ନୂଆଦିଲ୍ଲୀ: ନାଗପୁର ଦିନିକିଆରେ ଡେବ୍ୟୁ କରିଛନ୍ତି ହର୍ଷିତ ରାଣା । କ୍ୟାରିୟରର ପ୍ରଥମ ଦିନିକିଆରେ ବଡ଼ ରେକର୍ଡର ଅଧିକାରୀ ହୋଇଛନ୍ତି ଏହି ଫାଷ୍ଟ ବୋଲର । ପ୍ରଥମ ମ୍ୟାଚ୍ରେ ସେ ଭାରତ ପାଇଁ ୩ଟି ୱିକେଟ୍ ହାସଲ କରିଛନ୍ତି । ହର୍ଷିତ ରାଣା ଭାରତ ପାଇଁ ତିନୋଟି ଫର୍ମାଟରେ ଡେବ୍ୟୁ କରିସାରିଛନ୍ତି ଏବଂ ତିନୋଟି ଫର୍ମାଟର ପ୍ରଥମ ମ୍ୟାଚ୍ରେ ହିଁ ୩ କିମ୍ୱା ଏହାଠାରୁ ଅଧିକ ୱିକେଟ୍ ନେଇଛନ୍ତି । ଏପରି କରିବାରେ ପ୍ରଥମ ଭାରତୀୟ କ୍ରିକେଟର ହୋଇଛନ୍ତି ହର୍ଷିତ ରାଣା ।
ଭାରତୀୟ ଟିମ୍ ୧୯୭୪ରୁ ଦିନିକିଆ କ୍ରିକେଟ୍ ଖେଳୁଛି ଏବଂ ୫୦ ବର୍ଷର ଇତିହାସରେ କୌଣସି ଖେଳାଳି ହର୍ଷିତ ରାଣାଙ୍କ ପରି ରେକର୍ଡ କରିପାରି ନାହାନ୍ତି । ହର୍ଷିତ ରାଣା ଟେଷ୍ଟ ଡେବ୍ୟୁରେ ୪ଟି ୱିକେଟ୍ ନେଇଥିଲେ । ଟି-20ର ଡେବ୍ୟୁ ମ୍ୟାଚରେ ୩ ୱିକେଟ୍ ଏବଂ ଏବେ ଦିନିକିଆର ପ୍ରଥମ ମ୍ୟାଚ୍ରେ ମଧ୍ୟ ୩ଟି ଶିକାର କରିଛନ୍ତି । ଇଂଲଣ୍ଡ ବିପକ୍ଷ ଆଜିର ମ୍ୟାଚରେ ହର୍ଷିତ ରାଣା ପ୍ରଥମେ ବେନ୍ ଡକେଟ୍, ପରେ ହ୍ୟାରି ବ୍ରୁକ୍ ଏବଂ ତୃତୀୟ ୱିକେଟ୍ ଭାବରେ ଲିୟାମ ଲିଭିଙ୍ଗଷ୍ଟୋନଙ୍କୁ ଆଉଟ୍ କରିଥିଲେ ।
ଇଂଲଣ୍ଡ ଟିମ୍ ନାଗପୁର ଦିନିକିଆରେ କେବଳ ୨୪୮ ରନ କରିବାରେ ସକ୍ଷମ ହୋଇଥିଲା । ହର୍ଷିତ ରାଣାଙ୍କ ବ୍ୟତୀତ ରବିନ୍ଦ୍ର ଜାଡେଜା ଭ୍ରମଣକାରୀ ଟିମକୁ ଅଡ଼ୁଆରେ ପକାଇଥିଲେ । ଜାଡେଜା ମାତ୍ର ୨୬ ରନ୍ ଦେଇ ୩ଟି ୱିକେଟ୍ ନେଇଥିଲେ ।
