ମାଲକାନଗିରି, ୨୧।୭: ମାଲକାନଗିରି ଜିଲ୍ଲାରେ ଜାରି ରହିଛି ବର୍ଷା । ଲଗାଣ ବର୍ଷାରେ ବେହାଲ ମାଲକାନଗିରି ଜିଲ୍ଲା । ହେଲେ ଗତ ୩ ଦିନ ଧରି ବର୍ଷା ପାଣିରେ ବୁଡ଼ି ରହିଥିବା ପାଙ୍ଗାମ, ଏମଭି-୯୦, ଏମଭି-୯୬, ମହାରାଜପାଲି ଓ ପୋଟେରୂ ପୋଲ ଉପରୁ ପାଣି ତଳକୁ ଖସିଥିବା ବେଳେ କାଙ୍କୁରୁକୋଣ୍ଡା ପୋଲ ଉପରେ ସାମାନ୍ୟ ପାଣି ପ୍ରବାହିତ ହେଉଛି । ହେଲେ ମାଲକାନଗିରିଠାରୁ ମୋଟୁ ପର୍ଯ୍ୟନ୍ତ ୩୨୬ ନଂ ଜାତୀୟ ରାଜପଥର ଗମନାଗମନ ସ୍ୱାଭାବିକ ହୋଇନାହିଁ ।
ବନ୍ୟା ପାଣିରେ କ୍ଷତିଗ୍ରସ୍ତ ହୋଇଛି ପୋଟେରୁ ପୋଲ । ପୋଲ ଉପରେ ବଡ଼ ବଡ଼ ଗଛ ଆସି ଲାଗି ରହିଥିବା ବେଳେ କଂକ୍ରିଟ୍ ଛାତ ଉଠି ଯାଇଥିବା ଦେଖିବାକୁ ମିଳିଛି । ରାଜପଥ ବିଭାଗ ଉଦ୍ଧାର କାର୍ଯ୍ୟ ଆରମ୍ଭ କରିଛି । ପୋଲ ମରାମତି ପରେ ଯାନ ବାହାନ ଚଳାଚଳ ଆରମ୍ଭ ହେବ ବୋଲି ଜଣାପଡ଼ିଛି । ମାଲକାନଗିରିଠାରୁ କାଲିମେଳା ମୋଟୁ ଓ ପଡ଼ିଆ ମଧ୍ୟରେ ଯୋଗାଯୋଗ ବର୍ତ୍ତମାନ ସୁଦ୍ଧା ବିଚ୍ଛିନ୍ନ ରହିଛି । ଅନେକ ପୋଲର ଦୁଇ ପାର୍ଶ୍ଵରେ ଅନେକ ଯାନ ବାହାନ ଅଟକି ରହିଛି । ପୋଲିସ ଓ ପ୍ରଶାସନିକ ଅଧିକାରୀମାନେ ସବୁଠି ଉପସ୍ଥିତ ରହି ଘଟଣା ଉପରେ ନଜର ରଖିଛନ୍ତି ।
ଅପରପକ୍ଷରେ ବିଭିନ୍ନ ଅଞ୍ଚଳର ଚାଷ ଜମିରେ ପାଣି ମାଡ଼ିଯାଇଥିବା ବେଳେ ଅନେକ ଜାଗାରେ ପୋଲ ଭୁଷୁଡ଼ି ଥିବା ଜଣାପଡ଼ିଛି । ଖଇରପୁଟ ବ୍ଳକର ଦୁଇଟି ଗାଁକୁ ସଂଯୋଗ କରୁଥିବା ଦୁଇଟି ପୋଲ ଭୁଶୁଡ଼ିଯାଇଛି । ଲଗାଣ ବର୍ଷା ଯୋଗୁଁ ବିଭିନ୍ନ ପୋଲ ଉପରେ ପାଣି ବଢ଼ି ଯାଇଥିଲା କିନ୍ତୁ, ବର୍ତ୍ତମାନ ସମସ୍ତ ପୋଲ ଉପରୁ ପାଣି କମିଛି କିନ୍ତୁ ବିଭିନ୍ନ ଗାଁର ଦୁଃଖ ଦୁର୍ଦ୍ଦଶା ବଢାଇ ଦେଇଛି । ବଣ୍ଡାଘାଟିକୁ ଯାତାୟତ ସ୍ୱାଭାବିକ ହୋଇଛି ।