ସମ୍ବଲପୁର, ୨୫/୦୭ : ଆସନ୍ତା ୨୮ରେ ଖୋଲିବ ହୀରାକୁଦ ଗେଟ୍ । ବୁଧବାର ସକାଳ ୯ଟାରେ ଜଳଭଣ୍ଡାରର ଗେଟ୍ ଖୋଲିବ। ଚଳିତ ବର୍ଷର ପ୍ରଥମ ବନ୍ୟାଜଳ ନିଷ୍କାସନ ଉପରେ ନିଷ୍ପତ୍ତି ନିଆଯାଇଛି। ଉପରମୁଣ୍ଡରେ ପ୍ରବଳ ବର୍ଷାଯୋଗୁଁ ଜଳଭଣ୍ଡାର ଜଳସ୍ତର ବଢୁଥିବାରୁ ଏହି ନିଷ୍ପତ୍ତି ନିଆଯାଇଛି। ଏନେଇ ହୀରାକୁଦ ବନ୍ଧ କତୃପକ୍ଷ ଜିଲ୍ଲାମାନଙ୍କୁ ସତର୍କ ସୂଚନା ଦେଇଛନ୍ତି। ମୁଖ୍ୟଯନ୍ତ୍ରୀ ସୁଶିଲ କୁମାର ବେହେରା ଏନେଇ ସୂଚନା ଦେଇଛନ୍ତି।
ସୂଚନାନୁଯାୟୀ, ସୁଧୁରିଛି ହୀରାକୁଦ ଜଳଭଣ୍ଡାର ସ୍ଥିତି। ଉପରମୁଣ୍ଡରେ ବର୍ଷା ଫଳରେ ଜଳଭଣ୍ଡାରକୁ ଇନଫ୍ଲୋ ବୃଦ୍ଧି ପାଉଛି। ଚଳିତ ମୌସୁମୀ ସମୟରେ ପ୍ରଥମ କରି ଜଳଭଣ୍ଡାରକୁ ଇନଫ୍ଲୋ ଏକ ଲକ୍ଷ କ୍ୟୁସେକ ଉପରେ ରହିଛି। ଆଜି ସକାଳ ୯ଟା ସୁଦ୍ଧା ମିଳିଥିବା ତଥ୍ୟ ଅନୁସାରେ ପ୍ରତିସେକେଣ୍ଡରେ ଜଳଭଣ୍ଡାରକୁ ୧ ଲକ୍ଷ ୭୨ ହଜାର ୫୬ କ୍ୟୁସେକ ଜଳ ପ୍ରବେଶ କରୁଛି। ଫଳରେ ଜଳସ୍ତର ବୃଦ୍ଧି ପାଇ ୬୦୪.୯୧ ଫୁଟରେ ପହଞ୍ଚିଛି। ଗତ ବର୍ଷ ଜୁଲାଇ ୨୩ ତାରିଖରେ ଗେଟ୍ ଖୋଲିଥିଲା।