚ୍ଚିତ୍ର ଅଭିନେତ୍ରୀ ଅର୍ଚ୍ଚନା ଜୋଗଲେକର ଓ ଉତ୍ତମଙ୍କ ଯୋଡ଼ି ସୁପରହିଟ୍ ହୋଇଥିଲା ରୂପେଲି ପରଦାରେ । ଚର୍ଚ୍ଚିତ ଅଭିନେତ୍ରୀ ରଚନା ବାନାର୍ଜୀଙ୍କ ସହ ଉତ୍ତମଙ୍କ ଯୋଡ଼ିକୁ ଦର୍ଶକ ବେଶ ପସନ୍ଦ କରିଥିଲେ । ଏହାବାଦ୍ ଅଭିନେତ୍ରୀ ତନ୍ଦ୍ରା ରାୟ, ବୈଶାଳୀ, ଦୀପା ଓ ସୁଜାତା ଆନନ୍ଦଙ୍କ ସେ ମଧ୍ୟ ଅଭିନୟ କରି ସାଉଁଟିଥିଲେ ପ୍ରଶଂସା ।
